(င)-မတူပီ-မင်းတပ်လမ်းအတွက် ၂၀၁၉-၂၀၂၀ ဘဏ္ဍာရေးနှစ်မှစတင်၍ ပြည်ထောင်စုဘဏ္ဍာရန်ပုံငွေကို ခွင့်ပြုပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း
မတူပီ-မင်းတပ်လမ်းသည် ၁၀၂ မိုင်သာရှိပြီး ချင်းပြည်နယ်(တောင်ပိုင်း)၏ တစ်ခုတည်းသော ထွက်ပေါက် လမ်း လည်းဖြစ်ပါကြောင်း၊ အဆိုပါလမ်းနှင့် ပတ်သက်ပြီး ၂၀-၉-၂၀၁၆ ခုနှစ်တွင် ကြယ်ပွင့်ပြမေးခွန်း မေးမြန်းခဲ့ရာ ပြည်ထောင်စုဝန်ကြီးက ၂၀၂၀-၂၀၂၁ ခုနှစ်ထိ နှစ်အလိုက် ပြည်နယ်ဘတ်ဂျက်နှင့် ပြည်ထောင်စုဘတ်ဂျက်ကို ခွဲဝေချထားပေးမည်ဟုလည်းကောင်း၊ ၁၈ ပေ ကတ္တရာအကျယ်ကိုလည်း ခင်းပေးမည်ဟုလည်းကောင်း ဖြေကြားခဲ့သော်လည်း အဆိုပါ ဖြေကြားချက်အတိုင်း ပြည်နယ်ဘတ်ဂျက် ရန်ပုံငွေမှ ဘဏ္ဍာငွေခွဲဝေပေးမှုရှိခဲ့သော်လည်း ပြည်ထောင်စု ရန်ပုံငွေမှ ဘတ်ဂျက်ခွဲဝေမှုမရှိသလောက် နည်းပါးခဲ့ ပါကြောင်း၊
မတူပီ-မင်းတပ်ကြားရှိ မုန်းချောင်းတံတားနှင့် အလည်မြူချောင်းတံတား ယခုနှစ် မတူပီ လမ်းပိုင်းတွင် သန်းပေါင်း ၃၀၀ ကလွဲ၍ တခြား ပြည်ထောင်စုနှင့်ဘတ်ဂျက်ခွဲဝေမှုမရှိသည်ကို တွေ့ရှိရပါကြောင်း၊ ပြည်ထောင်စုဘတ်ဂျက်ရန်ပုံငွေကို ခွဲဝေပေးရန် တောင်းခံရသည်မှာလဲ ချင်းပြည်နယ်သည် လွတ်လပ်ရေးရပြီးကတည်းကပင် ဖွံ့ဖြိုးမှုရန်ပုံငွေလုံးဝခွဲဝေပေးခဲ့ခြင်း မရှိသည့်အတွက် အဆင်းရဲဆုံး ပြည်နယ်၊ ဖွံ့ဖြိုးမှုအနောက်ကျဆုံးပြည်နယ်ဖြစ်ခဲ့ပါကြောင်း၊ ၂၀၁၂-၂၀၁၃ ဘဏ္ဍာရေးနှစ်နောက်ပိုင်းတွင် ရန်ပုံငွေအလုံးအရင်း ချပေးပြီး ဖွံ့ဖြိုးရေးလုပ်ငန်းများကို ဆောင်ရွက်ပေးခဲ့သော်လည်း လိုအပ်ချက်အလွန် များပြားသည့်အတွက် မလုံမလောက်ဖြစ်နေရပါကြောင်း၊ ထို့ကြောင့် ပြည်နယ်ဘဏ္ဍာရန်ပုံငွေတစ်ခုတည်းဖြင့် မည်သို့မျှ ဖြည့်ဆည်းပေးနိုင်ခြင်းမရှိသည့်အတွက် ပြည်ထောင်စုဘဏ္ဍာရန်ပုံငွေကို တောင်းခံရခြင်းဖြစ်ပါ ကြောင်း၊ ချင်းပြည်နယ်၊ ဘဏ္ဍာရန်ပုံငွေ၏ ၆၀ ရာခိုင်နှုန်းကို လမ်း/တံတားအတွက် အသုံးပြုခဲ့သော်လည်း ၁၀၂ မိုင်သာရှိသည့် မတူပီ-မင်းတပ်လမ်း မြေသားတာချဲ့ခြင်းနှင့် ကတ္တရာလမ်းခင်းခြင်းသည် ယနေ့အထိ မြေသားတာချဲ့ခြင်း လုပ်ငန်း ၇၀ ရာခိုင်နှုန်းနှင့် ကတ္တရာခင်းခြင်းလုပ်ငန်း ၆၀ ရာခိုင်နှုန်းသာ ပြီးစီးသည့် အနေအထားသာ ရှိပါကြောင်း၊
ထို့ကြောင့် မတူပီမြို့၊ လိုင်လင်းပီမြို့၊ အရီဇွာမြို့တွင် တိုင်းရင်းသားပြည်သူများအနေဖြင့် မိုးတွင်းကာလ ရောက်ရှိပါက လမ်းမကောင်းသည့်အတွက် ရိက္ခာပြတ်လပ်မှု၊ ကုန်ဈေးနှုန်းကြီးမြင့်မှု၊ လူမှုဘဝဒုက္ခအဖြာဖြာ ကို တွေ့ကြုံနေရပါကြောင်း၊ ချင်းပြည်နယ်နှင့် အနီးစပ်ဆုံး မကွေးတိုင်းဒေသကြီးတွင် ကတ္တရာလမ်းအကုန်လုံး ပြီးစီးပြီး ကတ္တရာလမ်း တာချဲ့ခြင်းလုပ်ငန်းကိုတောင် ဆောင်ရွက်နေသည့်အခြေအနေတွင် ၁၀၂ မိုင်သာ ရှိသည့် မြေသားတာချဲ့ခြင်းလုပ်ငန်းနှင့် ကတ္တရာလမ်းခင်းခြင်းလုပ်ငန်း မပြီးစီးနိုင်သေးသည်မှာလည်း အင်မတန်မှ ဝမ်းနည်း ဖွယ်ရာကောင်းပါကြောင်း၊ သို့ဖြစ်ပါ၍ ၂၀၁၉-၂၀၂၀ ဘဏ္ဍာရေးနှစ်နှင့် ၂၀၂၀-၂၀၂၁ ဘဏ္ဍာရေးနှစ်တို့တွင် ပြည်ထောင်စုရန်ပုံငွေ ခွဲဝေပေးရန်အစီအစဉ်ရှိ/မရှိကို သိရှိလိုပါကြောင်း မေးမြန်းပါသည်။