(ခ)-မူးယစ်ဆေးဝါးသုံးစွဲသူများအတွက်လူမှုရေးပြစ်ဒဏ်အဖြစ်ချမှတ်သည့် ပြစ်ဒဏ်ပေးခြင်းကို နိုင်ငံတော် အစိုးရအနေဖြင့် လက်ရှိအချိန်တွင် လက်တွေ့ကျကျအကောင်အထည်ဖော်ဆောင်ရွက် နိုင်ခြင်းရှိ/မရှိ သိလို ခြင်းနှင့်စပ်လျဉ်းသည့် မေးခွန်း
မြန်မာနိုင်ငံအနေဖြင့် အပြည်ပြည်ဆိုင်ရာ မူးယစ်ဆေးဝါးတိုက်ဖျက်ရေးကွန်ဗင်းရှင်းတွင် လက်မှတ်ရေးထိုးထားသည့် အဖွဲ့ဝင်နိုင်ငံဖြစ်သည့်အတွက် အဆိုပါကျင့်ထုံးဥပဒေနှင့်အညီ ဆောင်ရွက်နေသည့် နိုင်ငံလည်းဖြစ်ပါကြောင်း၊ မူးယစ်ဆေးဝါးအန္တရာယ်မှ ကင်းဝေးစေရေး အတွက် အစိုးရအဆက်ဆက်တာဝန်ရှိသူများက အလေးပေးဆောင်ရွက်ခဲ့ကြသော်လည်း မိမိတို့နိုင်ငံ၏ ပထဝီအနေအထား၊ စီးပွားရေး အခြေအနေ၊ လက်နက်ကိုင်ပဋိပက္ခများကြောင့် မူးယစ်ဆေးဝါးကူးသန်းရောင်းဝယ်သည့် နေရာတွင် တစ်ဆင့် ကြားခံနိုင်ငံအဖြစ်လည်းကောင်း၊ အဓိကထုတ်လုပ်သည့် နိုင်ငံအဖြစ်လည်းကောင်း အမေရိကန်အစိုးရသတ်မှတ်ထားသည့် နိုင်ငံပေါင်း ၂၁ နိုင်ငံတွင် မိမိတို့နိုင်ငံအနေဖြင့် ပါဝင်နေဆဲ ဖြစ်ပါကြောင်း၊
ကမ္ဘာပေါ်တွင် မူးယစ်ဆေးဖြန့်ချိသုံးစွဲမှုအမြင့်ဆုံးနိုင်ငံစာရင်းဝင်ဖြစ်သည့် မြန်မာနိုင်ငံတွင် အစိုးရက မည်သို့ ထိထိမိမိထိန်းချုပ်နိုင်မည်ကိုလည်း လူတိုင်းကစိတ်ဝင်စားနေကြပါကြောင်း၊ မူးယစ်ဆေးများသည် ဈေးနှုန်းသက်သာစွာဖြင့် အလွယ်တကူရရှိနိုင်သည့်အတွက်ကြောင့် လူငယ်များ အကြား မူးယစ်ဆေးဝါးသုံးစွဲမှု ပိုမိုများပြားလာပါကြောင်း၊
၂၀၁၆ ခုနှစ်၊ ကမ္ဘာ့မူးယစ်ဆေးဝါးတိုက်ဖျက်ရေး(UNODC) အဖွဲ့၏ အစီရင်ခံစာအရ မူးယစ် ဆေးဝါးသုံးစွဲသည့်ဦးရေ သုံးသိန်းခန့်ရှိရာ မူးယစ်ဆေးဝါးသုံးစွဲမှုမှတ်တမ်းစာရင်း၌ ၉၂၅၈ ဦးသာ ဆေးဝါးကုသမှုခံယူခဲ့ရကြောင်း ရာခိုင်နှုန်းအားဖြင့် ၃ ရာခိုင်နှုန်းသာကုသပေးနိုင်ခဲ့ကြောင်း UNODC အဖွဲ့ရဲ့ထုတ်ပြန်ချက်အရ သိရပါကြောင်း၊ အစိုးရသစ်လက်ထက်တွင် ယခင်ပြဋ္ဌာန်းထားသည့် မူးယစ် ဆေးဝါးနှင့်စိတ်ကိုပြောင်းလဲစေသော ဥပဒေများတွင် ပြစ်မှု၊ ပြစ်ဒဏ်များကို ၂၀၁၈ ခုနှစ်၊ ဖေဖော်ဝါရီလ ၂၅ ရက်နေ့တွင် ပြင်ဆင်ပြဋ္ဌာန်းခဲ့သည့်အတွက် ယခင်ပြဋ္ဌာန်းချက် ပုဒ်မ ၁၅ တွင် ဖော်ပြထားသည့်ပြစ်ဒဏ်များအစား လူမှုအကျိုးပြုလုပ်ငန်းများ ဖြင့် အစားထိုးပြင်ဆင်ခဲ့ပါကြောင်း၊
မူးယစ်ဆေးဝါးသုံးစွဲသူများအတွက် တိုင်းဒေသကြီးနှင့်ပြည်နယ်အနှံ့တွင် ဆေးဖြတ်စခန်းများကို လက်လှမ်းမီသောနေရာတိုင်းမှာ ဖွင့်လှစ်ပေးနိုင်ခြင်းရှိ/မရှိ၊ ပြင်ဆင်ပြဋ္ဌာန်းလိုက်သည့် မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေပုဒ်မ ၁၅ မှာ ဖော်ပြပါရှိသော လူမှုပြစ်ဒဏ်များပေး နိုင်ရေး အတွက် ပြုစုပျိုးထောင်ရေး၊ ပြန်လည်ထူထောင်ရေး လူမှုအကျိုးပြုလုပ်ငန်းများတွင် သတ်မှတ်ထားသည့် ဝတ်စုံများ ဝတ်ဆင်၍ တစ်ရက်ကို နှစ်နာရီ အနည်းဆုံး နာရီ ၂၄၀ မှ ၃၆၀ အထိ ပြစ်ဒဏ်များကိုကျခံနိုင်ရန်အတွက် အစိုးရအနေဖြင့် မည်သည့်နေရာများတွင် အဆောက်အဦများ ဆောက်လုပ်ထားသည်၊ ထိုပြစ်ဒဏ်များကို လက်တွေ့တွင် စတင်အကောင်အထည်ဖော် ချမှတ်ဆောင်ရွက်နိုင်ခြင်း ရှိ/မရှိ များကို သိရှိလိုပါကြောင်း မေးမြန်းပါသည်။