မကွေးတိုင်းဒေသကြီး၊ မင်းလှမြို့နယ်သည် မြို့ပေါ်(၆)ရပ်ကွက်ဖြင့် ဖွဲ့စည်းထားပြီး အိမ်ခြေပေါင်း ၂၇၀၀ ရှိပြီး လူဦးရေ ၁၁၁၄၀ ဦးရှိပါကြောင်း၊ ဧရာဝတီမြစ်ကမ်းနဘေးတွင် တည်ရှိသည့်မြို့ဖြစ်ပြီး ရေနံ၊ ကျောက်မီးသွေး၊ ကျောက်စလစ်စသည့် သယံဇာတများ ပေါကြွယ်ဝသည့်မြို့လည်း ဖြစ်ပါကြောင်း၊

ပြည်သူများ သောက်သုံးရေ ပေးဝေရေးကို မြို့နယ်စည်ပင်သာယာရေးအဖွဲ့မှ ဆောင်ရွက်လျက် ရှိသော်လည်း အိမ်သွယ်ရေတိုင်ရေငုတ်ပေးနိုင်မှုမှာ ရေတိုင်ပေါင်း ၈၄၁ တိုင်နှင့် အများသုံးရေတိုင် ၄၇ တိုင်သာ ရေဖြန့်ဝေပေးနိုင်ခဲ့ပါကြောင်း၊ အိမ်ခြေ ၂၇၀၀ အား လွှမ်းခြုံမှုမရှိသည်ကို တွေ့ရပါကြောင်း၊ တစ်မြို့လုံးကို ရေဖြန့်ဝေပေးရန် မြစ်ထဲမှတွန်းတင်သည့် Pontoon စက်ရုံတည်ဆောက်ထားရှိပါကြောင်း၊ မြစ်ထဲမှ ရေများကိုတွန်းတင်ရာတွင် ပင်မရေသိုလှောင်ကန်ကို မရောက်ခင်မှာ ထပ်ဆင့်တွန်း ရေလှောင်ကန်ဖြင့် တစ်ဆင့်ထပ်တွန်းနေရသည့် စက်ရုံဖြစ်ပါကြောင်း၊ ပင်မရေလှောင်ကန်မှ ပြည်သူများကို ရေဖြန့်ဝေပေးလိုက်သည့်အခါ ငါးဂါလံပုံးတစ်ပုံးရရှိရန် တန်းစီစောင့်နေရသည့် အနေအထားမျိုး ဖြစ်ပါကြောင်း၊

သောက်သုံးရေပေးဝေရေးကို မြို့နယ်စည်ပင်သာယာရေးအဖွဲ့က ဆောင်ရွက်ပြီး မြို့ပေါ်ကို ရေလွှမ်းခြုံမှု မရှိခြင်းကြောင့် မြို့ပေါ်ရပ်ကွက်(၆) ရပ်ကွက်မှာ တစ်ရက်ခြားစီ အလှည့်ကျဖြင့် ဖြန့်ဝေနေရပါကြောင်း၊ ဖြန့်ဝေပေးသည့် အချိန်နာရီကလည်း တစ်နာရီ၊ တစ်နာရီခွဲခန့်သာ ပေးဝေနိုင်ပါကြောင်း၊ သွယ်တန်းထားသည့် ရေပိုက်များ၊ သွယ်တန်းမှုစနစ်များ၊ ရေလှောင်ကန်များမှာ ၁၉၇၂ ခုနှစ် ၁၉၇၃ ခုနှစ်ပတ်ဝန်းကျင်လောက်က တည်ဆောက်ခဲ့သည့် သံပိုက်များ၊ ရေသွယ်စနစ်များဖြစ်သောကြောင့် မြို့ပေါ်ရပ်ကွက်အားလုံးကို လွှမ်းခြုံမှုမရှိပါကြောင်း၊ ရေလိုအပ်ချက်မှာ တစ်နေ့လျှင် ရေဂါလံပေါင်း ၂၉၇၀၀၀ လိုအပ်မည်ဖြစ်ပြီး ဖြန့်ဝေပေးနိုင်မှုမှာ  ၂၂၈၆၀၀ ဂါလံသာ ရရှိပါကြောင်း၊

သောက်သုံးရေဖူလုံလျှင် ပြည်သူအများ ကျန်းမာရေးကောင်းမွန် တိုးတက်လာနိုင်သကဲ့သို့ ပြည်သူ့လုပ်အားများလည်း တိုးတက်လာမည်ဖြစ်ပြီး ကျန်းမာရေးကုန်ကျစရိတ်လည်း လျော့ကျသွားမည် ဖြစ်ပါကြောင်း၊ မိမိအနေဖြင်‌့ စည်ပင်သာယာရေးအမှုဆောင်အရာရှိ၊ စည်ပင်ဥက္ကဋ္ဌများနှင်‌့အဖွဲ့ဝင်များ၊ မြို့ပေါ်ရပ်မိရပ်ဖများ၊ မြို့နယ်အုပ်ချုပ်ရေးမှူးတို့နှင့် တိုင်ပင်ညှိနှိုင်းဆွေးနွေးခဲ့ရာ နောက်ထပ်မြစ်ရေတင် တစ်ခု ရေလှောင်ကန်များ၊ သွယ်တန်းမှုများ တိုးချဲ့ဆောင်ရွက်မှသာလျှင် သောက်သုံးရေလွှမ်းခြုံမှု ရရှိနိုင်ကြောင်း တင်ပြလာပါကြောင်း၊ ခန့်မှန်းခြေ သိန်း ၂၀၀၀ ခန့်ကုန်ကျမည်ဟု စည်ပင်အင်ဂျင်နီယာ တွက်ချက်မှုအရ သိရှိရပါကြောင်း၊ မြို့တော်စည်ပင်သာယာရေးအဖွဲ့ အနေဖြင့် ဆောင်ရွက်နိုင်ခြင်း မရှိကြောင်းလည်း တင်ပြလာပါကြောင်း၊           မိမိတင်ပြခဲ့သလို ဧရာဝတီမြစ်ကမ်း နဘေးမှာ တည်ရှိနေသောမြို့၊ သယံဇာတပေါကြွယ်ဝသောမြို့၊ ပြည်သူများသောက်သုံးရေ မလုံမလောက် အခက်အခဲဖြစ်နေရခြင်းမှာ လုံးဝမဖြစ်သင်‌့ပါကြောင်း၊ မိမိတို့မြို့မှာ တိုင်းဒေသကြီးရန်ပုံငွေနှင့် ၂၅ မြို့နယ်တွင် နိုင်ငံတော်အခွန်ဘဏ္ဍာအများဆုံး ဦးဆောင်ထားသည့်မြို့လည်း ဖြစ်ပါကြောင်း၊ သို့ဖြစ်ပါ၍ ပြည်သူများသောက်သုံးရေ လုံလောက်မှုရှိစေရန် တိုးချဲ့မြစ်ရေတင်ဖြန့်ဖြူးရေး တစ်ခုဆောင်ရွက် ပေးနိုင်ခြင်း ရှိ/မရှိ သိရှိလိုကြောင်း မေးမြန်းပါသည်။