မိမိတို့ မောင်တောမြို့နယ်၊ လေးမိုင်ရပ်ကွက် အခြေခံပညာ အထက်တန်းကျောင်း(ခွဲ)(၂)ကို ၁၉၅၁ ခုနှစ်၊ ဇွန်လ ၂၅ ရက်နေ့တွင် အ.မ.က လေးမိုင် အမည်ဖြင့် စတင်ဖွင့်လှစ်ခဲ့ပါကြောင်း၊ ၁၉၈၃-၁၉၈၄ ခုနှစ်တွင် မူလတန်းလွန်ကျောင်း၊ ၁၉၈၄ ခုနှစ်မှ ၂၀၁၃ ခုနှစ်ထိ အလယ်တန်း ကျောင်းအဆင့်အထိ ဖွင့်လှစ်ခွင့် ရရှိခဲ့ပါကြောင်း၊ ၂၀၁၃ ခုနှစ်၊ ဇွန်လ ၁၈ ရက်မှ ယနေ့ထိ အ.ထ.က(ခွဲ)အဖြစ် ဖွင့်လှစ်ထားသည့် ကျောင်း ဖြစ်ပါကြောင်း၊ ပညာသင်ကျောင်းရှိ အဆောက်အအုံ အခြေအနေနှင့် ပရိဘောဂ လုံလောက်မှု အခြေအနေကို သိရှိနိုင်စေရန် တင်ပြ သွားမည်ဖြစ်ကြောင်း၊ ကျောင်း၏ မုခ်ဦး၊ ကျောင်းအုပ်ကြီး ရုံးခန်းနှင့် အထက်တန်း ကျောင်းအဆင့် (၁၅၀ x ၃၀) ပေ RC တစ်ထပ်၊ အလယ်တန်းအဆင့် (၁၈၀ x ၃၀)ပေ RC တစ်ထပ်၊ KG အတန်းနှင့် မူလတန်းအဆင့် သင်ကြားမည့် RC တစ်ထပ်၊ တိုးချဲ့ဆောင်အနေဖြင့် ဖွင့်ထားသည့် အဆောင် ဖြစ်ပါကြောင်း၊ Assembly အနေဖြင့် ကျောင်းသားများ စုဝေးပွဲ ဖြစ်ကြောင်း၊ လက်ရှိကျောင်းတွင် ပညာသင်ကြားပေးနေသည့် ဆရာဆရာမ အင်အားသည် မူလတန်းအဆင့်တွင် ခုနစ်ဦး၊ အလယ်တန်းအဆင့်တွင် ၁၃ ဦး၊ အထက်တန်းပြအဆင့်တွင် ခြောက်ဦး၊ ရုံးဝန်ထမ်း သုံးဦးဖြင့် လည်ပတ်နေသည့် အခြေအနေ ဖြစ်ပါပါကြောင်း၊ ကျောင်းဝန်ထမ်း အင်အားစာရင်းရှိပါကြောင်း၊ ကျောင်း၏ သုံးနှစ်ဆက်တိုက် ကျောင်းသား ကျောင်းသူများစာရင်းရှိ တက္ကသိုလ်ဝင်တန်း စာမေးပွဲ အောင်စာရင်း အောင်ချက် ရာခိုင်နှုန်းကို ကြည့်မည်ဆိုပါက ၂၀၁၆-၂၀၁၇ ပညာသင်နှစ်တွင် ၅၅ ဦး ဖြေပြီး အောင်ချက်သည် ငါးဦးသာ အောင်သည့်အတွက် ၉.၄ ရာခိုင်နှုန်းသာ ရခဲ့ပါကြောင်း၊ ၂၀၁၇-၂၀၁၈ ပညာသင်နှစ်တွင် ၂၀ ရာခိုင်နှုန်း၊  ၂၀၁၈-၂၀၁၉ ပညာသင်နှစ်တွင် ၁၂.၉ ရာခိုင်နှုန်း ရှိခဲ့ပါကြောင်း၊

မောင်တောမြို့ လေးမိုင်ရပ်ကွက်တွင် ရွာသိမ်၊ ရွာငယ်ပေါင်း ကိုးရွာ၊ လူဦးရေပေါင်း ၅၀၀၀ ကျော် နေထိုင်ပြီး ပတ်ဝန်းကျင် ၁၂ ရွာတွင် အ.မ.က(ခွဲ)တစ်ကျောင်း၊ မူလတန်းလွန်ကျောင်း နှစ်ကျောင်း၊ မြို့မကျောင်းနှင့် လေးမိုင်ကျော် ကွာဝေးသည့် မြို့နယ် ဆင်ခြေဖုံး ရပ်ကွက်တစ်ခု ဖြစ်ပါကြောင်း၊ ရပ်ကွက်အတွင်းတွင် ၂၀၁၆-၂၀၁၇ ခုနှစ် ARSA အကြမ်းဖက်ကြောင့် နယ်စပ်တစ်လျှောက်တွင် နေထိုင်ကြသည့် တိုင်းရင်းသားများသည် နေရပ်မှ စွန့်ခွာပြီး လုံခြုံမှု ရှိသည့် ဆက်သွယ်မှု ကောင်းမွန်သည့် နေရာကို လာရောက်ပြီး နေထိုင်ကြသည့် ဗမာ၊ ရခိုင်၊ သက်၊ မြို၊ ဒိုင်းနက် အစရှိသည့် တိုင်းရင်းသားပေါင်းစုံ အပါအဝင် ဟိန္ဒူ၊ ဘင်္ဂါလီ အစရှိသည့် လူမျိုးများပါ အေးချမ်းစွာ ပညာသင်ကြားနေသည့် ရပ်ကွက်ရှိ ကျောင်းတစ်ကျောင်း ဖြစ်ပါကြောင်း၊ တစ်မြို့နယ်လုံးတွင် ပဋိပက္ခကြောင့် အချို့ကျောင်းများကို ပိတ်ထားရသော်လည်း ယခုရပ်ကွက်သည် ပညာသင်ကြားခြင်းကို ဆက်လက် ဆောင်ရွက်ထားနိုင်သည့် လုံခြုံရေးအခြေအနေ ကောင်းမွန်သည့် ရပ်ကွက်တစ်ခု ဖြစ်ပါကြောင်း၊ ထို့ကြောင့် ရပ်ကွက်အတွင်းရှိ အ.ထ.က(ခွဲ)ကျောင်းကို (၆)နှစ်တာ ကာလတိုင်အောင် အထက်တန်းပညာကို သင်ကြားခွင့်ရခဲ့သော်လည်း အထက်တန်းကျောင်း၏ အင်္ဂါရပ်နှင့်အညီ စီမံခန့်ခွဲမှု လုပ်ပိုင်ခွင့်၊ ဆရာဆရာမအင်အား ပြည့်စုံမှု မရှိခြင်းကြောင့် အောင်ချက်ရာခိုင်နှုန်းသည် အလွန်ကျဆင်းနေသည့်အတွက် ရပ်ကွက်နေ ကျောင်းအကျိုးတော်ဆောင် ကျောင်းသားမိဘများက အထက်တန်းကျောင်းအဆင့်ကို  ၂၀၂၀-၂၀၂၁ ပညာသင် နှစ်တွင် တိုးမြှင့်ပေးနိုင်ရန် အစီအစဉ် ရှိ/မရှိ သိရှိလိုပါကြောင်း မေးမြန်းပါသည်။