မြို့ရွာများ တည်ငြိမ်အေးချမ်းပြီး ပြည်သူလူထု ဘေးကင်းလုံခြုံစွာ ရှိရန် အနီးကပ် ဝန်ဆောင်မှုပေးရသည့် မြန်မာနိုင်ငံရဲတပ်ဖွဲ့ကို လိုအပ်ချက်နှင့်အညီ အင်အားတိုးချဲ့ ဖွဲ့စည်းရန်၊ တပ်ဖွဲ့၏ အခြေခံလို အပ်ချက်များ အပါအဝင် လုပ်ငန်းများ စွမ်းဆောင်ရည် မြင့်မားလာမှု မည်ကဲ့သို့ စီမံဆောင်ရွက် ထားပါသလဲဆိုသည့် မေးခွန်းဖြစ်ပါကြောင်း၊

တည်ငြိမ်အေးချမ်းပြီး ဘေးကင်းလုံခြုံစွာ ပြည်သူလူထု နေထိုင်မှသာ တရားဥပဒေ စိုးမိုးပြီး နိုင်ငံ၏ ဖွံ့ဖြိုးမှုရှိလာမည် ဖြစ်ပါကြောင်း၊ ၎င်းလိုအပ်ချက်ကို အဓိက ဝန်ဆောင်မှုပေးရသည်က ရဲတပ်ဖွဲ့သာ ဖြစ်ပါကြောင်း၊ ယခုအခါတွင် ၎င်းကို ရဲတပ်ဖွဲ့မှ ဝန်ဆောင်မှု ပြည့်ပြည့်ဝဝ မပေးနိုင်သည်ကို မိမိတို့ သွားတွေ့ရသည် ဖြစ်ပါကြောင်း၊ မိမိတို့ မြန်မာနိုင်ငံ၏ ရဲတပ်ဖွဲ့အင်အားသည်မိ မိလေ့လာသိရှိရသမျှ ၇၀၀၀၀ ကျော် ၈၀၀၀၀ ခန့်သာ ရှိသည်ကို တွေ့ရပါကြောင်း၊ ထို့ကြောင့် ကမ္ဘာတွင် ကြည့်မည်ဆိုပါက ရဲတပ်ဖွဲ့ဝင် တစ်ယောက်သည် လူ ၄၀၀ ကို တာဝန်ယူရသည့် အပိုင်းရှိပြီး မြန်မာနိုင်ငံတွင် လူတစ်ထောင်ကို ရဲတပ်ဖွဲ့ဝင် တစ်ယောက်ခန့် တာဝန်ယူ နေရပါကြောင်း၊ အဓိက လူဦးရေထူထပ်သည့် မြို့၊ ရွာများ၊ မြို့ကြီးများတွင် ကြည့်မည်ဆိုပါက ရဲတပ်ဖွဲ့ဝင် တစ်ဦးသည် ၁၂၀၀ ပတ်ဝန်းကျင်ခန့် တာဝန်ယူနေရခြင်း ရှိပါကြောင်း၊ ထို့ကဲ့သို့ တာဝန်ယူရသည့်အပြင် ရဲတပ်ဖွဲ့ဝင်အင်အာ်သည် နည်းပြီး အဓိကတရားရုံး ထုတ်သည့် အခါတွင် ဝန်ဆောင်မှု ပေးရ၊ ဘဏ်ငွေသွင်း၊ ငွေထုတ် လုပ်သည့် အချိန်တွင် ဝန်ဆောင်မှုပေးရ၊ လမ်းလုံခြုံရေး ဝန်ဆောင်မှုပေးရနှင့် ထောင်ကျအကျဉ်းသားများကို ပို့သည့် အချိန်တွင် ဝန်ဆောင်မှု ပေးရသည့်အတွက် ရဲတပ်ဖွဲ့ဝင်အင်အားသည် ရဲစခန်း လုံခြုံရေးအတွက်သာ ရှိနေသည်ကို တွေ့ရပါကြောင်း၊ ထို့ကြောင့် မှုခင်းကြိုတင်ကာကွယ်ရေး လုပ်ငန်းများကို မလုပ်နိုင်ပါကြောင်း၊ အမှုဖြစ်ပြီးမှသာ ဒဏ်ရာရသည့် လူကို ဆေးရုံပို့၊ အမှုဖွင့်၊ သေသည့် လူကို အလောင်းကောက် တရားခံ ထွက်ပြေးသည့်အချိန်တွင် အင်အားမရှိသည့်အတွက် တရားခံပြေးဖြင့် အမှုဖွင့်ရသည့် အခြေအနေမျိုးများကို မိမိတို့ လက်ရှိတွေ့နေရခြင်း ဖြစ်ပါကြောင်း၊ ထို့ကြောင့် ရဲတပ်ဖွဲ့၏ အင်အားနည်းမှုပေါ်တွင် ပြည်သူလူထုက မသိသည့်အတွက် ရဲတပ်ဖွဲ့ဝင်များသည် တာဝန်ယူမှု၊ တာဝန်ခံမှု နည်းပါးသည်ဆိုပြီး ယုံကြည်မှုအား ပိုမိုနည်းလာသည်ကို တွေ့ရခြင်း ဖြစ်ပါကြောင်း၊ ထို့ပြင် မိမိတို့ ရဲတပ်ဖွဲ့ပေါ်တွင် လစာစရိတ်၊ ခရီးစရိတ်၊ ဆက်စပ်ပစ္စည်းများ ရပိုင်ခွင့် များနှင့် ပတ်သက်ပြီး မိမိတို့တွေ့ရသည်မှာ လွန်စွာအားနည်းနေသည်ကို တွေ့ရပါကြောင်း၊ ထို့အတူ ရဲတပ်ဖွဲ့ဝင်များသည် ကြာလာသည်နှင့်အမျှ လုပ်ငန်းစွမ်းဆောင်ရည်များ နည်းလာသည့်အတွက် စွဲဆိုသည့် အမှုတွေပေါ်တွင် အခက်အခဲများ များစွာတွေ့ရသည့်အပြင် တချို့ကိစ္စများတွင် လုံခြုံမှု ပေးရာတွင်လည်း များစွာအားနည်းနေသည်ကိုတွေ့ရပါကြောင်း၊

ထို့ကြောင့် မိမိအနေဖြင့် ပြည်သူလူထုအတွင်းတွင် တရားဥပဒေစိုးမိုးပြီး ရဲတပ်ဖွဲ့ဝင်အင်အား တိုးချဲ့နိုင်ရေးနှင့် ပတ်သက်ပြီး သော်လည်းကောင်း၊ ရဲတပ်ဖွဲ့၏ စွမ်းဆောင်ရည် မြင့်မားလာရေးနှင့် သော်လည်းကောင်း၊ ဆက်စပ်သည့် လိုအပ်ချက်များကို ဖြည့်ဆည်းပေးနိုင်ရေးနှင့် ပတ်သက်ပြီး သော်လည်းကောင်း ဝန်ကြီးဌာနက မည်ကဲ့သို့ စီမံဆောင်ရွက်ထားသည်ကို သိလိုကြောင်း မေးမြန်းပါသည်။