ချင်းပြည်နယ်သည် မြန်မာနိုင်ငံ၏ အဆင်းရဲဆုံးပြည်နယ် ဖြစ်သည့်အတွက် လမ်းပန်းဆက်သွယ်ရေး မကောင်းခြင်း၊ လျှပ်စစ်မီးမကောင်းခြင်းနှင့် ဖုန်းလိုင်းဆက်သွယ်ရေးမကောင်းခြင်းနှင့် ပညာရေးတွင်လည်း အနိမ့်ဆုံးအခြေအနေ ဖြစ်နေပါကြောင်း၊ ၂၀၁၇-၁၈ ခုနှစ် ပညာသင်နှစ်တွင် မြန်မာနိုင်ငံတစ်နိုင်ငံလုံး အောင်ချက်ရာခိုင်နှုန်းက ၃၇ ရာခိုင်နှုန်းရှိခဲ့သော်လည်း ချင်းပြည်နယ်တွင် ၁၇ ရာခိုင်နှုန်းရှိပြီး မတူပီမြို့နယ်မှာ ၇ ရာခိုင်နှုန်းသာ ရှိနေပါကြောင်း၊ ထိုသို့ ဖြစ်နေသည်မှာ သက်ဆိုင်ရာဘာသာပြ ဆရာ/မများ လုံလောက်စွာမရှိခြင်းနှင့် ကျောင်းဆောင်မလုံလောက်မှုဖြစ်နေပါကြောင်း၊ ယနှစ်တွင် ကျောင်းသားပေါင်း ၃၈၀ ကျော်အထိ လက်ခံထားပြီး ကျောင်းသားများ တိုးပွားလာခြင်းကြောင့် ပေ ၁၀၀ ထ ပေ ၃၀ ကျောင်းဆောင်တစ်ဆောင် တည်းသာရှိပါကြောင်း၊ KG ကျောင်းဆောင်မရှိသည့်အတွက်ကြောင့် KG အတန်းမှ အဋ္ဌမတန်းအထိ အတန်းပေါင်း ၉ တန်းရှိသော်လည်း မဆံ့သည့်အတွက်ကြောင့် KG တန်းကို ရွက်ဖျဉ်တဲထိုးပြီးမှ အောက်တွင် တမံတလင်းခင်းပြီး ကျောင်းတက်ခိုင်းရပါကြောင်း၊ ထို့ကြောင့် ကျောင်းဆောင်မလုံလောက်သည့်အတွက် ကျောင်းအကျိုးတော်ဆောင်အဖွဲ့နှင့် မိဘပြည်သူများ ပူးပေါင်းပြီး သွပ်မိုးသွပ်ကာကျောင်းဆောင်သစ် တည်ဆောက်ရသည့်အနေ အထားရှိပါကြောင်း၊ မတူပီ အရှေ့ခိုဘွေအ.လ.က ကျောင်း (ခွဲ) ၏ ကျောင်းဆောင်သည် မနှစ်တုန်းက KG ကျောင်းကို ရွက်ဖျဉ်တဲနှင့်ဆောက်လုပ် ထားခြင်းဖြစ်ပါကြောင်း၊ သို့ဖြစ်ပါ၍ အ.လ.က(ခွဲ) အရှေ့ခိုဘွေကျောင်းဆောင်အား ပေ ၁၀၀ထ ပေ ၃၀ နှစ်ထပ်ဆောင် RCC ဖြင့် တည်ဆောက်ပေးရန် အစီအစဉ်ရှိ/မရှိနှင့် ကျောင်းအဆင့်တိုးမြှင့်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။