ကန်ပက်လက်မြို့နယ်အတွင်းရှိ ကျေးရွာများဖြစ်သော ကျင်းဒွေး၊ မှန်တောင်၊ လဲပုံ၊ မကြားအိမ်နူး၊ လုံအိမ်နူး၊ ငွန်းဇိုင်ကျေးရွာအုပ်စုများအတွက် ဖုန်းဆက်သွယ်ရေးနှင့် အင်တာနက်ကွန်ရက်ချိတ်ဆက် အသုံးပြုနိုင်မယ့် ဆက်သွယ်ရေးတာဝါတိုင်များ တည်ဆောက်ပေးရန် အစီအစဉ်ရှိ/မရှိနှင့် စပ်လျဉ်း သည့်မေးခွန်

း

ကန်ပက်လက်မြို့နယ်သည် ကမ္ဘာလှည့်ခရီးသွားများ၊ ပြည်တွင်းခရီးသွားများ လာရောက် လည်ပတ်ကြသော ဟော်နူးဇုန်တောင်၊ ဝိတိုရိယတောင် တည်ရှိရာမြို့ဖြစ်ပါကြောင်း၊ သဘာဝအခြေခံ ခရီးသွားလုပ်ငန်းများအတွက် ရေရှည်ဖွံ့ဖြိုးတိုးတက်ရန်အတွက် အလားအလာကောင်း များစွာရှိသည့် မြို့လည်းဖြစ်ပါကြောင်း၊ ခရီးသွားလုပ်ငန်း ဖွံ့ဖြိုးတိုးတက်ရန် ဆက်သွယ်ရေးတာဝါတိုင်များ အနေဖြင့် အင်တာနက်ကွန်ရက် ချိတ်ဆက်ဆက်သွယ်မှု စနစ်များကောင်းမွန်ရန် အထူးလိုအပ်မည် ဖြစ်ပါကြောင်း၊ လက်ရှိအခြေအနေအရ ကန်ပက်လက်မြို့ပေါ်မှအပ မြို့နယ်တွင်းအခြား မည်သည့်ကျေးရွာမှ ဆက်သွယ်ရေးကွန်ရက် ချိတ်ဆက်မှု မရှိသေးသည်ကို တွေ့ရှိရမည် ဖြစ်ပါကြောင်း၊ ဒေသခံများအနေဖြင့် ဖုန်းဆက်သွယ်ရေးတာဝါတိုင်များ တည်ဆောက်ပေးသည့် သက်ဆိုင်ရာကို အကြိမ်ကြိမ်တောင်းခံခဲ့ကြသော်လည်း ယနေ့အထိ ဖြည့်ဆည်း ဆောင်ရွက်ပေးနိုင်ခြင်း မရှိသေးပါကြောင်း၊ ဝေးလံခက်ခဲပြီး ဖွံ့ဖြိုးတိုးတက်မှုနောက်ကျသော နယ်စပ်ဒေသ တိုင်းရင်းသားများ၏ လူနေမှုဘဝ ပြည်မနှင့်တစ်ပြေးညီ ဖွံ့ဖြိုးတိုးတက်ရန်အတွက် အထူးဦးစားပေး အစီအစဉ်အနေဖြင့် ပြည်ထောင်စုအစိုးရက အလေးထားဖြည့်ဆည်းပေးရန် လိုအပ်မည်ဖြစ်ပါကြောင်း၊ လူဦးရေအချိုးအစားဖြင့် သုံးစွဲသူများ၏ တွက်ခြေကိုက်မှုအပေါ်တွင် အခြေခံပြီး ဆက်သွယ်ရေးတာဝါတိုင်များ တည်ဆောက်ပေးမည်ဆိုပါက ဝေးလံခက်ခဲသည့် ချင်းတိုင်းရင်းသား ဒေသများအတွက် ဆက်သွယ်ရေးဖုန်းလိုင်းများ အဆင်ပြေစေရန် မဖြစ်နိုင်သည့် အခြေအနေကို ဝန်ကြီးဌာနအနေဖြင့် စာနာနားလည်ပေးသင့်ပါသည်ဟု ယူဆပါကြောင်း၊

သက်ဆိုင်ရာဝန်ကြီးဌာနအနေဖြင့် လူဦးရေအချိုးအစားတွက်ချက်မှုအပေါ် အခြေခံ ဖြည့်ဆည်း ပေးခြင်းမျိုးမဟုတ်ဘဲ မြို့နယ်တွင်းသဘာဝ အခြေခံခရီးသွားလုပ်ငန်းများ ဖွံ့ဖြိုးတိုးတက်လာစေရန် ဝေးလံခက်ခဲသည့် ဒေသများတွင် နေထိုင်ကြသော တိုင်းရင်းသားချင်းလူမျိုးများ တိုးတက်ဖြစ်ထွန်းနေသည့် ကမ္ဘာကြီးနှင့်ချိတ်ဆက် အဆက်သွယ်မပြတ်တောက်ရန် တိုင်းရင်းသားများ၏ လူနေမှုဘဝဖွံ့ဖြိုး တိုးတက်ရေးများကို စာနာနားလည်ပြီး အင်တာနက်ချိတ်ဆက် အသုံးပြုနိုင်သည့် ဆက်သွယ်ရေးတာဝါတိုင်များ ဦးစားပေးအစီအစဉ်အနေဖြင့် မဖြစ်မနေ ဆောင်ရွက်ပေးသင့်ပါကြောင်း၊

ထို့ကြောင့် ဝေးလံခက်ခဲပြီး ဖွံ့ဖြိုးတိုးတက်မှုနည်းပါးသော ကျေးလက်တိုင်းရင်းသား ဒေသများတွင် ခက်ခဲကြမ်းတမ်းသည့် လူနေမှုဘဝများ ယနေ့ကမ္ဘာတိုးတက်မှုဖြစ်စဉ်များနှင့် အဆက်သွယ် ပြတ်တောက်နေမှုကို သက်ဆိုင်ရာဝန်ကြီးဌာနမှ စာနာနားလည်ပြီး ဦးစားပေးအနေဖြင့် အမြန်ဆုံး အကောင်အထည်‌ဖော် စုံစမ်းပေးနိုင်ရန် အနူးအညွှတ်မေတ္တာရပ်ခံရင်း ကန်ပက်လက်မြို့နယ်အတွင်းရှိ ကျေးလက်နေ ချင်းတိုင်းရင်းသားပြည်သူများကိုယ်စား မေးမြန်းပါသည်။