ပြည်ထောင်စုမြန်မာနိုင်ငံတစ်ဝန်း တပ်ဆင်သွယ်တန်းထားကြသော ဆက်သွယ်ရေးကြိုးလိုင်းများ၊ အင်တာနက်ကွန်ရက်ဖိုက်ဘာလိုင်းများသည် တရားဥပဒေနှင့်ညီညွတ်မှုရှိ/မရှိ၊ အဆိုပါကြိုးလိုင်း များအား ဖြုတ်သိမ်းရွှေ့ပြောင်းရန် လိုအပ်လာသည့်အခါ မည်သည့်အဖွဲ့အစည်းတွင် တာဝန်ရှိသည်ကို သိရှိလိုခြင်းနှင့် နိုင်ငံပိုင်ဓာတ်အားတိုင်များတွင် သွယ်တန်းထားမှုကြောင်‌့ လျှပ်စစ်နှင့်အခြားအန္တရာယ် ကင်းရှင်းရန် မည်ကဲ့သို့အမြန်ဆုံးအရေးယူ ဆောင်ရွက်ပေးမည်ကိုသိလိုခြင်းနှင့် စပ်လျဉ်းသည့်မေးခွန်း

မိမိတို့ပတ်ဝန်းကျင်တွင် နိုင်ငံပိုင်လျှပ်စစ်ဓာတ်အားလိုင်းများ သွယ်တန်းသည့် ဓာတ်တိုင်များတွင် လည်းကောင်း၊ သီးခြားလိုင်းများတွင် လည်းကောင်း အင်မတန်မှ ရုပ်ဆိုးအကျည်းတန်သော တယ်လီဖုန်းလိုင်းများ၊ အင်တာနက်လိုင်းများ သွယ်တန်းထားခြင်းများကို ရှင်းလင်းဆောင်ရွက်နိုင်ရေး မြို့နယ်/ခရိုင်/တိုင်းဒေသကြီး အဆင့်ဆင့်တာဝန်ရှိ ပုဂ္ဂိုလ်များကို စုံစမ်းမေးမြန်းသည့်အခါ ပြည်ထောင်စုအစိုးရအဖွဲ့၏ ခွင့်ပြုချက်ဖြင့်သာ လုပ်ခြင်းဖြစ်ကြောင်း၊ ၎င်းတို့လည်း အသေးစိတ် မသိကြောင်း၊ ညွှန်ကြားချက်အရသာ ဆောင်ရွက်နေခြင်းဖြစ်ကြောင်း အကြောင်းပြန်ကြား လာပါသည်။ ထို့အတွက်ကြောင့် အဆိုပါကိစ္စများကို ဖြေရှင်းရန် ဥပဒေ၊ နည်းဥပဒေ၊ ညွှန်ကြားချက်၊ စာချုပ်များ၊ လုပ်ထုံးလုပ်နည်းများကို လေ့လာကြည့်သည့်အခါ ဝမ်းနည်းစရာကောင်းသည်က ၂၀၁၄ ခုနှစ် ပြည်ထောင်စုလွှတ်တော်က အတည်ပြုခဲ့သည့် လျှပ်စစ်ဥပဒေသည် ယကနေ့အထိ နည်းဥပဒေ မရှိသေးခြင်း ဖြစ်ပါကြောင်း၊ ထို့ကြောင့် တာဝန်ရှိပုဂ္ဂိုလ်များ နည်းဥပဒေများ ရေးဆွဲရေးအတွက်ကို တိုက်တွန်းလိုပါကြောင်း၊

၂၀၁၇ ခုနှစ် နိုဝင်ဘာလတွင် ဆက်သွယ်ရေးဦးစီးဌာနက စံချိန်စံညွှန်း သတ်မှတ်ချက်များကို ညွှန်ကြားချက် တစ်ရပ်အနေဖြင့် ထုတ်ပြန်ခဲ့သည့်ကို တွေ့ရှိရပါကြောင်း၊ အလားတူ ယခုကဲ့သို့ ကိစ္စမျိုးအတွက် သက်ဆိုင်ရာလျှပ်စစ်အဖွဲ့ အစည်းများက ကုမ္ပဏီများနှင့် စာချုပ်များချုပ်ဆို ဆောင်ရွက်ခဲ့ခြင်းကိုလည်း တွေ့ရှိရပါသည်။ ကုမ္ပဏီတစ်ခု၏ သဘောတူစာချုပ်တွင်ဆိုလျှင် ဖန်ပြင်ကြေးနန်းကြိုး တပ်ဆင်ချိတ်ဆွဲခွင့်ဆိုသည့် အပိုဒ် ၅ (၂) တွင် လျှပ်စစ်ဓာတ်အား ဖြန့်ဖြူးရေး တိုင်တစ်တိုင်ပေါ်တွင် ဖန်ပြင်ကြေးနန်းကြိုး သုံးချောင်းအထိသာ အများဆုံးတပ်ဆင် သုံးစွဲခွင့်ပြုမည် ဖြစ်ပါကြောင်း၊ လျှပ်စစ်ဓာတ်အား ဖြန့်ဖြူးရေးတိုင် တစ်တိုင်ပေါ်တွင် ခွင့်ပြုပေးထားသူ တစ်ဦး၏ Telecom Note တပ်ဆင်ချိတ်ဆွဲ ထားပြီးဖြစ်ပါက မည်သူမျှထပ်မံတပ်ဆင် ချိတ်ဆွဲခြင်း မပြုဟုလည်း ဆိုထားပါကြောင်း၊ အပိုဒ် ၅ (၃) တွင်  အကယ်၍ လျှပ်စစ်ဓာတ်အား ဖြန့်ဖြူးရေးတိုင်ပေါ်တွင် ဖန်ပြင်ကြေးနန်းကြိုး သုံးချောင်းအထိသာ တပ်ဆင်ချိတ်ဆွဲ ထားရမည်ဖြစ်ပြီး အခြားမည်သူမျှ ထပ်မံချိတ်ဆွဲခြင်းမပြုရဟု ဆိုထားပြန်ပါကြောင်း၊ ညွှန်ကြားချက်အပိုဒ် ၂ အပိုဒ်ခွဲ (က) အပိုဒ်ခွဲငယ် ၂ တွင်လည်း ယခုလို တင်ပြထားပါကြောင်း၊

သို့သော်လည်း အပိုဒ် ၇ (၄) တွင် ဓာတ်တိုင်များပြင်ရန် လျှပ်စစ်လုပ်ငန်းအရ ပြင်မည်၊ လဲမည်ဆိုလျှင် ခုနကသွယ်တန်းထားသော ကြိုးများကို မိမိစရိတ်ဖြင့် အချိန်မီဖြုတ်သိမ်းပေးရန်လည်း သဘောတူ ထားကြပါကြောင်း၊ နောက်တစ်ခါ အပိုဒ် ၇ (၆) တွင်လည်း အချိန်မီလာမဖယ်လျှင် လျှပ်စစ်ဌာနက မိမိကိုယ်တိုင် ဖယ်ခွင့်ရှိကြောင်းနှင့် စရိတ်ကိုလည်း ဆက်သွယ်ရေးသမားက ပေးချေရမည် ဖြစ်ပါကြောင်း သဘောတူထားသည်ကို တွေ့ရှိရပါကြောင်း၊ ချတ်ဆွဲခွင့်ရသူ၏ တာဝန်များပါသည့် စာပိုဒ် ၉ တွင် စိတ်ဝင်စားစရာတစ်ခုကို တွေ့ရှိရမည်ဖြစ်ပါကြောင်း၊ အပိုဒ် ၉ (၂) တွင် မီးရထားလမ်းကူး၊ လမ်းကျော်များနှင့် သီးခြားတိုင်ထားရန်၊ အမြင့်ကို ၂၁ ပေထားရန်၊ လိုအပလျှင် တိုင်လဲရန်၊ ကျန်သည့်နေရာများတွင်လည်း အနည်းဆုံး ၁၈ ပေရှိရန် စည်းကမ်းသတ်မှတ် ထားပါကြောင်း၊ ၂၁ ပေ၊ ၁၈ ပေဆိုသည့် ဆက်သွယ်ရေး၏ ညွှန်ကြားချက်အပိုဒ် ၂ အပိုဒ်ခွဲ (က) အပိုဒ်ခွဲငယ် ၁၄ တွင် တင်ပြဖော်ပြထားခြင်း ဖြစ်ပါကြောင်း၊ အပိုဒ် ၉ (၆) တွင် ယာဉ်ကြောင့် တိုက်ခိုက်မှုများ ဖြစ်လာလျှင် ဓာတ်အားပြဿနာများအတွက် လိုအပ်သည်များကို ဆက်သွယ်ရေး သမားကပြင်ပေးရန်၊ နစ်နာမှုများလျော်ပေးရန် စသည်ဖြင့်ရေးသား ထားပါကြောင်း၊ တစ်ခါ ဆက်သွယ်ရေးကဏ္ဍ၏ ညွှန်ကြားချက်အပိုဒ် ၂ အပိုဒ်ခွဲ (က) အပိုဒ်ခွဲငယ် ၁၇ တွင်လည်း ဖန်ပြင်ကြေးနန်း ကြိုးများဆက်သွယ်၍ဖြစ်ဖြစ်၊ အများပြည်သူက ဝင်တိုက်၍ဖြစ်ဖြစ် လျှပ်စစ်စနစ်ကို ထိခိုက်မည်ဆိုလျှင် နစ်နာမှုအတွက် ချက်ချင်းကုစားပေးရန် ဆက်သွယ်ရေး ဆောင်ရွက်သူမှာ အပြည့်အဝ တာဝန်ရှိကြောင်း ဖော်ပြထားပါသည်။ မိမိမဲဆန္ဒနယ်မြေတွင် ဆက်သွယ်ရေး ပစ္စည်းများကို တပ်ဆင်ရင်းမီးပြတ်ပါသည်။ မီးပြတ်သည့်အခါ ပြည်သူလူထုက စိတ်ပူသည့်အတွက် နောက်နောင် တပ်ဆင်သည့်သူများ လာသည့်အခါ ရပ်ကွက်ထဲတွင် တင်းမာမှုများ မကြာခဏ ဖြစ်ရပါကြောင်း၊ တစ်ခါမိမိနယ်မြေတွင် ကြုံတွေ့ရသည်မှာ လမ်းထိပ်ကဓာတ်တိုင်ကို လာတပ်ဆင်သည့် သူများကို တာဝန်ရှိသော ပုဂ္ဂိုလ်များက တွေ့ဆုံမေးမြန်းသည့်အခါ မြန်မာစကား မပြောတတ်သည့် တိုင်းရင်းသားစကားလည်း မဟုတ်သောသူနှင့် ရင်ဆိုင်တိုးရပါကြောင်း၊ အဆိုပါ နိုင်ငံခြားသားများက မိမိတို့၏ လျှပ်စစ်ပစ္စည်းများ၊ ဆက်သွယ်ရေးပစ္စည်းများကို မည်ကဲ့သို့သော ယုံကြည်မှုဖြင့် လုပ်ကိုင်ခွင့်ပြုထားသနည်းနှင့် မိမိတို့ပြည်သူများက မည်ကဲ့သို့ယုံကြည်မှုမျိုး ရမည်မှာ စဉ်းစားစရာတစ်ခု ဖြစ်ပါကြောင်း ထို့ကြောင့်အထက်ပါ မေးခွန်းကိုမေးမြန်းရခြင်း ဖြစ်ပါသည်။