မကွေးတိုင်းဒေသကြီး၊ မင်းလှမြို့နယ်၊ တောင်ဦးကျေးရွာသည် မင်းလှမြို့နှင့် ၁၀ မိုင်ခန့် အကွာတွင်တည်ရှိပြီး မင်းလှစစ်စနုတ်-ကန်ဒုတ်တို့၏ လမ်းနှင်‌့တစ်မိုင်အကွာတွင် တည်ရှိနေပါကြောင်း၊ လူဦးရေအားဖြင့် ၂၈၃၃ ဦးနှင်‌့ အိမ်ထောင်စုပေါင်း ၇၂၇ စုရှိပါကြောင်း၊ ၂၀၁၇-၁၈ ပညာသင်နှစ်တွင် အထက်တန်းကျောင်းခွဲ တိုးတက်ဖွင့်လှစ်ခဲ့ပြီး ကျောင်းသားဦးရေ ၅၆၇ ဦး ပညာသင်ကြားလျက် ရှိပါကြောင်း၊ ၎င်းဒေသက ပြည်သူများ၏ စီးပွားရေး၊ ပညာရေး၊ ကျန်းမာရေး အစစအရာရာ မင်းလှမြို့ကို မှီခိုအားထားရပါကြောင်း၊ ယခုကဲ့သို့ မှီခိုအားထားရန်အတွက် တောင်ဦးကျေးရွာမှ မင်းလှသို့သွားရာ လမ်းကြီးနှင်‌့ တောင်ဦးကျေးရွာသည် တစ်မိုင်ခန့်ဝေးနေပြီး ထိုရွာ၏အဝင် ရွာနဘေးမှ ဖြတ်သန်း စီးဆင်းနေသော ချောင်းတစ်ချောင်းလည်း ရှိပါကြောင်း၊ အဆိုပါ ချောင်းသည် ချောင်းရေလာချိန် ငါးနာရီနှင့်ခြောက်နာရီအတွင်း ကြာမြင့်နိုင်ပြီး ချောင်းရေ၏ အမြင့်သည် ကိုးပေမှ ၁၀ ပေအထိ တက်လာပါကြောင်း၊ ချောင်းရေကျသွားပြီးဆိုလျှင်လည်း နှစ်ရက်၊ သုံး ရက်ဖြင့်ကားများ၊ ဆိုင်ကယ်များကူးရန် အခက်အခဲများ တွေ့နေရပါကြောင်း၊ ယခုလို အခက်အခဲများ ရှိနေသည့်အတွက် ကုန်စည်သယ်ဆောင်မှုများ အခက်အခဲဖြစ်ရပါကြောင်း၊ အခြေခံစားသောက်ကုန်များ ဈေးကြီးခြင်း၊ နှစ်စဉ်ကြုံတွေ့နေရသည့်  ကိုယ်ဝန်ဆောင်မိခင်များနှင့် မြွေကိုက်လူနာများ၊ အခြားအရေးကြီးလူနာများ၊ ကျောင်းသား/သူများ လွန်စွာအခက်အခဲ ပြဿနာနှင်‌့ နှစ်စဉ်ကြုံတွေ့ နေကြရပါကြောင်း၊ သို့ဖြစ်ပါ၍ အဆိုပါချောင်းအား ချောင်းရေကျော် (သို့မဟုတ်) ကွန်ကရစ်ရေကျော် တံတားတစ်စင်း တည်ဆောက်ပေးပါရန်နှင့် မည်သည့်နှစ်တွင် တည်ဆောက်ပေး မည်ဆိုသည်ကိုလည်း သိရှိလိုပါကြောင်း မေးမြန်းပါသည်။