(က)-ဗဟန်းမြို့နယ်၊ လူဝင်မှုကြီးကြပ်ရေးနှင့် ပြည်သူ့အင်အားဦးစီဌာန အဆောက်အဦသည် ပျက်စီးယိုယွင်းနေပါသဖြင့် ပြန်လည်ပြုပြင်ပေးရန် သို့မဟုတ် နေရာအသစ်တစ်ခုသို့ပြောင်းရွှေ့ပေးရန် အစီအစဉ် ရှိ/မရှိနှင့်စပ်လျဉ်းသည့်မေးခွန်း
ဗဟန်းမြို့နယ်၊ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန အဆောက်အဦသည် ဗိုလ်ချို (၁) ရပ်ကွက်၊ ဝင်္ကပါလမ်း၊ အမှတ် (၄) ပြန်ကြားရေးဝန်ကြီးဌာနပိုင် ရုံးအတွင်းတည်ရှိပြီး အလျား ၇၅ ပေ၊ အနံ ၂၅ ပေ၊ အမြင့် ၁၂ ပေရှိ သွပ်မိုးပျဉ်ကာ အဆောက်အဦ၏ အပေါ်ထပ်တွင် ရုံးခန်းအဖြစ် ၁၉၅၈ ခုနှစ်ကတည်းက ဖွင့်လှစ်အသုံးပြုခဲ့ပါကြောင်း၊ ယခုအခါ ယင်းအဆောက်အဦသည် နှစ်ပေါင်းများစွာ ကြာမြင့်လာသည့်အတွက် ဟောင်းနွမ်းပျက်စီးပြီး လေဒဏ်/မိုးဒဏ်ခံနိုင်ရည် အားနည်းခြင်းကြောင့် အန္တရာယ်ရှိသည့် အဆောက်အဦ ဖြစ်နေပါကြောင်း၊ မြေနေရာသည်လည်း ပြန်ကြားရေးဝန်ကြီး ဌာနပိုင် ဖြစ်နေသောကြောင့် ယင်းအဆောက်အဦ၏ အောက်ထပ်တွင် ပြန်ကြားရေးဝန်ကြီးဌာနမှ ဝန်ထမ်းမိသားစုများ နေထိုင်လျက်ရှိပါကြောင်း၊
ယင်းအဆောက်အဦကို ပြည်သူများနေ့စဉ်သွားလာ ဆောင်ရွက်ရာတွင် အန္တရာယ်ရှိနေခြင်း၊ လေဒဏ်၊ မိုးဒဏ်ခံနိုင်ရန် အားနည်းနေခြင်း၊ ရုံးမှတ်တမ်း၊ စာရွက်စာတမ်းများထားသိုရန် အခက်အခဲ ရှိနေခြင်းတို့ကြောင့် ပြန်လည်ပြုပြင်ပေးရန် သို့မဟုတ် နေရာအသစ်တစ်ခုသို့ ပြောင်းရွှေ့ပေးရန် အစီအစဉ် ရှိ/မရှိ သိရှိလိုပါကြောင်း မေးမြန်းပါသည်။