ပို့ဆောင်ရေးနှင့်ဆက်သွယ်ရေးဝန်ကြီးဌာနမှ ထုတ်ပြန်ကြေညာထားသော School Bus အမျိုးအစား သတ်မှတ်ချက်(၁၂)ချက်အနက်မှ လက်ရှိ School Bus အများစုဆက်လက်ပြေးဆွဲနိုင်ရေးအတွက် အချက်(၁)ချက်အား နှစ်ကာလအကန့်အသတ်ဖြင့် ဖြေလျှော့ပေးရန် အစီအစဉ်ရှိ/မရှိနှင့် စပ်လျဉ်းသည့် မေးခွန်း

၂၀၁၆ ခုနှစ်တွင် ရန်ကုန်တိုင်းဒေသကြီးဝန်ကြီးချုပ်၏လမ်းညွှန်မှုဖြင့် Light Truck ကျောင်းကား များကို မှန်လုံယာဉ်(Mini Bus)များဖြင့် ပြောင်းလဲသုံးစွဲစေခဲ့ခြင်း ဖြစ်ပါကြောင်း၊ ၂၀၁၇ ခုနှစ်တွင် ပို့ဆောင်ရေးနှင့်ဆက်သွယ်ရေးဝန်ကြီးဌာနက ကျောင်းကားသတ်မှတ်ချက် (၁၂)ချက် ထုတ်ပြန် ခဲ့ပါကြောင်း၊ ၎င်း(၁၂)ချက်ထဲတွင် အမှတ်စဉ်(ဂ)တွင်ပါသော ဘယ်မောင်းယာဉ်ဖြစ်ရမည်ဆိုသည့် အချက်က လက်ရှိကျောင်းကားပြေးဆွဲသူအများစုလိုက်နာရန် အခက်အခဲကြီးစွာဖြစ်ပါကြောင်း၊ ၂၀၁၆ ခုနှစ်မှာတွင် Light Truck ကားမှ မှန်လုံယာဉ်(Mini Bus)ဖြင့် ပြောင်းလဲခဲ့ပြီး ၂၀၁၇ ခုနှစ်တွင် ညာမောင်းမှဘယ်မောင်းအဖြစ် ထပ်ပြီးပြောင်းလဲရန်အတွက် ငွေကြေးအရင်းအနှီးက အစအခက်အခဲကြီးစွာ ကြုံတွေ့ခဲ့ရပါကြောင်း၊ ပြည်တွင်းဈေးကွက်ရှိ ဘယ်မောင်း ကိုရီးယား နိုင်ငံထုတ်ကျောင်းကားသည် ညာမောင်းဂျပန်နိုင်ငံထုတ်ကားများထက်စာလျှင်  အဘက်ဘက်မှ အရည်အသွေးနိမ့်ကျသည့်အတွက် ပို့ဆောင်ရေးနှင့်ဆက်သွယ်ရေးဝန်ကြီးဌာနက ထုတ်ပြန် ထားသည့် ကျောင်းကားသတ်မှတ်ချက်(၁၂)ချက်ထဲက အမှတ်စဉ်(ဂ)တွင်ပါသော ဘယ်မောင်း ယာဉ်ဖြစ်ရမည်ဆိုသောအချက်က ကျောင်းကားပြေးဆွဲသူအများစုလိုက်နာရန်ခက်ခဲသည့်အတွက် နှစ်ကာလအကန့်အသတ်ဖြင့် ဖြေလျှော့ပေးသွားရန်အစီအစဉ်ရှိ/မရှိ သိလိုပါကြောင်း မေးမြန်းပါသည်။