ချင်းပြည်နယ်၊ ထန်တလန်မြို့နယ်တွင် ချင်းလူမျိုး၊ ခရစ်ယာန်ဘာသာဝင်များ အများဆုံးနေထိုင်ကြပြီး လူမှုစီးပွားရေး အလွန်နိမ့်ကျသော မြို့နယ်ဖြစ်ပါကြောင်း၊ မြို့နယ်အတွင်းနေထိုင်သော ရပ်ဖိရပ်ဖ၊ ဘာသာရေး ခေါင်းဆောင်များနှင့် အခြားလူမှုရေး အသင်းအဖွဲ့အစည်းများ၏ ဆုံးဖြတ်ချက်အရ ၁၄-၄-၂၀၀၅ ရက်နေ့တွင် အရက်ကာကွယ်တိုက်ဖျက် နှိမ်နင်းပေးရန် သက်ဆိုင်ရာသို့ တောင်းဆိုတင်ပြ ခဲ့ကြပြီး အထက်ရုံး၏ခွင့်ပြုချက်အရ ၂၀၀၆ ခုနှစ်မှ ၂၀၀၈ ခုနှစ်အထိ ထန်တလန်မြို့တွင် အရက်ရောင်းချခြင်း တားမြစ်ပိတ်ပင်ပေးခဲ့သော်လည်း ၂၀၀၈ ခုနှစ်မှ ၂၀၁၅ ခုနှစ်အတွင်း အစိုးရ၏ သက်ဆိုင်ရာဌာနမှ ယစ်မျိုးလိုင်စင်ကို မယူမနေရဟု ညွှန်ကြားလာပါသဖြင့် တစ်နှစ်လျှင် ၂၄ သိန်း ကျပ်နှုန်းဖြင့် ခုနစ်အတွင်း သိန်း ၂၀၀ ကျော်ကို ခရစ်ယာန်အသင်းတော်များမှ ပေးသွင်းခဲ့ရပါကြောင်း၊ အရက်သယ်ယူခြင်း၊ ရောင်းဝယ်ခြင်း၊ သောက်သုံးခြင်းများကို အုပ်ချုပ်ရေးအဖွဲ့အစည်းများ၊ ဘာသာရေး ခေါင်းဆောင်များ၊ လူထုအင်အား၊ လူငယ်အင်အားများ ပူးပေါင်းပြီး တားဆီးကာကွယ် နှိမ်နင်းနိုင်ခဲ့သဖြင့် ဒေသအတွင်း ပြဿနာနည်းပါး၍ အေးချမ်းတည်ငြိမ်မှု ရရှိခဲ့ပါကြောင်း၊ သို့ရာတွင် ယစ်မျိုးလိုင်စင် ဈေးနှုန်းမှာ တစ်နှစ်ထက်တစ်နှစ် ပိုမိုမြင့်တက်လာပြီး ခရစ်ယာန်ဘာသာရေး အသင်းတော်များသည် ငွေရေးကြေးရေးအခက်အခဲများ ရှိလာခြင်းကြောင့် လိုင်စင်ကို သက်ဆိုင်ရာသို့ ပြန်လည်အပ်နှံခဲ့ကြပါကြောင်း၊ ၂၀၁၅ ခုနှစ်မှ ၂၀၁၈ ခုနှစ်အတွင်း ထန်တလန်မြို့နယ်တွင် သက်ဆိုင်ရာမှ အရက်လိုင်စင်များကို ပုဂ္ဂလိကများထံသို့ ပြန်လည်ချပေး၍ လွတ်လပ်စွာ ရောင်းချခြင်းကြောင့် သောက်သုံးသူ လူငယ်များသည် ကျန်းမာရေးထိခိုက်ခြင်း၊ အကျင့်စာရိတ္တ ပျက်စီးခြင်း၊ မိသားစုအတွင်း မလိုလားအပ်သော ပြဿနာအမျိုးမျိုး ဖြစ်လာခြင်း၊ ရပ်ရွာတည်ငြိမ် အေးချမ်းရေးကိုပါ ထိခိုက်လာခြင်းအပြင် အသက်ဆုံးရှုံးမှုများအထိ ဝမ်းနည်းစွာကြုံတွေ့လာကြ ပါကြောင်း၊ ယခုကဲ့သို့ ဖြစ်လာရခြင်းအကြောင်းရင်းမှာ ထန်တလန်မြို့နယ်ရှိ ဒေသခံချင်းအမျိုးသား အများစုသည် အလုပ်အကိုင်အခွင့်အလမ်း နည်းပါးခြင်း၊ လူမှုစီးပွားဘဝနိမ့်ကျခြင်း၊ ပညာတတ် နည်းပါး၍ ပညာအရည်အချင်းနိမ့်ကျခြင်း၊ အထွေထွေဗဟုသုတ နည်းပါးခြင်းတို့ကြောင့် အရက် တရားဝင် ရောင်းချသည်ကို အခွင့်ကောင်းယူပြီး လွတ်လပ်စွာအလွန်အကျွံ သောက်သုံးကြသည်ကို တွေ့ရှိရပါကြောင်း၊ စီးပွားရေးနိမ့်ကျမှုကြောင့် အရည်အသွေးညံ့ဖျင်းသော အရက်များကိုသာ သောက်ကြခြင်း၊ အရက်၏အရည်အသွေး၊ အမျိုးအစားများသည် သတ်မှတ်ချက်ပါအတိုင်း ရောင်းချခြင်းရှိ/မရှိ၊ သယ်ဆောင်သူ၊ ရောင်းသူ၊ ဝယ်သူ၊ သောက်သုံးသူများအတွက် ကန့်သတ်ချက် စည်းကမ်းရှိ/မရှိကို လိုင်စင်ထုတ်ပေးသည့်ဌာနမှ စောင့်ကြည့်ကွပ်ကဲပေးခြင်း မရှိကြောင်းကိုလည်း ကြားသိရပါကြောင်း၊ ဤကဲ့သို့ ယစ်မျိုးလိုင်စင်ထုတ်ပေးသည့် ၂၀၁၅ ခုနှစ်မှ ၂၀၁၈ ခုနှစ် သုံးနှစ်အတွင်း အရက်ကြောင့်သေဆုံးသူ ၅၃ ယောက်ရှိပြီး ကြိုးဆွဲချသေဆုံးသူ နှစ်ယောက်ရှိသည်ကို ရင်နာစွာ ခံစားခဲ့ကြကြောင်း ခရစ်ယာန်အသင်းတော်များ၏ မှတ်တမ်းအရ သိရှိရပါကြောင်း၊ စိုးရိမ်ဖွယ် မြင့်မားစွာဖြစ်ပေါ်နေသော အရက်အန္တရာယ်ကို ဒေသခံပြည်သူလူထုများ ရင်တထိတ်ထိတ် ဖြစ်နေကြ ပါကြောင်း၊ သို့ဖြစ်ပါ၍ ဒေသခံပြည်သူများသည် အရက်ကာကွယ်တားဆီး နှိမ်နင်းခြင်းကို ထိရောက်စွာ အရေးယူ ဆောင်ရွက်ပေးပါရန် လိုလားတောင့်တနေကြပါသဖြင့် ချင်းပြည်နယ်၊ ထန်တလန် မြို့နယ်တွင် တရားဝင်ခွင့်ပြုချက်ပေး၍ လုပ်ကိုင်စေသော ယစ်မျိုးလိုင်စင် ချထားပေးခြင်းများအား အပြီးတိုင် ပိတ်သိမ်းပေးရန် အစီအစဉ်ရှိ/မရှိ၊ အစီအစဉ်မရှိပါက ရောင်းဝယ်ဖောက်ကား နေခြင်းများအား သတ်မှတ်ထားသော စည်းကမ်းချက်ပါအတိုင်း လုပ်ဆောင်စေရန်နှင့် စောင့်ကြည့် ကွပ်ကဲပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။