(ဃ)-တောင်ဥက္ကလာပမြို့နယ်၊ အမျိုးသမီးနှင့် ကလေးဆေးရုံကြီး ၄ ထပ်ဆောင်အား ၂၀၁၉ ခုနှစ်၊ ဒီဇင်ဘာလမတိုင်မီ အသစ်ဖွင့်လှစ်ပြီး ဆေးကုသရေးလုပ်ငန်းများ စတင်ပေးနိုင်ရန် မည်သို့စီစဉ် ထားသည်ကိုသိလိုခြင်းနှင့် စပ်လျဉ်းသည့်မေးခွန်း
၁၉၆၁ ခုနှစ်က တောင်ဥက္ကလာပမြို့နယ်တွင် အမျိုးသမီးနှင့် ကလေးဆေးရုံကို ဖွင့်လှစ်ခဲ့ပါကြောင်း၊ အမျိုးသမီးနှင့်ကလေး သီးသန့်ဆေးရုံ ဖြစ်သည့်အတွက် ပြည်သူများအလွန် အားကိုးအားထားပြုနေ ရသော ဆေးရုံဖြစ်ပါကြောင်း၊ မြောက်ဒဂုံ၊ အရှေ့ဒဂုံစသည့် မြို့သစ်များပေါ်ပေါက် လာသည့်အတွက် ဆေးရုံသို့လာရောက် ပြသသော လူနာအရေအတွက်လည်း ပိုမိုများပြားလာခဲ့ပါကြောင်း၊ ဆေးရုံမှာ နှစ်ပေါင်း ၅၀ ကျော်ကြာနေပြီဖြစ်ခြင်း၊ လူနာများတဖြည်းဖြည်း များပြားလာခြင်းတို့ကြောင့် ၂၀၁၆ ခုနှစ်မှစတင်၍ လေးထပ်ဆေးရုံ အဆောက်အဦသစ်ကို တိုးချဲ့ဆောက်လုပ်ခဲ့ပါကြောင်း၊ ဆေးရုံ အဆောက်အဦသစ်ကို ၂၀၁၆-၁၇ ဘဏ္ဍာရေးနှစ်မှ စတင်ပြီး ဆောက်လုပ်ခဲ့ရာ မီနီဘတ်ဂျက် အပါအဝင် ဘတ်ဂျက်ကာလ လေးကြိမ်ရရှိခဲ့ပြီး ဆောင်ရွက်နေဆဲ ဖြစ်သော်လည်း ယနေ့အချိန်ထိ လက်စသတ်နိုင်ခြင်း မရှိဘဲဖြစ်နေပါကြောင်း၊ ဆေးရုံအဆောက်အဦ အဟောင်းတွင် သစ်သားကို အခြေခံပြီး ဆောက်လုပ်ထားသည့်အတွက် ဆေးရုံအဆောက်အဦအသစ် ပြီးစီးရန်လည်း လိုအပ်လျက် ရှိပါကြောင်း၊ ၂၀၁၉ ခုနှစ် ဒီဇင်ဘာလမတိုင်မီ ဆေးရုံအဆောက်အဦအသစ်၏ ဆောက်လုပ်ရေး လုပ်ငန်းများပြီးစီးပြီး ကုသရေးလုပ်ငန်းများ စတင်နိုင်ရန်အတွက် ပြည်သူများမှ လိုအား မျှော်လင့်လျက် ရှိပါသဖြင့် တောင်ဥက္ကလာပမြို့နယ်၊ အမျိုးသမီးနှင့် ကလေးဆေးရုံကြီး ၄ ထပ်ဆောင်အား ၂၀၁၉ ခုနှစ်၊ ဒီဇင်ဘာလမတိုင်မီ အသစ်ဖွင့်လှစ်ပြီး ဆေးကုသရေး လုပ်ငန်းများ စတင်ပေးနိုင်ရန် မည်ကဲ့သို့ စီစဉ်ဆောင်ရွက် ထားသည်ကို သိရှိလိုပါကြောင်းဖြင့် မေးမြန်းပါသည်။