မင်္ဂလာဈေးသည် ၂၀၁၀ ခုနှစ် မေလတွင် ပထမအကြိမ် မီးလောင်ကျွမ်းခဲ့သည့်အတွက် ဈေး၏ အပေါ်ထပ်သုံးလွှာကို ပြန်လည်မွမ်းမံပြင်ဆင်ပြီး တစ်နှစ်ကျော် အကြာတွင် ဈေး ကို ပြန်လည်ဖွင့်လှစ် ရောင်းချလာခဲ့ ပါကြောင်း၊ ထို့နောက် ၈-၁-၂၀၁၆ ရက်နေ့တွင် မင်္ဂလာဈေးကို ဒုတိယ တစ်ကြိမ် မီးလောင်ကျွမ်းမှု ထပ်မံဖြစ်ပွားခဲ့သည့်အတွက် ဈေးသူဈေးသားများအနေဖြင့် လွန်စွာမှထိခိုက်နစ်နာ လျက်ရှိပါကြောင်း၊ မင်္ဂလာဈေးတွင်  ဆိုင်ခန်းအားလုံး ၄၀၀၀ ကျော်ရှိပြီး မီးလောင်ကျွမ်းဆုံးရှုံး ရသည့်ဆိုင်ခန်းအရေအတွက်မှာ  ၁၆၀၀ ကျော်ရှိပါကြောင်း၊ ယခုအချိန်တွင်  ဈေးသူဈေးသား များအနေဖြင့် အခြားသတ်မှတ်နေရာများတွင်  ဖွင့်လှစ်ရောင်းချခြင်းကြောင့် နွေရာသီနှင့် မိုးရာသီအချိန် များတွင် အခက်အခဲများနှင့် တွေ့ကြုံနေကြရပါကြောင်း၊ ဈေးဆိုင်များသည်လည်း လုံခြုံမှုမရှိခြင်းကြောင့် ဖောက် ထွင်းခံနေရခြင်း၊ ဈေးကိုမှီခိုအားထားနေရသည့် မိသားစုမြောက်များစွာအနေဖြင့်လည်း အခက်အခဲပေါင်းများစွာနှင့် ရင်ဆိုင်ကြုံတွေ့နေရပါကြောင်း၊ ၂၈-၁-၂၀၁၆ ရက်နေ့တွင်  ဈေးအဆောက်အဦ ကြံ့ခိုင်မှုအခြေအနေကို အင်ဂျင်နီယာအဖွဲ့မှ စိစစ်ပြီးဖြစ်သော်လည်း ယခုခြောက်လခန့်ကြာမြင့်သည့်အချိန်ထိ မည်သို့စီမံဆောင်ရွက်မည်ဆိုသည်ကိုလည်း ရှင်းလင်းစွာ သိရှိရခြင်း မရှိသေးပါကြောင်း၊ ဈေးကို (၁)  မည်သည့်အချိန်တွင် စတင် တည်ဆောက်မည်ကို လည်းကောင်း၊ (၂) မည်ကဲ့သို့ တည်ဆောက်မည်ကိုလည်းကောင်း၊ တည်ဆောက်ရာတွင်လည်း ယခင်ကဲ့သို့ မွမ်းမံပြင်ဆင် ဆောက်လုပ်မည် (သို့မဟုတ်) အသစ်ပြန်လည်တည်ဆောက်မည်ကို လည်းကောင်း၊ (၃) ဆောက်လုပ်ချိန်မည်မျှကြာမြင့်မည်ဆိုသည်ကိုလည်းကောင်း သိရှိလိုပါကြောင်း မေးမြန်းပါသည်။