(ဂ)-သက်ဆိုင်ရာတရားရုံးများသို့ သက်သေထွက်ဆိုရန် သွားရောက်ကြရသည့် သက်သေများအတွက် သက်သေစရိတ်ကို အမှန်ကုန်ကျစရိတ်အတိုင်း ထုတ်ပေးနိုင်ခြင်းရှိ/မရှိနှင့် စပ်လျဉ်းသည့်မေးခွန်း
သက်ဆိုင်ရာတရားရုံးများသို့ သက်သေထွက်ဆိုရန် သွားရောက်ကြရသည့် သက်သေများအတွက် သက်သေစရိတ်ကို အမှန်ကုန်ကျစရိတ်အတိုင်း ထုတ်ပေးနိုင်ခြင်းရှိ/မရှိနှင့် သက်သေစရိတ်ပြတ်လပ် ခြင်းမရှိအောင် ဆောင်ရွက်ပေးနိုင်ခြင်းရှိ/မရှိနှင့် စပ်လျဉ်းသည့်မေးခွန်း
မြန်မာ့လူ့အဖွဲ့အစည်းသည် ရိုးရှင်းသည့်လူနေမှုဘဝကို နှစ်သက်တန်ဖိုးထားကြသော လူ့အဖွဲ့အစည်း ဖြစ်ပါကြောင်း၊ အေးဆေးစွာနေထိုင်တတ်သည့် စရိုက်၊ လက္ခာဏာရှိပြီး ရုံးပြင်ကနားနှင့် ဆက်ဆံလိုသူများ မဟုတ်သလို ဆက်ဆံတတ်ကြသူများလည်း မဟုတ်ပါကြောင်း၊ အထူးသဖြင့် အခြားရုံးများထက် တရားရုံးများကို ပိုပြီးကြောက်ရွံ့တတ်ကြသည့် သဘောလည်း တွေ့ရပါကြောင်း၊ သို့သော်လည်း အကြောင်းအားလျော်စွာ သက်သေအဖြစ်နဲ့တရားရုံးကို သွားရောက်ကြရတဲ့ ပြည်သူတွေရှိသလို နိုင်ငံတော်၏ သက်သေအဖြစ်တရားရုံးကို အားတတ်သရော သွားရောက် သက်သေခံချက် ထွက်ဆိုကြသည့် ပြည်သူများလည်း ပြောင်းလဲလာသည့် နိုင်ငံရေးဖြစ်စဉ်များအပေါ် မူတည်ပြီးမှ ပေါ်ပေါက်လာပါကြောင်း၊ တချို့သက်သေများသည် သက်သေစရိတ်တရားရုံးက ထုတ်ပေးခြင်းဆိုသည်မှာ မိမိကိုယ်ကိုယ်မိမိ မသိကြပါကြောင်း၊ ၎င်းမှာ သက်သေနှစ်မျိုး ဖြစ်ပေါ်လာသည်ဟု ထင်ပါကြောင်း၊ ပထမတစ်မျိုးက မလွဲသာမရှောင်သာဖြစ်သည့် သက်သေဖြစ်ပြီး၊ ဒုတိယတစ်မျိုးက ပြည်သူတို့၏ အေးချမ်းသာယာရေး၊ တရားဥပဒေစိုးမိုးရေး၊ ပြည်သူများ၏ ကာယစိတ်ဓာတ် အေးချမ်းလုံခြုံရေးတို့အတွက် အဂတိတရားကင်းရှင်းစွာဖြင့် နိုင်ငံတော်ကို အကူအညီ ပေးနေကြသည့် သက်သေများ ဖြစ်ကြပါကြောင်း၊ မည်သို့ပင်ဖြစ်စေ သက်သေနှစ်မျိုး စလုံးသည် တရားဥပဒေစိုးမိုးရေးအတွက် အရေးပါသော အစိတ်အပိုင်းများ ဖြစ်ကြပါကြောင်း၊
ဒုတိယတစ်မျိုးတည်းမှာ မိမိ၏မဲဆန္ဒနယ်မြေထဲက မူးယစ်ဆေးဝါးတားဆီးနှိမ်နင်းရေးအဖွဲ့က ပုဂ္ဂိုလ်များ ပါဝင်နေပါကြောင်း၊ ထိုအဖွဲ့သည် မိမိတို့ကျေးရွာ၊ မိမိတို့ပတ်ဝန်းကျင်ကျေးရွာများတွင် မူးယစ်ဆေးဝါးကို အလွယ်တကူ ဝယ်ယူရရှိနိုင်သည့် အခြေအနေများကြောင့် လူငယ်၊ လူလတ်ပိုင်းများ ပျက်စီးနေခြင်းများ၊ လူသားအရင်းအမြစ်များ ဆုံးရှုံးနေရခြင်းများ၊ မူးယစ်ဆေးဝါးနှင့် ဆက်နွှယ်နေသည့် ရာဇဝတ်ပြစ်မှုများကြောင့် ရပ်ရွာအေးချမ်းသာယာမှု မရှိခြင်းများ၊ မူးယစ်ဆေးဝါးကြောင့် ဖြစ်ပေါ်လာသော HIV ကူးစက်ရောဂါမှအစ လူမှုဒုက္ခအမျိုးမျိုးကို ကြုံတွေ့သိမြင် ခံစားနေကြရခြင်းများကြောင့် မူးယစ်ဆေးဝါးတားဆီး နှိမ်နင်းရေးအဖွဲ့ကို ဖွဲ့စည်းပြီး ကိုယ့်စရိတ်နှင့်ကိုယ် ကိုယ်တိုင်သတင်းထောက် လှန်းရဲနှင့်ပူးပေါင်းပြီးဖမ်းခြင်း၊ အများနှင့်ဆိုင်သည့် နေရာများတွင် ကိုယ်တိုင်ဖမ်းပြီး ရဲကိုအပ်ခြင်း စသဖြင့်လုပ်ဆောင်လာခြင်းများသည် ၂၀၁၈ ခုနှစ် အကုန်တွင် အမှုပေါင်း ၅၆ မှုရှိပြီး ၂၀၁၉ ခုနှစ်ထဲတွင် ၁၁ မှု ရှိပါကြောင်း၊ နောက်ဆုံးပိုင်ရှင်မဲ့ ဖမ်းဆီးရရှိခဲ့ခြင်းသည် ဘိန်းဖြူ ၆.၆ ကီလိုဂရမ် တန်ဖိုးအားဖြင့် ကျပ်သိန်းပေါင်း ၆၀၀၀ ခန့်နှင့် ကားတစ်စီးကို ဖောက်ပြင်နှင့် ပင်လယ်ဘူးအဖွဲ့နှစ်ဖွဲ့ ချိတ်ဆက်ပြီး ဖမ်းဆီးရရှိခဲ့မိပါကြောင်း၊
မူးယစ်ဆေးဝါးစာရင်းနှင့် မူးယစ်မှုစာရင်း နောက်ဆုံးဖမ်းမိသည့် ပစ္စည်းများကို အဆိုပါအဖွဲ့ဝင်များက ခရိုင်မှူးအတွက် ခရိုင်တရားရုံးကို သွားရောက်ပြီး သက်သေခံထွက်ဆို ကြရသည့်အခါ လမ်းခရီးအခြေအနေအရ နှစ်ညအိပ်၊ သုံးရပ်အထိ ကြာတက်ပါကြောင်း၊ ဖောင်းပြင်၊ မော်လိုက် မိုင် ၇၀ သာ ဝေးသော်လည်း အမြန်ရေယာဉ်ဖြင့် သွားမှသာအဆင်ပြေပါကြောင်း၊ ခရီးစရိတ်နှင့်နေထိုင် တည်းခိုစရိတ် စုစုပေါင်း ကျပ် ၃၀၀၀၀ ခန့် ဝန်းကျင်ကုန်ပါကြောင်း၊ သက်သေစရိတ်က ကျပ် ၁၁၀၀၀ မှ ၁၆၀၀၀ အထိ ရရှိသည်ဟု ဆိုပါကြောင်း၊ ၎င်းတို့အနေဖြင့် သက်စွန့်ကြိုးပမ်း အများအကျိုး ဆောင်ခြင်းသည် ရေရှည်မှာ ကိုယ့်ဒုက္ခကိုယ်ရှာရသကဲ့သို့ ဖြစ်နေကြပါကြောင်း၊ ထု့ိကြောင့် မေးမြန်းလိုသည်မှာ (၁) လုံလောက်သည့် သက်သေစရိတ်ကို ထုတ်ပေးနိုင်ရန်နှင့် (၂) ငွေပြတ်လပ်ခြင်း မရှိအောင် ဆောင်ရွက်ပေးနိုင်ခြင်းရှိ/မရှိ မေးမြန်းပါသည်။