(ခ)-ကြို့ပင်ကောက်မြို့နယ်၊အထက်တန်းကျောင်း (၃)ကျောင်းအနက်ဝိဇ္ဇာဘာသာတွဲသင်ကြားပေးနိုင် မည့် အထက်တန်းကျောင်းကိုလာမည့်၂၀၁၇-၁၈ ပညာသင်နှစ်မှစ၍ စီမံဆောင်ရွက်ပေးနိုင်ပါရန် အစီအစဉ် ရှိ/မရှိနှင့် စပ်လျဉ်းသည့် မေးခွန်း
ပဲခူးတိုင်းဒေသကြီး၊ ကြို့ပင်ကောက်မြို့နယ်တွင် အထက်တန်း ကျောင်းလေးကျောင်းရှိပြီး အ.ထ.က (ခွဲ) (၆)ကျောင်း ရှိပါကြောင်း၊ အထက်တန်းအဆင့်တွင် ဘာသာတွဲရှစ်တွဲ ရှိသည့်အနက် မိမိ နှစ်သက်ရာ၊ စိတ်ဝင်စားရာဘာသာတွဲကို ရွေးချယ်တက်ရောက် သင်ကြားခွင့်ရပါကြောင်း၊ သို့သော် မြို့ပေါ်အထက်တန်းကျောင်းအားလုံးတွင် သက်ဆိုင်ရာ ဝိဇ္ဇာဘာသာတွဲသင်ကြားပေးမည့် ဆရာဆရာမလိုအပ်ချက်ကြောင့် ဝိဇ္ဇာဘာသာတွဲသင်ယူခွင့် မရခဲ့ပါကြောင်း၊ အဋ္ဌမတန်းအောင်မြင်ပြီး နဝမတန်းသို့ မတက်ရောက်မီ ဘာသာတွဲရွေးချယ်ရာတွင် မိမိနှစ်သက်ရာ၊ စိတ်ဝင်စားရာ၊ အားသာရာ ဝိဇ္ဇာဘာသာတွဲတက်ရောက်လိုသော်လည်း ရွေးချယ်ခွင့်မရခဲ့ပါကြောင်း၊ သို့ဖြစ်ပါ၍ လာမည့် ၂၀၁၇-၁၈ ပညာသင်နှစ်မှစ၍ ကြို့ပင်ကောက်မြို့နယ် မြို့ပေါ်အထက်တန်းကျောင်း သုံးကျောင်းအနက် ဝိဇ္ဇာဘာသာတွဲသင်ကြားပေးနိုင်မည့် အထက်တန်းကျောင်း စီစဉ်ဆောင်ရွက်ပေး နိုင်ပါရန် အစီအစဉ်ရှိ/မရှိကို သိလိုပါကြောင်းမေးမြန်းပါသည်။