မိမိတို့နိုင်ငံတွင် သဘာဝကပေးထားသော တောတောင်များ ပျက်စီးဆုံးရှုံးလာမှုနှင့်အတူ ရာသီ ဥတုများ ဖောက်ပြန်လျက် မိုးခေါင်ရေကြီးမှုများ၊ သဘာဝဘေးအန္တရာယ်များကို မကြာခဏ တွေ့မြင်နေရပါကြောင်း၊ လူနေတိုက်တာ အဆောက်အအုံများ၊ သာသနိကအဆောက်အအုံများ၊ လယ်ယာမြေများကို ရေကြီးနစ်မြုပ်မှုများနှင့် ရေတိုက်စားမှုများမှ ကာကွယ်ရန် မြစ်ချောင်းကမ်း ထိန်းနံရံများ၊ ရေကာတာများကို တည်ဆောက်ပေးလျက်ရှိပါကြောင်း၊ တည်ဆောက်ခဲ့သည့် ကမ်းထိန်းနံရံများ၊ ရေကာတာများကိုကြည့်လျှင် တည်ဆောက်ခဲ့သည့် နေရာ၏ မြေအနေအထား အမာခံရှိ/မရှိ၊ ဒေသခံပြည်သူများ၏ ရေ၊ မြေ သဘောသဘာဝတင်ပြချက်များကို အလေးမထားဘဲ တည်ဆောက်ခဲ့ကြ၍ အကျိုးမရှိဘဲ ပျက်စီးဆုံးရှုံးခဲ့ရသည့် မြစ်ချောင်းကမ်းထိန်းနံရံ အမြောက်အမြား ရှိခဲ့ပါကြောင်း၊ အထူးသဖြင့် မျောတိုင်တန်းကျောက်စီရေကာတာများ၊ ကမ်းထိန်းနံရံများသည် အပျက်အစီးများရခြင်းမှာ မျောများ၊ တိုင်များသည် မြေစိုက်မခံသည့် သစ်သားများကို အသုံးပြုခဲ့ကြသည့်အတွက် တစ်နှစ်တာကာလမျှ အသုံးမဝင်ပါကြောင်း၊ တည်ဆောက်ခဲ့သည့် ရေကာတာများကို ရေပြန်တိုက်စားခြင်းကြောင့် လူနေအိမ်များ ပြောင်းရွှေ့ရသည့်အဖြစ်များလည်း ရှိခဲ့ပါကြောင်း၊ ထို့ကြောင့် ယခုကဲ့သို့ ပြည်သူ့ဘဏ္ဍာများ ဆုံးရှုံးနေခြင်းသည် ဒေသခံ ပြည်သူများ၏ တင်ပြချက် အကြံဉာဏ်များကို အလေးမထားဘဲ ပညာရှင်ဆိုသူများ၏ လွဲမှားသော စီမံ ဆောင်ရွက်မှုများကြောင့်ဖြစ်ပါကြောင်း၊ မိမိတို့ ချင်းတွင်းမြစ်ဘေးရှိ ကနီမျောတိုင်တန်းကျောက်စီ ရေကာတာပျက်စီးနေခြင်း၊ ရေဝချောင်း မျောတိုင်တန်း ကျောက်စီရေကာတာ ပျက်စီးနေခြင်းနှင့် ဝက်ချောင်းကလေး မျောတိုင်တန်း ပျက်စီး နေခြင်းသည် ရေစီးချောင်းများကို ကန့်လန့်ခံတည်ဆောက်ခဲ့သဖြင့် ရေထဲမျောပါ ပျောက်ဆုံး သွားသည့် ရေကာတာများ ဖြစ်ပါကြောင်း၊ မြစ်ချောင်းကမ်းထိန်းနံရံ ရေကာတာ လုပ်ငန်းများသည် အင်မတန်မှ အကုန်အကျများသဖြင့် လေလွင့်ဆုံးရှုံးမှု အနည်းဆုံးနှင့် ရေရှည် အကျိုး ဖြစ်ထွန်းရန် အင်မတန် အရေးကြီးသည့်အတွက် ကမ်းထိန်းနံရံများ/ရေကာတာများ တည်ဆောက်နိုင်ရေး စီစဉ်ဆောင်ရွက်ခြင်းရှိ/မရှိ သိရှိလိုပါကြောင်း မေးမြန်းပါသည်။