ဆောက်လုပ်ရေးဝန်ကြီးဌာနက ကန်ထရိုက်စနစ်နှင့် လုပ်ငန်းများဆောင်ရွက်သည့်နေရာတွင် လိုက်နာ ကျင့်သုံးရမည့် လုပ်ငန်းလမ်းညွှန်ကို ၆-၉-၂၀၁၆ ရက်နေ့က ထုတ်ပြန်ကြေညာခဲ့ပါကြောင်း၊ မြို့နယ် အလိုက် ပြုစုထားရှိရမည့် ဈေးနှုန်းစာအုပ်ထားရန်နှင့် ဒေသအာဏာပိုင်များထံ တင်ပြ အတည်ပြု ထားရန်လည်း လမ်းညွှန်ခဲ့ပါကြောင်း၊ သို့သော် ဈေးနှုန်းများအနည်းအများ ကွာဟနေသည်ကို တွေ့ရှိရခြင်းအပေါ်လည်း မည်သည့်အတွက်ကြောင့် ဈေးနှုန်းကွာဟချက်များရှိနေသည်ကို သိရှိလိုပါ ကြောင်း၊ ထို့ပြင် ဘိလပ်မြေခံနိုင်အားနှင့် ပတ်သက်၍ မည်ကဲ့သို့ စမ်းသပ်နေသည်နှင့် မည်သူက တာဝန်ယူဆောင်ရွက်နေသည်ကိုလည်း သိရှိလိုပါကြောင်း၊

ကန်ထရိုက်လုပ်ငန်း၏ အဓိကရည်ရွယ်ချက်သည် ဈေးနှုန်းပြိုင်ဆိုင်ပြီး ကုန်ကျစရိတ်သက်သာရန် ဖြစ်ပါကြောင်း၊ ၎င်းနေရာတွင် ခန့်မှန်းခြေစာရင်းများကို ခန့်မှန်းရန်အတွက် သန်း ၅၀၊ သန်း ၁၀၀၊ သန်း ၂၀၀၊ သန်း ၃၀၀နှင့် အထက်ဆိုပြီး သက်ဆိုင်ရာပညာရှင်များအား ခန့်မှန်းစာရင်းများနှင့် ပတ်သက်၍ တာဝန်ပေးထားခြင်း ရှိပါကြောင်း၊ Estimate များတွက်ချက်ရာတွင် ဈေးနှုန်းများ မြင့်မား နေသည်ဆိုပါက သက်ဆိုင်ရာပညာရှင်များက တာဝန်ယူမည်လားဆိုသည်ကို သိရှိလိုပါကြောင်း၊  

ကျပ် ၁၀ သန်းမှ သန်း ၁၀၀ အထိကို ခရိုင်အုပ်ချုပ်ရေးမှူး၊ မြို့နယ်အုပ်ချုပ်ရေးမှူးရုံးများတွင် အိတ်ဖွင်‌့တင်ဒါအတွက် ကြော်ငြာပေးရန်နှင့် တင်ဒါရွေးချယ်ချိန်တွင်လည်း သက်ဆိုင်ရာဌာနမှ တာဝန်ရှိများနှင့်အတူ ခရိုင်အုပ်ချုပ်ရေးမှူး၊ မြို့နယ်အုပ်ချုပ်ရေးမှူးနှင့် အခြားသော ပြင်ပအဖွဲ့ အစည်းက အနည်းဆုံးသုံးဦး ပါဝင်ရမည်ဟု ပြောထားသည့်အတွက် တင်ဒါခေါ်ယူသည့် ကိစ္စရပ်များ ကို ခရိုင်ရုံးများတွင်လည်း ဆောင်ရွက်နိုင်သည့်နည်းတူ ခရိုင်ကဦးစီးပြီး မြို့နယ်တွင် လုပ်ပေးနိုင် မည်ဆိုပါက တင်ဒါရွေးချယ်ရေးအဖွဲ့၊ မြို့နယ်တည်ကော်၊ ကုမ္ပဏီတို့အကြား ဒေသခံများ၏ ထိတွေ့မှုကို ပိုမိုဂရုစိုက်ထိန်းကျောင်းနိုင်မည် ဖြစ်ပါကြောင်း၊ သို့သော်လည်း ယခုလက်ရှိ အခြေ အနေထိ ပြည်နယ်များတွင်သာ ပြုလုပ်သွားသည်ကို တွေ့ရှိရပါကြောင်း၊

ထိုသို့ဆောင်ရွက်ရာတွင် သက်ဆိုင်ရာ အစိုးရမဟုတ်လျှင် အစိုးရအဖွဲ့၏ ဝန်ထမ်းအကြီးအကဲများမှ တင်ဒါနှင့်ပတ်သက်ပြီး အရည်အချင်းပြည့်ဝမှုကို ဆောင်ရွက်မှုရှိ/မရှိ စစ်ဆေးအတည်ပြုပြီးမှ လက်ခံရန်ဟူ၍ တာဝန်ပေးအပ်ထားခြင်း ရှိပါကြောင်း၊ ထိုသို့တာဝန်ပေးအပ်ရာတွင်လည်း အစိုးရ အဖွဲ့အစည်း၏ ဝန်ထမ်းအကြီးအကဲသည် ၎င်းကိစ္စကိုနားမလည်ဘဲ တာဝန်ခံရမည်ဆိုပါက ဝန်ထမ်း များအတွက် အဆင်ပြေခြင်း မရှိပါကြောင်း၊

တင်ဒါလုပ်ငန်းများက စာချုပ်ပါအတိုင်းမဖြစ်သည့်အချိန်အခါမျိုးတွင် ကုမ္ပဏီများကို မည်သူနှင့် မည်သည့်အဖွဲ့က မည်သို့တာဝန်ယူဖြေရှင်းကြမည်ကို သိရှိလိုပါကြောင်း မေးမြန်းပါသည်။