ပေါက်တော-ပုဏ္ဏားကျွန်းမြို့ကိုဖြတ်၍ ဆောက်လုပ်မည့် ကစ္စပနဒီတံတား (ကုလားတန်) မြစ်ကူး တံတားကို ၂၀၁၆-၂၀၁၇ ဘဏ္ဍာရေးနှစ်မှစတင်ပြီး ဆောင်ရွက်ရန် စီစဉ်ထားသော်လည်း ယခုတိုင်ဆောက်လုပ်နိုင်ခြင်းမရှိသေးသည်ကို သိလို၍ဖြစ်ပါကြောင်း၊ ၎င်းမေးခွန်းနှင့် ပတ်သက်သည့် မိမိရည်ရွယ်ချက်မှာ ကစ္စပနဒီတံတား(ခေါ်) ကုလားတန်မြစ်ကူးတံတား တည်ဆောက်ရန်အလို့ငှာ ကွင်းဆင်းတိုင်းတာခြင်း၊ စီမံကိန်းဖြစ်မြောက်နိုင်စွမ်း(Feasibility study)လုပ်ငန်းများ ဆောင်ရွက် ခြင်း၊ ခန့်မှန်းကုန်ကျစရိတ်(Estimate)များ တွက်ချက်ခြင်းနှင့် တာဝန်ရှိပုဂ္ဂိုလ်များက လွှတ်တော် တွင်သော်လည်းကောင်း၊ အခြားနေရာများတွင်သော်လည်းကောင်း လူသိရှင်ကြားတရားဝင် ပြောကြားခြင်း စသဖြင့် အစစအရာရာဆောင်ရွက်ပြီးသော်လည်း ယခုတိုင် လုပ်ငန်း မစတင်နိုင် ဘဲရှိနေသည်မှာ ဘဏ္ဍာရေးအခက်အခဲကြောင့်လား၊ နည်းပညာ အခက်အခဲ ကြောင့်လားဆိုသည်ကို သိလို၍ဖြစ်ပါကြောင်း၊

မိမိအနေဖြင့် ပထမအကြိမ် အမျိုးသားလွှတ်တော် (၁၂)ကြိမ်မြောက်ပုံမှန်အစည်းအဝေး ၄-၂-၂၀၁၅ ရက်နေ့တွင် ရခိုင်ပြည်နယ်မဲဆန္ဒနယ်အမှတ်(၁) အမျိုးသားလွှတ်တော်ကိုယ်စားလှယ် ဒေါက်တာ အေးမောင်မှမေး၍ ဆောက်လုပ်ရေးဝန်ကြီးဌာန ဒုတိယဝန်ကြီး ဦးစိုးတင့်၏ဖြေကြားချက်ကို လည်းကောင်း၊ ဒုတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေးတွင် ၄-၈-၂၀၁၆ ရက်နေ့တွင် မိမိမှမေး၍ ဆောက်လုပ်ရေးဝန်ကြီးဌာန ဒုတိယဝန်ကြီးဦးဝင်းခိုင်၏ ဖြေကြား  ချက်ကို လည်းကောင်း ကောက်နုတ်ကိုးကားတင်ပြလိုပါကြောင်း၊ ၎င်းတံတားကြီးကိုဆောက်လုပ်ရေး အတွက် မိမိတို့က ၂၀၁၅-၂၀၁၆ ဘဏ္ဍာရေးနှစ်တွင် တည်ဆောက်ရန် အစီအစဉ်လုပ်ထားသော် လည်း Feasibility Study နှင့် Design များသေချာမှုမရှိသည့်အတွက် ဆောက်လုပ်နိုင်ခြင်းမရှိဘဲ ၂၀၁၆-၂၀၁၇ ဘဏ္ဍာရေးနှစ်တွင်စတင်ပြီး ရန်ပုံငွေလျာထားပြီး ဆောက်လုပ်ရန်စီစဉ်ထား ပါကြောင်း၊ ထို့အပြင် ပြည်ပနိုင်ငံများအကူအညီရရှိရန်လည်း အမြန်ဆုံးပြီးစီးအောင် ဆောင်ရွက်ရန် ရှိပါကြောင်း၊ နောက်တစ်ချက်က ခန့်မှန်းကုန်ကျစရိတ်တန်ဖိုးသည် တံတားလုပ်ငန်းအနေဖြင့် ကျပ်သန်းပေါင်း ၈၄,၀၈၀ ဘီလီယံ၊ လမ်းလုပ်ငန်းအနေဖြင့် ကျပ်သန်း ပေါင်း ၄,၀၀၀ စုစုပေါင်းခန့်မှန်းခြေတန်ဖိုးကျပ်သန်းပေါင်း ၈၄,၀၀၀ ကုန်ကျမည်ဖြစ်သည့်အတွက် လုပ်ငန်းပမာဏ အင်မတန်ကြီးမားသောလုပ်ငန်းဖြစ်သည့်အကြောင်း တင်ပြလိုပါကြောင်း၊

ထို့အပြင် စစ်တွေမှ ရန်ကုန်သို့သွားသည့် နေရာတွင် လက်ရှိလမ်းဖြစ်သည့် ပုဏ္ဏားကျွန်း-ပေါက်တော-ကျောက်တော်-မြောက်ဦး-မင်းပြား-နရမ်းလမ်းဆုံအပိုင်းဟာဆိုရင် ၈၆ မိုင် ကွာဝေးပါ ကြောင်း၊ ပုဏ္ဏားကျွန်းမှ လမ်းအသစ်ဖောက်လုပ်၍ ယခုတင်ပြသည့် ကစ္စပနဒီတံတားကြီးဖြင့် ဖြတ်သန်းလိုက်မည်ဆိုလျှင် ပုဏ္ဏားကျွန်း-ပေါက်တော-မင်းပြား-နရမ်းလမ်းထိ မိုင် ၄၀ ကွာပါ ကြောင်း၊ တစ်နည်းအားဖြင့် မိုင် ၄၀ သွားရသည့်အတွက် ၄၆ မိုင်ခန့် ကျုံ့သွား ခြင်းဖြစ်ပါကြောင်း၊ တံတား၏အရေးပါမှုကိုလည်း မိမိတို့ဌာနအနေဖြင့် အစဉ်အမြဲ၊ အမြဲတမ်းကြိုးပမ်း၍ ဖြစ်နိုင်သည့် နည်းလမ်းများကို စဉ်းစားနေပါကြောင်း၊

ဆောက်လုပ်ရေးဝန်ကြီးဌာန ယခုရှိနေသည့် ဒုတိယဝန်ကြီးအနေဖြင့် အိန္ဒိယကကမ်းလှမ်းလာသည့် အစီအစဉ်ကြောင့် ပုဏ္ဏားကျွန်းမှ မင်းပြားသို့ ဖောက်လုပ်မယ့်လမ်းကို ငါးနှစ်စီမံကိန်းအတွင်းတွင် ပါမည်ဆိုသည့်အကြောင်း တင်ပြလိုပါကြောင်း၊ ၎င်းလမ်းကိုဖောက်ခြင်းအားဖြင့် အကျိုးကျေးဇူး မှာကစ္စပနဒီလမ်းသစ်ဖောက်လျှင် ရေပတ်လည်ဝိုင်းပြီး ချောင်ပိတ်နေသည့် ပေါက်တောမြို့နယ် သည် ထွက်ပေါက်ရသွားမည်ဖြစ်ပါကြောင်း၊ ထို့ကြောင့် လျင်လျင်မြန်မြန် ဖွံ့ဖြိုးတိုးတက်သွားမည် ဖြစ်ကြောင်း၊ နောက်တစ်ဆင့်အနေဖြင့် ပုဏ္ဏားကျွန်း-ရသေ့တောင်-ဘူးသီးတောင်-မောင်တောမြို့ ကိုဖျက်၍ နယ်စပ်အရောက်သွားနိုင်သည့် အတွက် မဟာဗျူဟာလမ်းတစ်လမ်းရမည်ဖြစ်ပါကြောင်း၊ ထို့နောက် ပေါက်တောမြို့နယ်မှ ကုလားတန်မြစ် ကိုဆန်တက်ပြီး ကျောက်တော် မှပြန်ဆင်းလာ သည့် အခါတွင် မိုင် ၁၀၀ ကျော် စစ်တွေသို့ ရောက်ရန်အလှမ်းဝေးနေပါကြောင်း၊

ကုလားတန်မြစ်ကို မိုးတွင်းကာလဖြတ်ကူးပြီး စစ်တွေကို သွားရာတွင် အင်မတန်အန္တရာယ် များပါကြောင်း၊ ၁၉၇၀ ခုနှစ်က စက်လှေတစ်စင်းလုံးမှောက်၍  လူ ၅၀ ခန့်မြို့သူမြို့သားများ သေဆုံးဖူးပါကြောင်း၊ ပေါက်တောမှစထွက်မည်ဆိုပါက ကျောက်တော်ကို ပတ်သွားရမည့် အနေအထားရှိပါကြောင်း၊ တံတားအသစ်ဆောက်လိုက်ပါက မိုင် (၃၀) ခန့်သာရှိ၍ အားလုံး အဆင်ပြေမည်ဖြစ်ပါကြောင်း၊ ထို့ကြောင့် လုပ်ဆောင်ပေးရန်အစီအစဉ်ရှိ/မရှိ မေးမြန်းပါသည်။