မြန်မာနိုင်ငံသည် စိုက်ပျိုးရေးကိုအခြေခံသော နိုင်ငံဖြစ်သည်နှင့်အညီ မျိုးကောင်းမျိုးသန့်များရရှိရေးမှာ အထူးလိုအပ်လျက်ရှိပါကြောင်း၊ မြန်မာနိုင်ငံ၏ အဓိကသီးနှံဖြစ်သော စပါးသည် နွေ၊ မိုးစိုက်ဧက သန်း ၂၀ ခန့်ရှိရာ မျိုးစပါးတင်း သန်း ၃၀ ခန့် နှစ်စဉ်လိုအပ်လျက်ရှိပါကြောင်း၊ အထူးအထွက်ကောင်းမျိုးဖြစ်သော စိုက်ပျိုးစပါးများကို ရေတော်၊ မိုးတော်မှသာ စိုက်ပျိုးနိုင်ခြင်း၊ သိပ္ပံနည်းကျဖြစ်သာ စိုက်ပျိုးနိုင်ခြင်း၊ မျိုးဈေးကြီးမြင့်ခြင်း၊ မျိုးအဖြစ်ပြန်လည် အသုံးပြု၍မရခြင်း၊ တောင်သူလယ်သမားအများစုနှင်‌့ ရင်းနှီးကျွမ်းဝင်မှုမရှိခြင်း၊ ဒေသဈေးကွက်နှင့် တွက်ခြေကိုက်မှုမရှိခြင်းတို့ကြောင့် မျိုးပြန်လည်ရယူနိုင်သော အထွက်ကောင်းမျိုးစေ့၊ မျိုးသန့်များကိုသာ တောင်သူလယ်သမားအများစုမှာ လိုအပ်လျက်ရှိပါကြောင်း၊ ဝန်ကြီးဌာနအနေဖြင့် တစ်နိုင်ငံလုံး၏ လိုအပ်ချက်ကို ဖြည့်ဆည်းပေးနိုင်ရန်လည်း လွယ်ကူသည့်လုပ်ငန်း မဟုတ်ပါကြောင်း၊ တိုင်းဒေသကြီး/ပြည်နယ်အလိုက် ဒေသလိုအပ်လျက်သော မျိုးသန့်စပါးများကို ဖြန့်ဖြူးနိုင်ရန် စိုက်ပျိုးရေးပညာရှင်များနှင့် မျိုးစေ့ထုတ်ခြံများ တိုးချဲ့ဆောင်ရွက်သွားမည်ဆိုပါက ပိုမိုသင်‌့တော်မည်ဖြစ်ပါ၍ တောင်သူလယ်သမားများ အမှန်တစ်ကယ် လိုအပ်လျက်ရှိသော အထွက်ကောင်းမျိုးသန့်များကို လုံလောက်စွာရရှိနိုင်ရေးအတွက် မည်ကဲ့သို့အစီအမံများ ပြုလုပ်ထားသည်ကို သိရှိလိုကြောင်း မေးမြန်းပါသည်။