၂၀၁၅-၂၀၁၆ ခုနှစ် မိုးရာသီဖြစ်သည့် ဇူလိုင်လတွင် (၂)နှစ်ဆက်တိုက် မိုးအဆက်မပြတ် ရွာသွန်း ခဲ့သည့်အတွက် ဧရာဝတီမြစ်နှင့် မြစ်မခမြစ်တို့တွင် ရေကြီးရေလျှံမှုကြောင့် ကျိုးပေါက်          လုဆဲဆဲ ဧရာဝတီအရှေ့ဘက်ကမ်းရေကာတာ ၂၃ မိုင်နှင့် အပိုင်းပိုင်းအပြတ်ပြတ် ကျိုးပေါက်သွားခဲ့သည့် မြစ်မခအရှေ့ဘက်ကမ်းရေကာတာ ၁၂ မိုင်ကို တာပုံစံကျလမ်းလည်းဖြစ်၊ ရေကာတာလည်းဖြစ်စေမည့် အကြီးစားရေကာတာ အသစ်တည်ဆောက်ခြင်းများကို ၂၀၁၆-၁၇ ဘဏ္ဍာရေးနှစ်တွင် တည်ဆောက်ပေးမည့် အစီအစဉ်ရှိ/မရှိ မေးထားသည့် မေးခွန်းဖြစ်ပါကြောင်း၊

၂၀၁၆ ခုနှစ် ဒီဇင်ဘာလ ဒုတိယအကြိမ် တတိယပုံမှန်အစည်းအဝေးမှာ မေးထားသည့် မေးခွန်းဖြစ်ပါကြောင်း၊ ၂၀၁၆-၁၇ ဘဏ္ဍာရေးနှစ်တွင် ဧရာဝတီမြစ် အရှေ့ဘက်ကမ်းတာမိုင် ၂၃ မိုင်အနက်မှ တာမိုင် ၃/၀ နှင့် ၈/၄ အထိ ၅ မိုင်နှင့် တာမိုင် ၁၉/၄ မှ ၂၆/၆ အထိ ၃ မိုင် ၂ ဖာလုံ စုစုပေါင်း ၈ မိုင်ကို ယခု တာပုံစံကျ အကြီးစားတည်ဆောက်ခဲ့သည်မှာ ယခုဧပြီလက ပြီးစီးသွားပါပြီဖြစ်ပါကြောင်း၊ တာမိုင် ၈/၄ နှင့် တာမိုင် ၁၉/၄ ကြားတွင် ကျန်ရှိနေသည့် ၁၁ မိုင်ကိုလည်း အခု ၂၀၁၇-၁၈ ဘဏ္ဍာရေးနှစ်တွင် ပါလာပြီဖြစ်သောကြောင့် ယခုလုပ်ငန်းများစတင်ပြီး ဆောင်ရွက်နေပြီဖြစ်ပါကြောင်း၊ မြစ်မခမြစ်၏ အရှေ့ဘက်ကမ်းတာများကိုလည်း ၂၀၁၇-၁၈ ဘဏ္ဍာရေးနှစ်တွင် ပါလာပြီဖြစ်၍ ယခုမိုးမကျမီ တာပုံစံကျ တည်ဆောက်နေပြီဖြစ်ပါကြောင်း၊ ဖြေဆိုရမည့် အချိန်နောက်ကျနေသည့်အတွက် ၂၀၁၇-၂၀၁၈ ဘဏ္ဍာရေးနှစ်၏ အစ ယခုမေလတွင် တင်ဒါကင်းလွတ်ချက်ဖြင့် ဆောင်ရွက်မည့်လုပ်ငန်းများကလည်း ပြီးပြတ်မည်မဟုတ်သေးသဖြင့်                ၂၀၁၇ ခုနှစ် မိုးရာသီရေကြီးနစ်မြုပ်မှုကို ကာကွယ်ကြရဦးမည်ဖြစ်ပါကြောင်း၊ သို့သော် ဧရာဝတီ ရေကာတာတွင် ကျန်နေသည့် တာမိုင် ၂၆/၆ မှ ၂၇/၆ အထိ ၅ မိုင်၊ မြစ်မခမြစ် အနောက်ဘက်ကမ်း ရေကာတာတွင် ကျန်နေသည့် မင်းလှမြို့နယ်အပိုင်ထဲမှ တစ်မိုင်ခန့်နှင့် ခမုန်ဆင့်လမ်း တာတွင် ကျန်နေသည့် ၅ မိုင်တို့ကိုလည်း လာမည့်ဘဏ္ဍာရေးနှစ်တွင် ထည့်သွင်းလျာထားပေးမည့် အစီအစဉ်ရှိ/မရှိကို သိရှိလိုပါကြောင်း မေးမြန်းပါသည်။