တိုင်းပြည်တည်ဆောက်ရန်၊ တည့်မတ်ရန်၊ စီးပွားရေးတောင့်တင်းရန် ဝင်ငွေ၊ ထွက်ငွေ မျှတအောင် ကြိုးစားရမည်ဖြစ်ပါကြောင်း၊ ဘတ်ဂျက်လိုငွေများ လျော့နည်းစေရန် အခွန်အကောက်များကို ဥပဒေနှင့်အညီ၊ လုပ်ထုံးလုပ်နည်းနှင့်အညီ ကောက်ခံနိုင်ရန်လည်း လိုအပ်ပါကြောင်း၊ ပြည်တွင်း/ပြည်ပဝင်ငွေများ ရရှိရန်လည်းလိုအပ်ပါကြောင်း၊ ပြည်တွင်းမှ သဘာဝသယံဇာတများ ရောင်းချရရှိသော ပြည်ပဝင်ငွေထက် ပြည်ပမှလာရောက်ရင်းနှီးမြှုပ်နှံမှု ရရှိသောအခွန်အကောက် များနှင့် ပြည်ပဝင်ငွေများမှာ ပို၍ တိုင်းပြည်အတွက်၊ နိုင်ငံအတွက် အကျိုးအမြတ်ရှိမည်ဖြစ်ပါကြောင်း၊

လွတ်လပ်ရေးဖခင် ဗိုလ်ချုပ်အောင်ဆန်းက ၁၉၄၇ ခုနှစ် နှစ်သစ်မိန့်ခွန်း၌ ပြောကြားခဲ့ရာတွင် တိုင်းပြည်ထူထောင်ရေးအတွက် ပစ္စည်းလိုပါကြောင်း၊ အခြားတိုင်းပြည်က ပစ္စည်းရရန် မြန်မာငွေဖြင့် ဝယ်မရပါကြောင်း၊ သက်ဆိုင်ရာ နိုင်ငံခြားငွေဖြင့်မှ ရသဖြင့် ယင်းငွေရရန် ထွက်ကုန်/ဝင်ကုန် ပစ္စည်းချင်းမျှအောင်လုပ်ရမည်ဟု ပြောကြားခဲ့ပါကြောင်း၊ နိုင်ငံခြားငွေသည် တိုင်းပြည်အတွက် မည်မျှအရေးကြီးသည်မှာ ပေါ်လွင်နေပါကြောင်း၊

နိုင်ငံတကာမှ ပင်လယ်ကူးသင်္ဘောများ မြန်မာဆိပ်ကမ်းတွင် ဝင်ရောက်မှုမှ ရရှိသော အခွန်အကောက်များ၊ မြန်မာရေပိုင်နက်မှ ဖြတ်သန်းခုတ်မောင်းရာတွင် ရရှိသောအခွန် အကောက်များသည် တိုင်းပြည်အတွက် များစွာအကျိုးဖြစ်ပါကြောင်း၊ ထိုနည်းတူ မြန်မာဝေဟင်ပိုင်နက် တွင်လည်း အပြည်ပြည်ဆိုင်ရာလေကြောင်းလိုင်းမှ လေယာဉ်များသည် အရှေ့မှအနောက်၊ တောင်မှ မြောက်သို့ ဥဒဟိုပျံသန်းသွားလာနေသည်ကို မြင်တွေ့နေရပါကြောင်း၊ ယခုကဲ့သို့ ဖြတ်သန်းသွားလာနေသော လေယာဉ်များမှ  အခွန်ကောက်ခံမှုနှုန်းထားများ  လေယာဉ်တစ်စင်းကို မည်မျှရသည်၊ တစ်နှစ်ကို မည်မျှရသည်၊ ရရှိသော အခွန်အကောက်များကို ကိုယ်ကျိုးစီးပွားအတွက် အသုံးမပြုဘဲ မှန်မှန်ကန်ကန် တိုင်းပြည်ဘဏ္ဍာထဲစီးဝင်မည်ဆိုပါက တိုင်းပြည်၏ စီးပွားရေးကို တစ်ဖက်တစ်လမ်းမှ အဆင်ပြေမည်ဖြစ်ပါကြောင်း၊

သို့ဖြစ်ပါ၍ မည်သည့်ဝန်ကြီးဌာနမှ မည်မျှစည်းကြပ် ကောက်ခံပါသနည်း။ မည်သည့်ခုနှစ်မှ စတင်၍ ကောက်ခံခဲ့ပါသနည်း။ ကောက်ခံရရှိသော အခွန်ဘဏ္ဍာများအား အလေအလွင့်မရှိ မည်သည့်နေရာတွင် သုံးစွဲမည်ကိုသိရှိလိုကြောင်း မေးမြန်းပါသည်။