ရေပူစစ်ဆေးရေးဂိတ်၏ ယာဉ်များ စစ်ဆေးရာလမ်းကြောင်း၊ စစ်ဆေးသည့်နေရာများ ယာဉ်သွားလာမှု အဆင်ပြေစေရန် ကောင်းမွန်သောလမ်းများ ခင်းထားပေးရန် အစီအစဉ်ရှိ/မရှိ၊ ယာဉ်စစ်ဆေးရာတွင် တာဝန်ကျဝန်ထမ်းများနှင့် ပြည်သူ့စစ်များ၏ ဆက်ဆံရေးကို ပြုပြင်ပြောင်းလဲလာစေရန် မည်သို့ ဆောင်ရွက်ပေးမည်နှင့် ပြည်ပသို့ တင်ပို့သည့် ပါမစ်ရနွားကားများကို စစ်ဆေးသည့်အထူးအစီအစဉ် များရှိ/မရှိနှင့် စပ်လျဉ်းသည့်မေးခွန်း

ရှမ်းပြည်နယ် (မြောက်ပိုင်း)၊ လားရှိုးခရိုင်၊ သိန္နီမြို့နယ်၊ ပိန်းဆာကျေးရွာအုပ်စု ရေပူစစ်ဆေးရေးဂိတ်ကို ၂၀၁၇ ခုနှစ် နောက်ပိုင်းမှ ပြန်လည်ဖွင့်လှစ်စစ်ဆေးခဲ့ခြင်း၊ အတက်ကားများကို ဂိတ်၏ညာဘက်ခြမ်း၊ အဆင်းကား များကို ဂိတ်၏ဘယ်ဘက်ခြမ်း လမ်းသွယ်များဖြင့် သွားရောက်စစ်ဆေးခံနေရပါကြောင်း၊ လမ်းအူကြောင်း Main လမ်းကို သံဆူးကြိုးများနှင့် ပိတ်ထားသည်ကို တွေ့ရပါကြောင်း၊ မော်တော်ယာဉ်များ အစစ်ဆေးခံရန် သွားသည့်အခါ လမ်းသွယ်များဖြစ်သည့် ညာဘက်ခြမ်းက ချိုင့်ခွက်များ၊ မညီမညာကျောက်ကြမ်းများ၊ လမ်းကြမ်းကြီးဖြစ်နေပါကြောင်း၊ လမ်းကိုမပြုပြင်ဘဲ ဤအတိုင်း မော်တော်ယာဉ်ကားကြီးကားငယ် နေ့စဉ်သွားရောက် အစစ်ဆေးခံနေသည်ကို တွေ့ရပါကြောင်း၊ ပြင်ခဲ့လျှင်လည်း ချိုင့်ခွက်များကို အပေါ်ယံ သဲဖို့ပြီး ရေလောင်း၍ မကြာမီ လမ်းကပြန်လည်ပျက်စီးပြီး ချိုင့်ခွက်များ ပြန်ဖြစ်သွားသည်ကို တွေ့ရပါကြောင်း၊ မိမိထံကို Messenger မှတစ်ဆင့် ချိုင့်ခွက်များမှာ မုန့်လင်မယားကြော်သည့် အုတ်အိုးပမာဖြစ်နေပြီး ကားကြီးကားငယ် ခက်ခက်ခဲခဲ သွားရောက် အစစ်ဆေးခံရသည်မှာ ခရီးသွားပြည်သူများအတွက် နေ့စဉ် စိတ်အနှောင့်အယှက် ဖြစ်နေရကြောင်း၊ လမ်းများ၊ ချိုင့်ခွက်များ၊ အဖုအထစ်များသည် ကားကိုနာစေကြောင်း၊ အစစ်ဆေးခံသည့်အခါ ကားကို မောင်းပြေးစရာအကြောင်းမရှိပါကြောင်း၊ မိမိတို့ကို အနိုင်ကျင့်သကဲ့သို့ ခံစားနေရကြောင်း၊ ရိုးရိုးသားသား ခရီးသွားများကို လုပ်ပိုင်ခွင့်သုံးပြီး စော်ကားနေသည်ဟု ခံစားနေရကြောင်း၊ ရေပူစစ်ဆေးရေးဂိတ်၏ တာဝန်ကျသည့် အချို့ဝန်ထမ်းများ၊ ပိန်းဆာပြည်သူ့စစ်တို့၏ လူထုအပေါ် ဆက်ဆံရေးမှာလည်း ခက်ထန်မာကြောနေသည့် လေသံများရှိကြောင်း၊ တရုတ်ပြည်ကို တင်ပို့သည့် နွားကားများကလည်း တင်ခွင့်ပါမစ်ရထားသော်လည်း ရထားတဲ့ပါမစ် အကန့်အသတ်ထက် ပိုမိုတင်ဆောင်နေသည်ဟု သတင်းထွက်နေကြောင်း၊ ထို့ကြောင့် အထူးစစ်ဆေးသည့် အစီအစဉ်များ လိုအပ်ကြောင်း၊

ထို့ကြောင့် ရေပူစစ်ဆေးရေးဂိတ်၏ ယာဉ်များသွားလာရာ လမ်းကြောင်းစစ်ဆေးသည့် နေရာများကို ယာဉ်သွားလာမှု အဆင်ပြေစေရန် ကောင်းမွန်သောလမ်းများ ခင်းပေးရန် အစီအစဉ်ရှိ/မရှိနှင့် ယာဉ်စစ်ဆေးရာတွင် တာဝန်ကျဝန်ထမ်းများနှင့် ပြည်သူ့စစ်တွေက ဆက်ဆံရေးကို ပြုပြင် ပြောင်းလဲလာစေရန် မည်သို့ဆောင်ရွက်ပေးမည်၊ ပြည်ပသို့တင်ပို့သည့် ပါမစ်ရနွားကားများကို စစ်ဆေးသည့်အခါ အထူးအစီအစဉ်များဖြင့် ပြန်လည်စစ်ဆေးမည့် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။