(င)-တရားရုံးများတွင် အမှုပွဲစားများပပျောက်ရေးကို မည်ကဲ့သို့ စီမံဆောင်ရွက်နေသည်ကို သိလိုခြင်းနှင့် စပ်လျဉ်းသည့်မေးခွန်း
မိမိတို့ မြန်မာ့လူမှုရေးနယ်ပယ်တွင် ပွဲစားဆိုသည်မှာ သမာအာဇီဝလုပ်ငန်း တစ်ရပ်ဖြစ်ပါသော်လည်း (Tout) ခေါ်သည့် အမှုပွဲစားများမှာ သမာအာဇီဝလုပ်ငန်း မဟုတ်ပါကြောင်း၊ ဥပဒေနှင့်ညီသည့် လုပ်ငန်းတစ်ရပ်သာဖြစ်ပြီး အမှုပွဲစားများသည် အမှုဆွယ်ပေးသူ လာဘ်ပေးလာဘ်ယူ ပြုလုပ်ပေးသူသာ ဖြစ်ပါကြောင်း၊ တရားဥပဒေက အမှုပွဲစားများကို အတိအလင်း တားမြစ်ထားပါကြောင်း၊ ရှေ့နေလိုက်သူများ ဥပဒေပုဒ်မ ၃၆ တွင် အမှုပွဲစားဟု ကြေညာခံရသူများသည် တရားရုံးအဆင့်ဆင့်သို့ ဝင်ထွက်ခွင့်မရှိကြောင်း၊ အမှုပွဲစားဟု ကြေညာသင့်သူများကို တရားရုံးများတွင် အမည်စာရင်း ကြေညာနိုင်ကြောင်း၊ အမှုပွဲစားဟု ကြေညာခံရသူများအား ထောင်ဒဏ်သုံးလ သို့မဟုတ် ဒဏ်ငွေ သို့မဟုတ် ပြစ်ဒဏ်နှစ်ရပ်လုံးကို ချမှတ်နိုင်သည်ဟု ပြဋ္ဌာန်းထားရှိပါကြောင်း၊
ယနေ့အချိန်အထိ တရားရုံးများတွင် အမှုပွဲစားအဖြစ် ကြေညာထားခြင်း၊ အမှုပွဲစားများကို အရေးယူခြင်းမျိုး မတွေ့ရပါကြောင်း၊ ထို့ကြောင့် အမှုပွဲစားမရှိလို့လားဟု မေးစရာရှိပါကြောင်း၊ သို့သော်လည်း အမှုပွဲစားများ၊ တချို့တရားသူကြီးများ၊ တချို့ဥပဒေအရာရှိများ၊ တချို့ရဲဝန်ထမ်းများ၊ တချို့ရှေ့နေများနှင့် ပေါင်းပြီး အမှုပွဲစားအလုပ်ကို တရားရုံးများတွင် ဝင်ထွက်သွားလာ၍ ပြောင်ပြောင်တင်းတင်း လုပ်နေ၍သာ ဖြစ်ပါကြောင်း၊ အမှုပွဲစားများက အဂတိလိုက်စားမှုတိုက်ဖျက်ရေးတွင် အဓိက စိန်ခေါ်ချက်တစ်ရပ် ဖြစ်ပါကြောင်း၊ အကျင့်သိက္ခာနှင့်ပြည့်စုံသည့် တရားသူကြီးများ၊ ဥပဒေအရာရှိများ၊ ပြည်သူ့ရဲများ၏ ဂုဏ်သိက္ခာကို လက်ညှိုးထိုးပြီး ရောင်းစားနေကြသူများသည် ဤအမှုပွဲစားများဖြစ်ပါကြောင်း၊ ထို့ကြောင့် တရားရုံးများတွင် အမှုပွဲစားများပပျောက်ရန် မည်ကဲ့သို့ဆောင်ရွက်ထားသည်ကို သိရှိလိုကြောင်း မေးမြန်းပါသည်။