ကောလင်းမြို့နယ်အတွင်း ဖြစ်ပွားခဲ့သော ဝက်နားရွက်ပြာနှင့် အခြားပူးတွဲရောဂါများကြောင့် ဝက်များ ထောင်ချီသေဆုံးကာ စီးပွားရေးပျက်စီးသွားသော မွေးမြူရေးသမားများအတွက် နိုင်ငံတော်မှ ထောက်ပံ့ ကူညီပေးနိုင်ခြင်းရှိ/မရှိ၊ မွေးမြူရေးပြန်လည်ထူထောင်ရန် ငွေကြေးနှင့်နည်းပညာပံ့ပိုး နိုင်ခြင်းရှိ/မရှိ၊ ကူးစက် ရောဂါဖြစ်ပွားလာပါက ထိန်းချုပ်ရေးအစီအစဉ်များ မည်သို့ဆောင်ရွက်ပေးမည်ကို သိလိုခြင်းနှင့် စပ်လျဉ်းသည့် မေးခွန်း

ကောလင်းမြို့နယ်၏ ဝက်မွေးမြူရေးအခြေအနေ၊ ရောဂါဖြစ်ပွားမှုနှင့် ကာကွယ်စောင့်ရှောက်မှုအခြေအနေနှင့် သုံးသပ်ချက်တို့ကို အပိုင်းသုံးပိုင်းခွဲပြီး  တင်ပြသွားမည်ဖြစ်ပါကြောင်း၊ ကောလင်းမြို့နယ်တွင် ဝက်များကို လူမှုရေး၊ စားဝတ်နေရေးနှင့် စီးပွားဖြစ် စသည့် ရည်ရွယ်ချက် (၃)မျိုးဖြင့် မွေးမြူကြပါကြောင်း၊ ကောလင်း မြို့နယ်အနေဖြင့် ဆည်ရေသောက်စိုက်ပျိုးရေးစနစ်မရှိသည့်အတွက် လယ်တစ်ဧကကို နှစ်ဧကဖြစ်ရန် လုပ်ဆောင်ရန် အင်မတန်ခဲယဉ်းပါကြောင်း၊ ထို့ကြောင့် ပြည်သူလူထု၏ ဝင်ငွေနှစ်ဆ တိုးစေရန်အတွက် မွေးမြူရေးကဏ္ဍကို အဓိကအားထားရပါကြောင်း၊ မွေးမြူရေးသမားများနှင့် ပူးပေါင်းပြီး မွေးမြူရေး ကဏ္ဍဖွံ့ဖြိုးရန် ကြိုးစားခဲ့ရာ ယခင်က အကောင်ရေ ၁၀၀၀၀ ပတ်ဝန်းကျင်ခန့်သာ မွေးမြူခဲ့ရာမှ အကောင်ရေ ၄၀၀၀၀ ကျော် အထိအောင် မွေးမြူလာနိုင်ကြပြီး ကန့်ဘလူ၊ ရွှေဘို၊ မန္တလေးတို့အထိအောင် ဝက်များကို တင်ပို့နိုင်ခဲ့ပါကြောင်းနှင့်  စီးပွားရေးလည်း အထိုက်အလျောက်ဖြစ်ကြပါကြောင်း၊ သို့သော် ရောဂါဖြစ်ပွားချိန် တွင် ဆုံးရှုံးနစ်နာမှုသည်လည်း အများကြီးရှိပါကြောင်း၊

အဆိုပါရောဂါသည် ဝန်းသို၊ အင်းတော်ဘက်ကနေ စတင်ဖြစ်ပွားပြီး မန္တလေးနှင့် တခြားမြို့များအထိပါ ဆက်လက်ကူးစက်ပြန့်ပွားပြီး ဝက်ကောင်ရေအများအပြားသေဆုံးကုန်ပါကြောင်း၊ ကူးစက်ရသည့် အကြောင်း အရင်းတွင် (၁) စားသုံးကုန်များမှ ကူးစက်ခြင်း၊ (၂) ဝက်ကုန်သည်များ၏ ဝက်ကားများ၊ ဝက်နာတင်ဖူးသည့် ကားများမှ ရွာများတွင် ကူးစက်ခြင်း စသည့်ဖြင့် ကူးစက်ရသည့် အကြောင်းအရင်း (၂)ကို တွေ့ပါကြောင်း၊ ထိုသို့ ကူးစက်ရသည့် အကြောင်းအရင်းများကို သုံးသပ်ချက်ကြည့်မည်ဆိုပါက အချက် (၃)ခုကို တွေ့ရ ပါကြောင်း၊ (၁) မွေးမြူရေးသမားအနေဖြင့် Bio Security လုံခြုံရေးကို ကျန်းမာရေး အသိပညာ အားနည်းခြင်း၊  (၂) မွေးမြူရေးသမားများအနေဖြင့် ငွေရေးကြေးရေးနှင့် နည်းပညာများတွင် အကူအညီမဲ့နေခြင်း၊ (၃) ရောဂါဖြစ်ပွားချိန်တွင် သက်ဆိုင်ရာဌာနမှ လုံလောက်သည့် ကာကွယ်စောင့်ရှောက်မှု မလုပ်နိုင်ခဲ့ခြင်း စသည့် သုံးသပ်ချက်များကို တွေ့ရှိရပါကြောင်း၊

ထို့ကြောင့် ကောလင်းမြို့နယ်အတွင်း ဖြစ်ပွားခဲ့သော ဝက်နားရွက်ပြာနှင့် အခြားပူးတွဲရောဂါများကြောင့် ဝက်များ ထောင်ချီသေဆုံးကာ စီးပွားရေးပျက်စီးသွားသော မွေးမြူရေးသမားများအတွက် နိုင်ငံတော်မှ ထောက်ပံ့ ကူညီပေးနိုင်ခြင်းရှိ/မရှိ၊ မွေးမြူရေးပြန်လည်ထူထောင်ရန် ငွေကြေးနှင့်နည်းပညာပံ့ပိုး နိုင်ခြင်းရှိ/မရှိ၊ ကူးစက် ရောဂါဖြစ်ပွားလာပါက ထိန်းချုပ်ရေးအစီအစဉ်များ မည်သို့ဆောင်ရွက်ပေးမည်ကို သိလိုပါကြောင်း ပြောကြားပါသည်။