မဲဆန္ဒရှင်အတော်များများမှ အိမ်နီးချင်းများနှင့် နယ်နိမိတ်ပြဿနာဖြစ်ခြင်း၊ အချို့ပြဿနာများမှာ လမ်းမြေကို ကျူးကျော်လာ၍ လမ်းကျဉ်းလာရသည့်အတွက် ပြည်သူများမှ တိုင်းထွာသတ်မှတ်ပေးစေ လိုကြောင်းကို တင်ပြကြပါကြောင်း၊ ၎င်းတို့မှ ရပ်/ကျေး အုပ်ချုပ်ရေးမှူးများ၊ မြို့နယ်အုပ်ချုပ်ရေးမှူး များထံ တင်ပြကြသော်လည်း ထိရောက်စွာဖြေရှင်းမပေးနိုင်မရှိသည့်အတွက် မြေစာရင်းဦးစီးဌာနသို့ စာတင်အကူအညီတောင်းရာတွင်လည်း ဆိုင်ရာတရားရုံး၌ အမှုလုပ်ရန် ညွှန်ကြားကြောင်း၊ တရားရုံး သို့ အမှုဖွင်‌့ရန်စုံစမ်းရာတွင်လည်း ၎င်းပြဿနာသည် မြေစာရင်းရုံးနှင့်သာဆိုင်ပါကြောင်း၊ တရားမ မှုဖွင့်ပါက အမှုစရိတ်နှင့် အချိန်ကြာမည်ဟုပြောကြောင်း ထို့ကြောင့်မိမိထံသို့ ကူညီပေးပါရန် တင်ပြ လာကြခြင်းဖြစ်ပါကြောင်း၊ ၎င်းကိစ္စသည် တစ်တိုင်းပြည်လုံးတွင် ဖြစ်နေကြောင်းကို ကိုယ်စားလှယ်  အချင်းချင်းဆွေးနွေးကြမှ သိရှိရပါကြောင်း၊ မိမိတို့မှ ဆိုင်ရာဌာနများနှင့် တာဝန်၊ လုပ်ပိုင်ခွင့်များအရ ပေါင်းစပ်ညှိနှိုင်းသည့် အခါတွင် ဘောလီဘောအပုတ်ခံရပါသည်ဆိုသည့် လူထုထင်မှတ်မှားရခြင်း အကြောင်းအရင်းကို ဖော်ထုတ်တွေ့ရှိလာခဲ့ရခြင်းဖြစ်ပါကြောင်း၊ မြေစာရင်းက တိုင်းထွာပေး၍ မရခြင်း အကြောင်းအရင်းမှ ဆည်မြောင်းဦးစီးဌာန၊ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏  ၁၅-၉-၂၀၁၆ ရက်စွဲပါ စာအမှတ်(၇၀၀၂/၆သ(၁))အရ ဖြစ်ပါကြောင်း၊ ယခုလို နယ်နိမိတ်ပြဿနာဖြစ်၍ လူထုကတင်ပြလာလျှင် ညွှန်ကြားထားသည်မှမြန်မာနိုင်ငံ မြေစာရင်းလက်စွဲ ပုဒ်မ ၉၇၅ အရ တိုင်းတာ ခွင့်မပေးဘဲ သက်ဆိုင်ရာတရားရုံး၌ ဖြေရှင်းဆောင်ရွက်ကြစေရန်နှင့် တရားရုံးမှ ကြားနာစစ်ဆေးပြီး တိုင်းထွာရန် လိုအပ်သည်ဟု ယူဆပါက တရားမကျင့်ထုံးဥပဒေနှင့်အညီ မြေစာရင်း ဝန်ထမ်းတစ်ဦး အား Commissioner အဖြစ်ခန့်အပ်ပြီး မြန်မာနိုင်ငံမြေစာရင်းလက်စွဲဥပဒေ ပုဒ်မ ၉၇၇ အရ မြေစာရင်း ဦးစီးဌာန ညွှန်ကြားရေးမှူးချုပ်ထံ ခွင့်ပြုချက်တောင်းခံ၍ တိုင်းထွာရန်ဟု တွေ့ရှိရပါကြောင်း၊  ၎င်း အတွက် တရားစီရင်ရေးအာဏာဘက်တွင် ညွှန်ကြားချက်မပေးဟု မြို့နယ်တရားသူကြီးမှ ပြောပါကြောင်း၊ ထို့အပြင် Commissioner ခန့်ရမည်ဆိုပါက ၎င်း၏ဝန်ထမ်းကို သာခန့်နိုင်ပြီး မြေစာရင်းဝန်ထမ်းကို ခန့်နိုင်မည်မဟုတ်ကြောင်းကို ရှင်းပြပါကြောင်း၊ ဌာနနှစ်ခုပေါင်းစပ် ဖြေရှင်း ရမည့်ကိစ္စကို သေချာပေါင်းစပ်ညှိနှိုင်းထားခြင်းလည်းမပြုခဲ့ဘဲ တရားရုံမှ တာဝန်ပေးခိုင်းလာပြီးမှ တစ်ခေါက်၊ ရုံးချုပ်က ညွှန်ကြားရေးမှူးချုပ်ထံ ခွင့်ပြုချက်ထပ်တောင်းအုံးဆိုသည့် သူတစ်လူ ငါတစ်မင်းဆန်သည့် လုပ်ထုံးလုပ်နည်းမျိုးသည် လူထုအပေါ် ဘယ်လောက်ဝန်ထုပ်ဝန်ပိုးဖြစ်နေမလဲ ဆိုသည်ကို သုံးသပ်စေလိုပါကြောင်း၊ မိမိတို့သည် အသွင်မတူသော အုပ်ချုပ်ရေးမှသည် ဒီမိုကရေစီ အုပ်ချုပ်ရေးကို ကူးပြောင်းနေကြခြင်း ဖြစ်ပါကြောင်း၊ ဒီမိုကရေစီအုပ်ချုပ်ရေးဆိုသည်မှာ လူထုကို ဗဟိုပြုစီမံကိန်းရေးဆွဲပြီး မျက်နှာမူဆက်ဆံရသည့်အတွက် လူထုကိုဝန်ဆောင်မှုပေးရာတွင် မှန်ကန်၊ မျှတ၊ ချောမွေ့၊ မြန်ဆန်ဖို့ လိုအပ်ပါကြောင်း၊ ထိုမှသာ လူထုဝန်ထုပ်ဝန်ပိုး မဖြစ်မည် ဖြစ်ပါကြောင်း၊ ထို့သို့ဖြစ်ရန်အတွက် မိမိတို့တွင် ရှိပြီးသားအမိန့်၊ ညွှန်ကြားချက်၊ စည်းမျဉ်းစည်းကမ်းနှင့် လုပ်ထုံးလုပ်နည်းများကို စိစစ်ပြီးပြောင်းပေးရန် လိုအပ်ပါကြောင်း၊ ထို့ကြောင့် လယ်ယာ၊ အိမ်၊ ခြံမြေတို့၏ နယ်နိမိတ်အငြင်းပွားမှုများကို လျင်မြန်ထိရောက်စွာ ‌ဖြေရှင်းပေးနိုင်မည့် လုပ်ထုံးလုပ်နည်း တစ်ရပ် ဖော်ဆောင်ပေးရန် အစီအစဉ် ရှိ/မရှိ ကိုသိလိုပါကြောင်း မေးမြန်းပါသည်။