သား/ငါးကဏ္ဍမှာ အသား၊ နို့နှင့် ဥထုတ်လုပ်မှုဆိုင်ရာ အမျိုးသားစီမံကိန်းနှင့် စီးပွားရေး အချက်အလက်များ အမှန်တွက်ချက်ရယူနိုင်ရန်အတွက် ၁၉၉၂-၉၃ ခုနှစ်က မြေပြင်အမှန် မွေးမြူရေး တိရစ္ဆာန်ကောင်ရေများကို ဝန်ကြီးဌာနမှ စီမံချက်ချလျက် ကွင်းဆင်းဆောင်ရွက်ခဲ့ပါကြောင်း၊ သို့သော် မွေးမြူရေး၊ ရေလုပ်ငန်းနှင့် ကျေးလက်ဒေသဖွံ့ဖြိုးရေး ဝန်ကြီးဌာန၏ Myanmar Livestock Statistic ၂၀၁၄ ပါ အချက်အလက်များအရ တိုင်းဒေသကြီးနှင့် ပြည်နယ်အလိုက် ဖော်ပြထားပါသော တိရစ္ဆာန်မွေးမြူထားရှိမှု ကောင်ရေစာရင်းများသည် ၂၀၀၇-၂၀၀၈ ခုဘဏ္ဍာနှစ် ကိန်းဂဏန်းများကို စတင်အခြေခံလျက် နှစ်အလိုက်တိုးတက်မွေးမြူနိုင်မှု အခြေအနေများအား တွက်ချက်တင်ပြထားသည်ကို တွေ့ရှိရပါကြောင်း၊ ပြည်တွင်းအသားတင် ထုတ်လုပ်မှုဖြစ်သည့် အသား၊ နို့နှင့် ဥထုတ်လုပ်မှု အချက်အလက်များ အပါအဝင် ပြည်ပသို့ Normal Trade, Border Trade အလိုက် တင်ပို့ပြီးနိုင်ငံခြား ဝင်ငွေရရှိနိုင်ခဲ့သော  တိရစ္ဆာန်နှင့် တိရစ္ဆာန်ထွက်ပစ္စည်းများ တင်ပို့နိုင်မှု အချက်အလက်များသည်လည်း ၂၀၀၇-၂၀၀၈ ဘဏ္ဍာနှစ် ကိန်းဂဏန်းများကို အခြေခံလျက် နှစ်အလိုက် တိုးတက်ထုတ်လုပ်နိုင်မှုကို၊ တွက်ချက်ထားသည်ကို တွေ့ရှိရပါကြောင်း၊ ဥပမာ-နွား မွေးမြူထားရှိမှုအခြေအနေမှာ ၂၀၀၇-၂၀၀၈ ခုနှစ်တွင် အကောင်ရေသိန်းပေါင်း ၁၂၆.၃၂ ဖြစ်ပြီး ၂၀၁၃-၁၄ ခုနှစ်မှာ အကောင်ရေသိန်းပေါင်း ၁၅၄.၈၁ ဟု ဖော်ပြထားသည်ကို တွေ့ရှိရပါကြောင်း၊ အသားထုတ်လုပ်နိုင်မှု အခြေအနေသည်လည်း ၂၀၀၈-၂၀၀၉ ခုနှစ် မက်ထရစ်တန်ထောင် ပေါင်း ၁၅၄၆.၈၁ ဖြစ်ပြီး ၂၀၁၃-၁၄ ခုနှစ်တွင် မက်ထရစ်တန်ထောင်ပေါင်း ၂၄၉၂.၄ ဟုဖော်ပြထားသည်ကိုလည်း တွေ့ရှိရပါကြောင်း၊ ဥထုတ်လုပ်နိုင်မှု အခြေအနေ၊ နို့ထုတ်လုပ်နိုင်မှု အခြေအနေများမှာလည်း ၂၀၀၈-၂၀၀၉ ကိန်းဂဏန်းများကို အခြေခံပြီး တွက်ချက်ဖော်ပြထားသည်ကို တွေ့ရှိရပါကြောင်း၊ ပြည်ပသို့ တိရစ္ဆာန်နှင့် တိရစ္ဆာန်ထွက်ပစ္စည်းများ ထုတ်လုပ်တင်ပို့နိုင်မှု အခြေအနေမှာ ၂၀၁၃-၁၄ ခုနှစ်တွင် လက်ရှိဝင်ငွေ အမေရိကန်ဒေါ်လာသန်းပေါင်း ၅.၄၀၄ ဟု ဖော်ပြထားသည်ကို တွေ့ရှိရပါကြောင်း၊ နိုင်ငံအတွက်အရေးပါသော အသား၊ နို့ထုတ်လုပ်နိုင်မှု၊ တိရစ္ဆာန်နှင့် တိရစ္ဆာန်ထွက် ပစ္စည်းများ တင်ပို့နိုင်မှုစသော စီးပွားရေးဆိုင်ရာ အချက်အလက်များကို တွက်ချက်ရာတွင် မြေပြင်အမှန် မွေးတိရစ္ဆာန် ကောင်ရေစာရင်းများကို တွက်ချက်မှသာ မှန်ကန်သော ကိန်းဂဏန်းများဖြင့် နိုင်ငံဖွံ့ဖြိုး တိုးတက်မှုအမှန်ကို သိရှိကြရမည်ဖြစ်ပါကြောင်း၊

သား/ငါးကဏ္ဍအတွက် တွက်ချက်ရာတွင် အခြေခံအသုံးပြုသော မြေပြင်အမှန်မွေးမြူ တိရစ္ဆာန်ကောင်ရေစာရင်းမှာ စီမံချက်ချမှတ်ပြီး ကွင်းဆင်းကောက်ယူထားသောအမှန် ကောင်ရေစာရင်း ဖြစ်ပါသလား သို့မဟုတ် အမှန်ကွင်းဆင်း ကောက်ယူခြင်းမပြုဘဲ ပျမ်းမျှတွက်ချက်ထားသည်ဆိုပါက တိရစ္ဆာန်ကောင်ရေ စာရင်းအမှန်များကို စီမံချက်ချလျက် ထပ်မှန်ကောက်ယူရန် အစီအစဉ်ရှိ/မရှိနှင့် မည်သည့်ကာလတွင် မြေပြင်အမှန်မှေး ကောင်ရေစာရင်းများကို ထပ်မံကောက်ယူမည်ကို သိရှိလိုပါကြောင်း မေးမြန်းပါသည်။