(ဂ)-အခြေခံပညာအထက်တန်းအဆင့် အသစ်ပြဋ္ဌာန်းမည့် (KG+12) သင်ရိုးဖြင့် ဒသမတန်း၊ ဧကာဒသမတန်း၊ ဒွါဒသမတန်းများ၏ သင်္ချာနှင့်သိပ္ပံဘာသာရပ်များ သင်ကြားရာတွင် ကျောင်းသုံးစာအုပ်များကို မြန်မာဘာသာဖြင့် ပြုစုသင်ကြားရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း
အခြေခံပညာအထက်တန်းအဆင့် အသစ်ပြဋ္ဌာန်းမည့်(KG+12)သင်ရိုးွဖင့် ဒသမတန်း၊ ဧကာဒသမတန်း၊ ဒါှဒသမတန်းများ၏ သင်္ချာနှင့်သိပ္ပံဘာသာရပ်များ သင်ကြားရာတွင် ကျောင်းသားကျောင်းသူများ၏ သင်ယူမှုရလဒ်မြင့်မားစေရေးနှင့် သင်ယူမှုရလဒ်အရသိရှိခြင်း၊ နားလည်းခြင်းနှင့် အသုံးချခြင်း အဆင့်အထိ ရောက်ရှိနိုင်ရန် ကျောင်းသုံးစာအုပ်များကို မြန်မာဘာသာဖြင့် ပြုစုသင်ကြားရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း
မြန်မာနိုင်ငံ၏ စနစ်သစ် (KG +12) စနစ်အရ Grade-10၊ Grade-11၊ Grade-12 အတန်းများ၏ ဘာသာရပ်များကို ၂၀၂၀ ပညာသင်နှစ် သင်ရိုးသစ်ဖြင့် စတင်တော့မည်ဖြစ်ပါကြောင်း၊ ၂၀၁၉-၂၀ ခုနှစ်တွင် သင်ရိုးသစ် ကျောင်းသုံးဖတ်စာအုပ်များကို ပြုစုရေးသားရတော့မည် ဖြစ်သည့်အတွက် မူလအတိုင်း အင်္ဂလိပ်ဘာသာနှင့် ပြုစုရေးသားမည်လား၊ မြန်မာဘာသာဖြင့် ပြုစုရေးသားမည်လား၊ အင်္ဂလိပ်ဘာသာ၊ မြန်မာဘာသာနှစ်ဘာသာဖြင့် ပြုစုရေးသားမည်လားဆိုသည်မှာ ပြတ်သားမှုနှင့်မူဝါဒ ဆုံးဖြတ်ချက်များ ချမှတ်ရန်လိုအပ်လာပြီ ဖြစ်ပါကြောင်း၊
အခြေခံပညာအထက်တန်းအဆင့်၏ သိပ္ပံဘာသာရပ် ဇီဝ၊ ဓာတု၊ ရူပနှင့်သင်္ချာဘာသာရပ်များကို အင်္ဂလိပ်ဘာသာဖြင့် ကျောင်းသုံးဖတ်စာအုပ်များတွင် ပြုစုသင်ကြားခဲ့ခြင်းမှာ ၁၉၈၆ ခုနှစ်မှစပြီး ယခု ၂၀၁၈ ခုနှစ်အထိ ၃၂ နှစ်ခန့် ကြာမြင့်ခဲ့ပြီ ဖြစ်ပါကြောင်း၊ ယခု ၃၂ နှစ်တာကာလအတွင်း ကျောင်းသား/သူများနှင့် ဆရာ/မများသည် ဘာသာစကားအတားအဆီး အခက်အခဲနှင့်ဘာသာရပ် ဆိုင်ရာ သဘောတရားနားလည်မှု အားနည်းသည့် အခက်အခဲတစ်ခုကို ရင်ဆိုင်နေကြပါကြောင်း၊ ဆရာ/မများ သင်ကြားရေးစနစ်တွင် ဘာသာပြန်သည့် သင်နည်းစနစ်ကို အသုံးပြုသင်ကြားခဲ့ရ သကဲ့သို့ ကျောင်းသား/သူများလည်း သင်၊ ကျက်၊ မေး၊ ဖြေစနစ်ဖြင့် သင်ကြားသင်ယူမှု လုပ်ငန်းများကို ဆောင်ရွက်ခဲ့သည့်အတွက် ကျောင်းသား/သူများ၏ သင်ယူမှု၊ တတ်မြောက်မှုများ နိမ့်ကျနေခြင်းမှာ သိသာထင်ရှား လှပါကြောင်း၊ သင်ယူမှုရလဒ်အရ (၁) သိရှိခြင်း၊ (၂) နားလည်ခြင်း၊ (၃) အသုံးချခြင်း၊ (၄) ခွဲခြမ်းစိတ်ဖြာခြင်း၊ (၅) ပေါင်းစပ်ဖန်တီးခြင်း၊ (၆) အကဲဖြတ်ခြင်းဆိုသည့် အဆင့် ၆ ဆင့်ရှိရာမှ အဆင့်နှစ်ဆင့်အထိ နားလည်မှုက အမြင့်ဆုံးဖြစ်ပါကြောင်း၊ အဆင့် (၃) အသုံးချခြင်းအဆင့်ထိ ရောက်သည့်သူ မရှိသလောက်ကို နည်းလှပါကြောင်း၊ ၎င်းသည် သင်ကြား၊ သင်ယူမှု ဘာသာစကား အခက်အခဲကြောင့် ဖြစ်သည်ဆိုသည်မှာ ငြင်း၍မရပါကြောင်း၊ ၁၉၈၆ ခုနှစ်၏ အရှေ့ပိုင်းသင်ကြား၊ သင်ယူခဲ့သည့် ဆရာ/မများနှင့် ကျောင်းသား/ကျောင်းသူများသည် ဘာသာစကား အခက်အခဲကို ကျော်လွှားရန်မလိုဘဲ ဘာသာရပ်အခက်အခဲ တစ်ခုထဲကိုသာ ကျော်လွှားနေရသည့်အတွက် ဘာသာရပ်ကျွမ်းကျင်မှုဆီကို ဦးတည်နိုင်ပြီး အသုံးချခြင်းဆိုသည့် အဆင့် (၃) အထိ ရောက်ရှိနိုင်ခဲ့ခြင်း ဖြစ်ပါကြောင်း၊ အဆိုပါ အဆင့်ထက်လည်း ပိုရင်ပိုနိုင်ပါကြောင်း၊ အမျိုးသားပညာရေးမူဝါဒ ကော်မရှင်၏ ဒုတိယခြောက်ပတ် အစီရင်ခံစာတွင်လည်း အထက်တန်း အဆင့်တွင် သင်္ချာနှင့်သိပ္ပံများကို သင်ကြား၊ သင်ယူရာတွင် အင်္ဂလိပ်စာဘာသာရပ်ကို သုံးမည့်အစား မြန်မာဘာသာ၊ အင်္ဂလိပ်ဘာသာနှစ်မျိုးပေါင်း အသုံးပြုသင်ကြားသင့်ကြောင်း အကြံပြုဖော်ပြ ထားသည့်အပြင် အဆိုပါ အကြံပြုချက်နှင့် စပ်လျဉ်း၍ ဆွေးနွေးရာတွင်လည်း လွှတ်တော်ကိုယ်စားလှယ် အများစုက ထောက်ခံဆွေးနွေးခဲ့ကြပါကြောင်း၊ နိုင်ငံတကာသုံး ဘာသာစကားဖြစ်သည့် အင်္ဂလိပ်ဘာသာ အရေးကြီးသည်ဆိုတာ မှန်ပါကြောင်း၊ သို့သော် ဘာသာရပ်ကို သင်ကြားရာတွင် အင်္ဂလိပ်ဘာသာနှင့် သင်ကြား၊ သင်ယူခြင်း၊ ဘာသာစကား ကျွမ်းကျင်မှုကို အနည်းအကျဉ်း အထောက်အကူ ပြုနိုင်သော်လည်း ဘာသာရပ်များ၏ ကျွမ်းကျင်မှုအတွက် ဘာသာရပ်သဘောတရားကို နားလည်အောင် သင်ကြားရန်ခက်ခဲကြောင်း တွေ့ရှိနေရပါသည်။ ထို့ကြောင့် အင်္ဂလိပ်စာစွမ်းဆောင်ရည် မြင့်မားရေးအတွက် အရေး၊ အဖတ်၊ အပြော၊ နားထောင်မှုစွမ်းရည်စသည့် လေးမျိုးစလုံးကို ကျွမ်းကျင်အောင် အလယ်တန်းအဆင့်ထဲက စီမံချက်ချသင်ကြားခဲ့လျှင် အင်္ဂလိပ်စာအားနည်းခြင်းကို ပြန်လည်အဆင့်မြှင့်တင်နိုင်မည် ဖြစ်ပါကြောင်း၊ မြန်မာဘာသာသင်ကြားရေးနှင့် စပ်လျဉ်းပြီး သိပ္ပံနှင့်သင်္ချာဝေါဟာရများကို မြန်မာဘာသာသို့ ပြန်ဆိုရန်မလို ပြန်ဆိုမည်ဆိုပါကလည်း မြန်မာဘာသာ၊ အင်္ဂလိပ်ဘာသာ နှစ်မျိုးလုံး ဖော်ပြလျက် ရေးသားပြုစု၍လည်း ရပါကြောင်း၊ ၁၉၈၈ ခုနှစ်နောက်ပိုင်း သုံးခဲ့သည့် မြန်မာဘာသာနှင့် ရေးသားပြုစုထားသည့် သင်္ချာနှင့်သိပ္ပံ ကျောင်းသုံးစာအုပ်များကို နမူနာအနေဖြင့် ကြည့်ရှုရည်ညွှန်း ကိုးကားအသုံးပြုမည် ဆိုပါက ရနိုင်ကြောင်းအကြံပြုလိုပါသည်။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ အလွတ်ကျက်သည့် ပညာရေးစနစ်တွင် စဉ်းစားတွေးခေါ်မှုကို အားပေးသည့် တာဝန်ခံမှု၊ တာဝန်ယူမှုရှိသော တီထွင်ဖန်တီးတတ်သော စိန်ခေါ်မှုကိုရင်ဆိုင် ဖြေရှင်းနိုင်သော၊ ပူးပေါင်းဆောင်ရွက်တတ်သော ကမ္ဘာ့လူသားကောင်း/သမီးကောင်းများ မွေးထုတ်နိုင်ရန်အတွက် စနစ်သစ်ပညာရေးကို ပြုပြင်ပြောင်းလဲရန် လိုအပ်ကြောင်းလမ်းညွှန် ထားပါသည်။ အဆိုပါလမ်းညွှန်ချက်နှင့်အညီဆိုလျှင် ဘာသာရပ်ကိုပိုမို ကျွမ်းကျင်စေနိုင်ရေးအတွက် မြန်မာဘာသာစကားဖြင့် သင်ကြားသင့်ကြောင်း အကြံပြုလိုပါသည်။ ထို့ကြောင့် မြန်မာဘာသာဖြင့် အထက်တန်းအဆင့် ကျောင်းသုံးစာအုပ်များကို မြန်မာဘာသာဖြင့် ပြုစုသင်ကြားပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။