ဗက်တီဗာမြက်သည် အိန္ဒိယနိုင်ငံ(တောင်ပိုင်း)မျိုးရင်း မြက်တစ်မျိုးဖြစ်ပြီး နှစ်ရှည်ပင်မြက်မျိုးလည်းဖြစ်ပါကြောင်း၊ ကောင်းစွာဖွံ့ဖြိုးရန်အချိန် ခြောက်လခန့်လိုပါကြောင်း၊ ၎င်း၏အမြစ်များသည် စိုက်ပျိုးသည့် မြေအနေအထားပေါ်မူတည်၍ ခြောက်ပေခွဲ ကနေ ၁၃ ပေခန့်အထိ မြေပြင်၏အတွင်း ရှည်လျားဆန့်ထွက်နိုင်သည့် စရိုက်လက္ခဏာရှိပါကြောင်း၊ ထူးခြားသည့်အမြစ်များကြောင့် ဗက်တီဗာမြက်ကို ရေပြင်ညီ အတန်းလိုက် စိုက်ပျိုးလျင် မြက်ရိုးတန်းများသည် သဘာဝမြေထိန်းနံရံများသဖွယ် အကာအကွယ်ပေးနိုင်မည်ဖြစ်ကြောင်း၊

အိန္ဒိယနိုင်ငံအနေဖြင့် ဗက်တီဗာမြက်ကို မြေတိုက်စားပြုန်းတီးမှုအား ကာကွယ်ရန်အတွက် စိုက်ပျိုးအသုံးပြုခဲ့ကြသည်မှာ ရာစုနှစ်ပေါင်းများစွာကြာခဲ့ပြီဖြစ်ကြောင်း၊ ၂၀၁၇ ခုနှစ်တွင်  ဗက်တီဗာမြက်စိုက်ပျိုးခြင်းကို အိန္ဒိယနိုင်ငံမှ အုပ်ချုပ်ရေးပိုင်းကိုဦးဆောင်ပြီး စုပေါင်းစိုက်ပျိုးခဲ့ ပါကြောင်း၊ ထိုင်းနိုင်ငံအနေဖြင့် ဗက်တီဗာမြက်အား စိတ်ပါဝင်စားမှုရှိခြင်းနှင့် စိုက်ပျိုးအသုံးချ ခဲ့ခြင်းသည် နှစ်ကာလတစ်ခုရှိခဲ့ပြီဖြစ်ကြောင်း၊ လာမည့်အောက်တိုဘာလတွင် ထိုင်းနိုင်ငံ၌ ကမ္ဘာအရပ်ရပ်မှ ဗက်တီဗာမြက်စိုက်ပျိုးအသုံးချခြင်းကို စိတ်ဝင်စားသည့် လူပုဂ္ဂိုလ်အသီးသီး တက်ရောက်ဆွေးနွေးကြမည့် ဗက်တီဗာညီလာခံတစ်ခုကို ကျင်းပရန်ရှိနေပါကြောင်း၊          မိမိတို့နိုင်ငံတွင် ၁၉၉၆ ခုနှစ်၊ ၁၉၉၇ ခုနှစ်၊ ၁၉၉၈ ခုနှစ်များကတည်းက UNDP နှင့် FAO တို့ပြုလုပ်သည့်စီမံကိန်းတစ်ခုအတွင်း ရှမ်းပြည်နယ်တွင် ဗက်တီဗာမြက်ကို စတင် စမ်းသပ်စိုက်ပျိုး ခဲ့ပါကြောင်း၊ ၎င်းကို ချင်းပြည်နယ်၊ ဟားခါးမြို့နှင့် ဖလမ်းမြို့တွင် စတင်စမ်းသပ်စိုက်ပျိုးခဲ့ပြီး ဖြစ်ကြောင်း၊ မိမိတို့ ရွှေဘိုမြို့၊ မူးမြစ်ကမ်းပါးတွင်ရှိသည့် ကျေးရွာများတွင် ကမ်းပါးပြိုကျနိုင်ဖွယ်ရာ အလားအလာရှိသည့်နေရာများ အမြောက်အမြားရှိနေပါကြောင်း၊ ၂၀၁၅ ခုနှစ် ဇူလိုင်လတွင် ဖြစ်ခဲ့သည့် ရေကြီးရေလျှံမှုဖြစ်စဉ်တွင် မိမိတို့ရွှေဘိုမြို့နယ်သည် ဆုံးရှုံးထိခိုက်မှု အများအပြား ရှိခဲ့ပါကြောင်း၊ ထိုသို့ဆုံးရှုံးနိုင်ဖွယ်ရှိသည့် မြစ်ကမ်းပါးပြိုကျမှုများအတွက် နှစ်ပိုင်းခွဲပြီး ဆောင် ရွက်ပါကြောင်း၊ ပထမတစ်ပိုင်းအနေဖြင့် ယနေ့၊ မနက်ဖြန် အန္တရာယ်ရှိနိုင်သည့် နေရာများ အတွက် နိုင်ငံတော်အစိုးရထံမှ ရန်ပုံငွေတင်ပြတောင်းခံပြီး ဆောင်ရွက်စေပါကြောင်း၊ ယခုနှစ်ဘတ်ဂျက် အတွင်းတွင် တိုင်းဒေသကြီးရန်ပုံငွေမှရရှိထားသည့် ကမ်းထိန်းလုပ်ငန်းကို ရွှေဘိုမြို့နယ်တွင် ရရှိထားပါကြောင်း၊ နောက်တစ်ပိုင်းမှာ လူထုအားကိုယူပြီး ရေရှည်ကမ်းထိန်းလုပ်ငန်းအနေနှင့် ဗက်တီဗာမြက်ကို စုပေါင်း စိုက်ပျိုးထားရန် ရည်ရွယ်ပါကြောင်း၊

          မိမိတို့နိုင်ငံသည် မြစ်၊ ချောင်း၊ အင်းအိုင်ပေါများသည့် နိုင်ငံဖြစ်သည့်အတွက် မြစ်ကမ်းပါး၊ ချောင်းကမ်းပါးဘေးတွင် အခြေချနေထိုင်ကြသည့် ကျေးရွာသည် အများအပြားရှိ ပါကြောင်း၊ ၎င်းကျေးရွာများအတွက် မဖြစ်မနေဆောင်ရွက်ရမည့် ကမ်းပြိုကာကွယ်ရေးလုပ်ငန်းများ အတွက် မိမိတို့အသုံးပြုရသည့် တိုင်းပြည် ဘဏ္ဍာငွေသည် တစ်နှစ်ထက်တစ်နှစ် များပြားလာ နေပါပြီဖြစ်ပါကြောင်း၊ ဥပမာအားဖြင့် ယခုနှစ်တွင် မန္တလေးတိုင်းဒေသကြီးတစ်ခုတည်း အတွင်းတွင် တိုင်းဒေသကြီးအတွင်းမှာရှိသည့် ကျေးရွာတချို့အတွက် လျာထားအသုံးပြုရမည့် ကမ်းပြိုကာ ကွယ်ရေးလုပ်ငန်းအတွက် သတ်မှတ်ထားသည့်ငွေသည် ကျပ်သန်း ၅၃၀၀ ကျော်ပါကြောင်း၊ မန္တလေးတိုင်းဒေသကြီးတွင် ၂၀၁၈-၂၀၁၉ ခုနှစ် အတွင်း ကျပ်သန်း ၅၂၀၀ ကျော်ကို အသုံးပြုခဲ့ပြီးဖြစ်ပါကြောင်း၊ ဆက်ပြီးလေ့လာကြည့်မည်ဆိုပါက တစ်နှစ်ထက်တစ်နှစ် မိမိတို့နိုင်ငံ တွင် ကမ်းပြိုကာကွယ်ရေးအတွက် အသုံးပြုရသည့် ငွေကြေးသည် များပြားလာ မည်ဖြစ်ပါကြောင်း၊ ထို့ကြောင့် ယခု လတ်တလောအန္တရာယ်ရှိနိုင်သည့် နေရာများအတွက် ယခုကဲ့သို့ နိုင်ငံတော်အစိုးရထံမှ ရန်ပုံငွေများတင်ပြတောင်းခံ ဆောင်ရွက်ပေးသင့်သကဲ့သို့ ရေရှည်တွင် ကမ်းပြိုကာကွယ်ရေးအတွက် ကုန်ကျစရိတ်လည်း နည်းပါးသည့် လူတိုင်းပါဝင်နိုင်သည့် ဗက်တီဗာကမ်းထိန်းမြက်စိုက်ပျိုးခြင်းကို ဆောင်ရွက်ပေး စေချင်သည့်အတွက် မိမိအနေဖြင့် လွှတ်တော်ဥက္ကဋ္ဌကြီးမှတစ်ဆင့် တလေးတစားမေးမြန်းလိုတာက ရေရှည်မှာအကျိုးရှိမှုလည်း သေချာသည့်၊ ကုန်ကျစရိတ်လည်းနည်းပါးသည့်၊ လူတိုင်းလည်းပါဝင်နိုင်၊ အလွယ်တကူဆောင်ရွက်နိုင်သည့် ဗက်တီဗာကမ်းထိန်းမြက်စိုက်ပျိုးခြင်းကို နိုင်ငံတော်အစိုးရမှ ဦးဆောင် စီမံစိုက်ပျိုးရန် အစီအစဉ် အစီအစဉ်ရှိ/မရှိနှင့်စပ်လျဉ်းသည့် မေးခွန်းမေးမြန်းပါသည်။