(ဆ)-မြန်မာ့ရေပြင်ပိုင်နက်အတွင်း အန္တရာယ်ကြုံတွေ့လာသူများအတွက် လုံခြုံရေးမည်သို့ဆောင်ရွက် ထားသည်ကိုသိလိုခြင်းနှင့် စပ်လျဉ်းသည့်မေးခွန်း
မြန်မာ့ ကမ်းရိုးတန်းအရှည်သည် ရခိုင်ကမ်းရိုးတန်း ၄၄၃ မိုင်၊ ဧရာဝတီ မြစ်ဝကျွန်းပေါ်ဒေသ ကမ်းရိုးတန်း ၂၇၂ မိုင်၊ တနင်္သာရီကမ်းရိုးတန်း ၆၇၀ မိုင် စုစုပေါင်း အရှည်အားဖြင့် ၁၃၈၅ မိုင် ရှည်လျားပါကြောင်း၊ ထို့အပြင် မြန်မာ့ပိုင်နက်ပင်လယ်ရှိ ကျွန်းပေါင်း ၁၀၀၀ ကျော်ရှိသည်ဟုလည်း သိရပါသည်။ မြန်မာ့ပိုင်နက်ပင်လယ်တွင် အခြေခံမျဉ်းမှ ပင်လယ်ဘက်သို့ ရေမိုင် ၁၂ မိုင် ဆက်စပ်ဇုန်တွင်လည်း ပိုင်နက်ပင်လယ်၏ ပြင်ပတွင်ရှိပြီး အခြေခံမျဉ်းမှ ပင်လယ်ဘက်သို့ ရေမိုင် ၂၄ မိုင်၊ ထို့အပြင် သီးသန့်စီးပွားရေးဇုန်မှာလည်း ပိုင်နက်ပင်လယ်ပြင်တွင်ရှိပြီး အခြေခံမျဉ်းမှ မိုင် ၂၀၀ ထိ ကျယ်ဝန်းကြောင်း သိရပါသည်။
မိမိတို့ တနင်္သာရီတိုင်းဒေသကြီး၊ မြိတ်ကျွန်းစုတစ်ခုတည်းတွင် ကျွန်းကြီး၊ ကျွန်းငယ်ပေါင်း ၈၀၀ ကျော်ရှိပါကြောင်း၊ ယခုအခါ နယ်မြေအေးချမ်းလာသည့် အတွက်ကြောင့် ကျွန်းအချို့၌ ဟိုတယ်များ ဆောက်လုပ်ထားပြီး ၎င်းဟိုတယ်များသို့ ပြည်သူများသွား ရောက်လည်ပတ် အပန်းဖြေလျက် ရှိပါကြောင်း၊ ယခုကဲ့သို့ ကျွန်းများကို သွားရောက်အပန်း ဖြေသည့်အခါ ရွက်လှေစီးခြင်း၊ အရှိန်ပြင်း မော်တော်ဘုတ်စီးခြင်း၊ လေဟုန်စီးခြင်းစသည့် ကျွန်းကြီး၊ ကျွန်းငယ်တို့အကြား လှည့်ပတ်သွားလာ လေ့ရှိကြောင်းလည်း သိရပါသည်။ တစ်ဖက်တွင်လည်း မြန်မာ့ပင်လယ်ပြင်တွင် လူမှောင်ခိုကူးခြင်း၊ တရားမဝင် ငါးခိုးဖမ်းခြင်း၊ မူးယစ်ဆေးဝါးမှောင်ခို သယ်သူယူခြင်း၊ အချို့ကျွန်းများပေါ်တွင် တရားမဝင် ဝင်ရောက်နေထိုင်ခြင်းစသည့် ရာဇဝတ်မှုများလည်း ရှိသည်ကိုသိရပါကြောင်း၊ တရားဝင်ငါးဖမ်း လုပ်သူများ၊ ရေလုပ်သားများနှင့် အနားယူအပန်းဖြေ သွားလာကြသည့် ပြည်သူများအတွက် မြန်မာ့ပိုင်နက်ပင်လယ်တွင် အကယ်၍ အန္တရယ်တစ်စုံတစ်ခု ကြုံလာပါက ရှာဖွေကယ်ဆယ်ရေး ပြုလုပ်ရန် အဖွဲ့အစည်းမရှိသေးကြောင်း သိရပါသည်။ သြဂုတ်လ ၂၉ ရက်နေ့တွင် အင်ဒိုနီးရှားနိုင်ငံပိုင် သင်္ဘောတစ်စီးအား ကုန်တင်ယာဉ်သင်္ဘော ကုန်ပစ္စည်းများမရှိတော့ပါကြောင်း၊ သုံးခွမြို့နယ်၊ သမစိတ္တရွာ တရွာအနီးလာပြီး သောင်တင်ခဲ့ပါကြောင်း၊ ၎င်းသင်္ဘောက ယခုအချိန်တွင် နစ်မြုပ်သွားခဲ့ပါကြောင်း၊ အဆိုပါကိစ္စအတွက် မည်ကဲ့သို့ အရေးယူထားသနည်း ဆိုသည်ကို မိမိတို့လေ့လာသည့်အခါ မြန်မာကုန်သည်သင်္ဘော အက်ဥပဒေပုဒ်မ ၂၇၃ အရ အရေးယူထားသည်ဟု သိရပါကြောင်း၊ ထိုပုဒ်မကို လေ့လာကြည့်သည့်အခါ process များ များသည့်အတွက်ကြောင့် မိမိတို့ နိုင်ငံအတွက် အများကြီးငွေကြေးကုန်ကျမည် ဖြစ်ပါကြောင်း၊ ၎င်းသည် ကမ်းခြေစောင့်တပ်မျိုး မရှိသည့်အတွက်ကြောင့် ကမ်းခြေအနီးကိုဝင်လာခြင်း ဖြစ်ပါသည်။ ထို့အပြင် မိမိတို့ ဘိတ်မြို့တွင်ရှိသည့် ခရီးသည်တင် အလည်သွားသော Speed boat တစ်စီးသည်လည်း ၂၃-၁၂-၂၀၁၈ ရက်နေ့တွင် နှစ်နှစ်ရီခန့် နစ်မြုပ်သွားခဲ့ပါကြောင်း၊ အဆိုပါနေရာတွင် မိမိတို့ဘိတ်မြို့က ကယ်ဆယ်ရေးအဖွဲ့များက သွားရောက်ကယ်တင်ကြသော်လည်း အမျိုးသမီးနှစ်ဦး သေဆုံးသည်ကို တွေ့မြင်ခဲ့ရသည့်အကြောင်း သိရပါသည်။ ထို့ကြောင့် အထက်ပါမေးခွန်းကို မေးမြန်းရခြင်းဖြစ်ပါသည်။