(စ)-မရမ်းကုန်းမြို့နယ်၊ (၂)ရပ်ကွက်၊ ဦးချစ်ထွန်းလမ်းနှင့် ကျောက်ပြားစက်ရုံလမ်းကြားရှိ မြေကွက်အား နိုင်ငံရေးပါတီ တစ်ခုအမည်ဖြင့် ဂရန်ထုတ်ပေး ထားခြင်းကိုပယ်ဖျက်ပြီး မူလအတိုင်း ကလေးကစားကွင်းအဖြစ် သတ်မှတ်ပေးရန် အစီအစဉ် ရှိ/မရှိနှင့် စပ်လျဉ်းသည့်မေးခွန်း
(စ)-မရမ်းကုန်းမြို့နယ်၊ (၂)ရပ်ကွက်၊ ဦးချစ်ထွန်းလမ်းနှင့် ကျောက်ပြားစက်ရုံလမ်းကြားရှိ အလျားပေ (၁၀၀)၊ အနံ(၈၅)ပေ ကျယ်ဝန်းသောမြေကွက်အား နိုင်ငံရေးပါတီတစ်ခုအမည်ဖြင့် ဂရန်ထုတ်ပေး ထားခြင်းကိုပယ်ဖျက်ပြီး မူလအတိုင်း ကလေးကစားကွင်းအဖြစ် ပြန်လည်သတ်မှတ်ပေးရန် အစီအစဉ် ရှိ/မရှိနှင့် စပ်လျဉ်းသည့်မေးခွန်း
အဆိုပါမြေနေရာရှိ အမှတ်(၂)ရပ်ကွက်သည် ၁၉၈၄ ခုနှစ်ကတည်းက မီးအကြီးအကျယ်လောင်ပြီးနောက် နိုင်ငံတော်အစိုးရက မြို့ပြပုံစံစနစ်တကျ အကွက်ရိုက်ပြီး ပြန်လည်နေရာချထားပေးသော ရပ်ကွက်ဖြစ်ပါ ကြောင်း၊ မြို့အင်္ဂါနဲ့ညီစေရန် အများပြည်သူသက်ဆိုင်သော မြေနေရာများအဖြစ် သမဝါယမ အသင်းမြေ နေရာ၊ ဈေးမြေနေရာ၊ စာကြည့်တိုက်မြေနေရာ၊ ဓမ္မာရုံမြေနေရာ၊ အုပ်ချုပ်ရေးမှူးရုံးမြေနေရာနှင့် ကလေး ကစားကွင်းမြေနေရာ စသည်ဖြင့် စနစ်တကျအကွက်ရိုက်ပေးခဲ့ခြင်းဖြစ်ပါကြောင်း၊ မီးမလောင်ခင်ကလည်း ကလေးကစားကွင်းဖြစ်ပါကြောင်း၊ ၁၉၈၄ ခုနှစ် မြန်မာဆိုရှယ်လစ်လမ်းစဉ်ပါတီလက်ထက် နိုင်ငံတော်မှ တရားဝင်ကလေးကစားကွင်းအဖြစ် သတ်မှတ်ပေးခဲ့သော (၁၀၀ ပေ x ၈၅ ပေ)ကျယ်ဝန်း သည့် မြေနေရာ တွင် လူကြီး၊ လူငယ်၊ ကလေးများပျော်ရွှင်လုံခြုံစွာ စုကစားရုံသာမက ဘာသာရေးပွဲများ၊ နိုင်ငံတော် အခါကြီး နေ့အခမ်းအနားများကို စည်ကားသိုက်မြိုက်စွာ ကျင်းပပေးခဲ့ကြပါကြောင်း၊ အဆိုပါ ကစားကွင်း အား ၁၉၉၅ ခုနှစ်တွင် လူမှုရေးအသင်းတစ်သင်းက ကလေးများဝင်ရောက်ကစား ခွင့်မပြုတော့ဘဲ ရုံးတစ်ရုံး ဆောက်၍ ဥပဒေနှင့်ညီညွတ်မှုမရှိသော သိမ်းယူမှုများပြုလုပ်ခဲ့ကြပါကြောင်း၊ ၂၀၁၀ ခုနှစ်တွင် အဆိုပါကစားကွင်းကို ဥပဒေနှင့်ညီညွတ်မှုမရှိဘဲ ထိုအသင်းအား ဂရန်ထုတ်ပေးခဲ့ရုံသာမက အသင်းမှ နိုင်ငံရေးပါတီအဖြစ် ကူးပြောင်းသည်အထိ စွန့်လွှတ်မှုမရှိဘဲ အခိုင်အမာ ခြံဝင်းခတ်ယူသွားခဲ့ပါကြောင်း၊ ရပ်ကွက်နေ ရပ်မိရပ်ဖ၊ ပြည်သူလူထုများက အဆိုပါကစားကွင်း သိမ်းယူခဲ့ခြင်းအပေါ် အကြိမ်ကြိမ် ကန့်ကွက်ခြင်း၊ ယခင်အစိုးရလက်ထက် တိုင်းဒေသကြီးဝန်ကြီးချုပ် က ပြည်သူများက လက်မှတ်ရေးထိုး၍ အသနားခံစာတင်ပြခြင်း၊ ယခုအစိုးရလက်ထက်တွင်လည်း တိုင်းဒေသကြီးဝန်ကြီးချုပ်က အစရှိသည်များ ပြုလုပ်ခဲ့ကြပါကြောင်း၊ ယခု အစိုးရလက်ထက်တွင် တိုင်းဒေသကြီးလွှတ်တော်က စာဖြင့်လည်းကောင်း၊ လူကိုယ်တိုင်တွေ့ဆုံ၍လည်းကောင်း၊ ပြည်သူ့ကိုယ်စားဆောင်ရွက်ပေးရန် တင်ပြသည့်အတွက် တိုင်းဒေသကြီး လွှတ်တော်ကိုယ်စားလှယ်မှ ပြည်သူများကိုယ်စား ရန်ကုန်တိုင်းဒေသကြီးဝန်ကြီးချုပ်၊ ရန်ကုန်တိုင်းဒေသကြီး လွှတ်တော်ဥက္ကဋ္ဌ၊ ရန်ကုန်တိုင်းဒေသကြီး မြို့တော်ဝန်၊ ရန်ကုန်တိုင်းဒေသကြီး ကရင်ရေးရာဝန်ကြီးချုပ်ထံ စာဖြင့်တင်ပြထားသော်လည်း ယခုအချိန်ထိ ပြည်သူများလက်ဝယ်သို့ ကလေး ကစားကွင်းအဖြစ် ပြန်လည်စွန့်လွှတ်ပေးခြင်း မရှိသေးပါကြောင်း၊ ၈-၃-၂၀၁၀ ရက်စွဲဖြင့် နိုင်ငံတော် အေးချမ်းသာယာခြင်းနှင့် ဖွံ့ဖြိုးရေးဥပဒေ အမှတ်(၂/၂၀၁၀)ဖြင့် ထုတ်ပြန်ထားသော နိုင်ငံရေးပါတီ မှတ်ပုံတင်ခြင်းများ ပုဒ်မ၁၂(က)တွင် ပါတီတစ်ခုသည် အောက်ပါအချက်တစ်ရပ်ရပ်နှင့်ငြိစွန်းလျှင် နိုင်ငံရေးပါတီအဖြစ် ဆက်လက်ရပ်တည် ခွင့်မရှိစေရဟု ပါပါကြောင်း၊ ပုဒ်မ ၁၂(က) အပိုဒ်ခွဲ(င)တွင် နိုင်ငံတော်ပိုင် ငွေကြေး၊ မြေ၊ အိမ်၊ အဆောက်အဦ၊ ယာဉ်၊ ပစ္စည်းတို့ကို တိုက်ရိုက်ဖြစ်စေ၊ သွယ်ဝိုက်၍ ဖြစ်စေ၊ ရယူသုံးစွဲထားသည့် အဖွဲ့အစည်းဖြစ်ကြောင်း တွေ့ရှိခြင်း၊ ပုဒ်မ ၁၂(ခ) တွင် ကော်မရှင် သည် အပိုဒ်ခွဲ(က)ပါ အချက် တစ်ရပ်ရပ်နှင့်ငြိစွန်းသောပါတီအား နိုင်ငံရေးပါတီအဖြစ် မှတ်ပုံတင်ထားခြင်းကို ပယ်ဖျက်၍ ယင်းပါတီကိုလည်း ဖျက်သိမ်းရမည်ဟု အတိအလင်းဖော်ပြထားရှိပါကြောင်း၊ ယခုအချိန်တွင် မရမ်းကုန်းမြို့နယ်၊ (၂)ရပ်ကွက်တွင် အနာဂတ်ခေါင်းဆောင် ဖြစ်လာမည့် ကလေးများ လုံခြုံစွာကစားရန် ကစားကွင်းမရှိသောကြောင့် လမ်းပေါ်ထွက်ပြီး လှုပ်ရှားနေကြသဖြင့် ကလေးများအတွက် အန္တရာယ်များ စွာရှိနေပါကြောင်း၊ ကလေးသူငယ်များသာမက လူကြီး၊ လူငယ်၊ လူလတ် မရွေး ကိုယ်လက်လှုပ်ရှားမှ ကျန်းမာသန်စွမ်းသည့်အပြင် မူးယစ်ဆေးဝါး သုံးစွဲခြင်းစသော စိတ်လေလွင့်မှုများဖြစ်ပေါ်လာသော အလေ့အကျင့် ဆိုးများကို ဖြေလျှော့ချနိုင်ပြီး နိုင်ငံတော်အား ဖွံ့ဖြိုးတိုးတက်၍ အထောက်အကူ ဖြစ်မည်ဖြစ်ပါကြောင်း၊ ထို့ကြောင့် နိုင်ငံတော်က ကလေးကစားကွင်းအဖြစ်သတ်မှတ် ထားခဲ့သည့် ရန်ကုန်တိုင်းဒေသကြီး၊ မရမ်းကုန်းမြို့နယ်၊ (၂)ရပ်ကွက်၊ ဦးချစ်ထွန်းလမ်းနှင့် ကျောက်ပြားစက်ရုံလမ်းရှိ အလျားပေ(၁၀၀)၊ အနံပေ (၈၅) ကျယ်ဝန်းသောမြေကွက်အား နိုင်ငံရေး ပါတီတစ်ခု၏အမည်ဖြင့် ဂရန်ထုတ်ထားခြင်းကိုပယ်ဖျက်ပြီး မူလအတိုင်းကလေးကစားကွင်းအဖြစ် ပြန်လည်သတ်မှတ်ရန် အစီအစဉ်ရှိ/ မရှိနှင့် အစီအစဉ်ရှိပါက မည်သည့်အချိန်တွင် ဆောင်ရွက်ပေး၍ အစီအစဉ်မရှိပါက မည်သည့် အတွက်ကြောင့်ဆိုသည်ကို သိလိုပါကြောင့်ဖြင့်မေးမြန်းပါသည်။