မြေပုံမြို့နယ်၊ ထုံးကျိန်လွင်ပြင် လယ်သမားတာကို ၂၀၁၇-၂၀၁၈ ဘဏ္ဍာရေးနှစ်ပြည်နယ် အစိုးရရန်ပုံငွေ ၄၉၂ သန်းဖြင့် စိမ်းစမ်းစို ကုမ္ပဏီက တင်ဒါအောင်မြင်ခဲ့ခြင်းဖြစ်ပါကြောင်း၊ တာအလျားက ပေ ၃၉,၀၀၀ ရှိပါကြောင်း၊ သို့သော် ယခု အချိန်အထိ ကုမ္ပဏီသည် ပြီးမြောက်အောင် ဆောင်ရွက်ခဲ့ခြင်း မရှိပါကြောင်း၊ လုပ်ငန်းအတွက် ငွေအားလုံးကိုတော့ ထုတ်ယူသွားပြီးဖြစ်ကြောင်း သိရပါကြောင်း၊ ယခုလိုအခြေအနေကို ကုက္ကိုကျေးရွာ အုပ်ချုပ်ရေးမှူးအပါအဝင် လယ်သမား ၁၀၀ ကျော်က လက်မှတ်ရေးထိုးပြီး တိုင်တန်းခဲ့ကြပါကြောင်း၊ မိမိအနေဖြင့်လည်းသက်ဆိုင်ရာဌာန များကို အသိပေးအကြောင်းကြားခဲ့ခြင်း ကြောင့် ဆည်မြောင်းနှင့်ရေအသုံးချမှု စီမံခန့်ခွဲရေးဦးစီး ဌာနမှ ကွင်းဆင်းစစ်ဆေးပြီး ကုမ္ပဏီကို လုပ်ငန်းပြီးမြောက်အောင်ဆောင်ရွက်ရန် အကြိမ်ကြိမ် သတိပေးအကြောင်းကြားခဲ့ပါကြောင်း၊ ပိုဆိုးသည်မှာ ကုမ္ပဏီက ဌာနမှသတ်မှတ် ထားသည့် တာလမ်းကြောင်းအတိုင်း မသွားဘဲ မြေနိမ့်သည့် နေရာများ၊ ချောင်းများ ကိုဖယ်ထုတ်ပြီး ဆည်ဖို့ခဲ့ ခြင်းကြောင့် ဌာနမှကြိုတင်တည်ဆောက် ထားသည့် သိန်း ၃၀၀၀ ကျော် ရေတံခါးတစ်ခု သည်လည်း အသားလွတ် ဘေးတွင်ကျန်ရစ်ခဲ့ခြင်းဖြစ်ပါကြောင်း၊ နိုင်ငံတော်ဘဏ္ဍာငွေများ အလဟဿဆုံးရှုံးခဲ့ရခြင်းဖြစ်ပါကြောင်း၊ ယခုလိုအခြေအနေများကြောင့် မင်းပြားမြို့၊ ဆည်မြောင်း နှင့် ရေအသုံးချရေးစီမံခန့်ခွဲရေးဦးစီးဌာန၊ ဦးစီးအရာရှိ(မြို့ပြ)မှ ပြည်နယ်ညွှန်ကြားရေးမှူးထံသို့ ၂၀၁၉ ခုနှစ်၊ မေလ ၂ ရက်နေ့၊ ရက်စွဲပါစာအမှတ်(၁၂၉/တင်ဒါ/ ၂၀၁၈-၁၉)ဖြင့် စိမ်းစမ်းစိုကုမ္ပဏီ၏ လုပ်ဆောင် ဆောင်ရွက်မှုအခြေအနေများကို အသိပေးအစီရင်ခံစာ တင်ပြခဲ့ပါကြောင်း၊ အစီရင်ခံစာ အပြည့်အစုံကို မေးခွန်းနှင့် အတူ ပူးတွဲတင်ပြခဲ့ပြီးဖြစ်သည့်အတွက် လိုအပ်သည့် အချက်များကိုသာ မိမိအနေဖြင့် ကောက်နုတ်တင်ပြပါမည်ဖြစ်ကြောင်း၊ အစီရင်ခံစာ အပိုဒ် ၁ တွင် ကုမ္ပဏီအနေဖြင့် လုပ်ငန်းဆောင်ရွက်ရာတွင် အချိန်နောက်ကျခြင်း၊ စက်ယန္တရားများ အသုံးပြုမှု အားနည်းခြင်း၊ အတွေ့အကြုံရှိသော အင်ဂျင်နီယာများ ငှားရမ်းကြီးကြပ်မှုအားနည်းခြင်း၊ တာဖိနပ် မထားဘဲ တာအောက်ခြေမြေကို ကပ်ပြီးမြေယူခြင်း၊ ဒီဇိုင်းတာထိပ်အမြင့်နှင့် တာလျှောစောက်အား ပုံစံကျ ဆည်မဖို့ခြင်း၊ တာနှင့်ချောင်းပိတ်လုပ်ငန်းများအတွက် တောင်မြေအစား ရွှံ့ပျော့မြေ တစ်မျိုးတည်း ကိုသာ ဆည်ဖို့ခြင်း စသဖြင့်အားနည်းခြင်းများတွေ့ရပြီး ဌာနမှ ၁၃-၅-၂၀၁၈ ရက်နေ့ ကွင်းဆင်း စစ်ဆေးရာတွင် တာပေါက်ခုနစ်ပေါက်ကို ပိတ်ဆို့ဆည်ဖို့ခြင်းမရှိသေးသဖြင့် မိုးမကျမီအပြီး ဆောင်ရွက်ရန် ညွှန်ကြားခဲ့ကြောင်းဖော်ပြထားပါကြောင်း၊ စာပိုဒ် ၂ တွင် ထိုသို့ညွှန်ကြားခဲ့သော် လည်း ကုမ္ပဏီသည် ၂၀၁၈ ခုနှစ် ဒီဇင်ဘာလကုန်မှသာ မြေတူးစက်တစ်စီးဖြင့် အင်ဂျင်နီယာ သို့မဟုတ် ကွင်းတာဝန်ခံ ကြီးကြပ်မှုမရှိဘဲ အချိန်ဆွဲပြီး ဟန်ပြသဘောမျိုးသာဆောင်ရွက်နေ ကြောင်း စစ်တွေမြို့နယ်၊ ရေအသုံးချမှုစီမံခန့်ခွဲရေးဦးစီးဌာန၊ လက်ထောက်ညွှန်ကြားရေးမှူးမှ ကွင်းဆင်းစစ်ဆေးချိန်တွင် တွေ့ရှိခဲ့ရသည်ဟု ဖော်ပြထားပါကြောင်း၊ အစီရင်ခံစာ အပိုဒ် ၅ တွင် ကုမ္ပဏီသည် လုပ်ငန်းဆောင်ရွက်နေသော မြေတူးစက်တစ်စီး၊ စက်တပ်ယာဉ်တစ်စီးအား ၂၀၁၉ ခုနှစ်ဧပြီလတွင် လုပ်ငန်းခွင်မှရွှေ့ပြောင်းသွားပြီး ဆက်လက်ဆောင်ရွက်ခြင်းမရှိတော့ကြောင်း ဖော်ပြ ထားပါကြောင်း၊ အပိုဒ် ၆ တွင် စိမ်းစမ်းစိုကုမ္ပဏီမှ ဆောင်ရွက်နေမှု လက်ရှိ အခြေအနေအား သိရှိနိုင်ပါရန်နှင့် အဆိုပါကုမ္ပဏီအား စာချုပ်ပါစည်းကမ်းများနှင့်အညီ လိုအပ်သလို တည်ဆဲဥပဒေ အရ အရေးယူဆောင်ရွက်နိုင်ရေးအတွက် အစီရင်ခံစာ တင်ပြအပ်ပါသည်ဟု ရေးသား ဖော်ပြထား ပါကြောင်း၊

ယခုလိုအခြေအနေကြောင့် မိမိတို့က နိုင်ငံ့ဘဏ္ဍာငွေများကို အမြောက်အမြား အကျိုးမရှိ အလဟဿ သဲထဲရေသွန် ဖြစ်သွားရခြင်းသည် မည်သူ့တွင်တာဝန်ရှိသည်ဆိုတာကို အထူးပြောစရာ လိုမည်မထင်ပါကြောင်း၊ ၎င်းပေါ်တွင်ရော တာပြီးမြောက်ရေးအပေါ်တွင်ပါ ပြည်ထောင်စုဝန်ကြီး ဌာန အနေဖြင့် မည်သို့ဆက်လက် ဆောင်ရွက်သွားမည်ကို သိလိုသည့် အတွက် မေးမြန်း ပါသည်။