(င)-မင်းကင်းမြို့နယ်၊ မြစ်ရိုးအထက်ပိုင်း၊ကမ်းပြည့် ရွာမှတရာရွာအထိဖောက်လုပ်ထားသောလမ်းအရှည် (၂၄)မိုင်နှင့်ကြိုးတံတား(၂)စင်းအားကျေးလက်လမ်း အဖြစ်လွှဲပြောင်းရယူပြီးရေရှည်ကြံ့ခိုင်အောင်ဆောင် ရွက်ရန်အစီအစဉ်ရှိ၊မရှိနှင့်စပ်လျဉ်းသည့်မေးခွန်း
မင်းကင်းမြို့နယ်သည် လူဦးရေ ၁.၃ သိန်းရှိသည့် အနက် မြစ်ရိုးအထက်ပိုင်း လို့ခေါ်သည် ကျေးရွာ ၃၃ ရွာ တွင် လူဦးရေသုံးသောင်းကျော် မှီတင်း နေထိုင်လျက်ရှိပါကြောင်း၊ မြို့နှင့်ဆက်သွယ်ရန် ကုန်းလမ်းမရှိ၍ ချင်းတွင်းမြစ်ကိုသာ မှီခိုနေရပါကြောင်း၊ ချင်းတွင်းမြစ်သည် မိုးတွင်းရေကြီးသည့် အခါ အန္တရာယ်အလွန်များပါကြောင်း၊ အောက်တိုဘာလဆန်းတွင် အောင်စိုးမိုးကျော် အမြန်ရေယာဉ် နစ်မြှုပ်မှု ကို လေ့လာကြည့်ရင် သိနိုင်ပါကြောင်း၊ နွေနှင့်ဆောင်းတွင် သောင်ပြင်များပေါ်လာပြီး သွားလာရေးခက်ခဲပါကြောင်း၊ထို့ကြောင့် ကုန်းလမ်းမရှိသည့် နေရာတွင် မြစ်ကြောင်းတစ်ခုကိုသာ မှီခိုနေရသည့် အတွက် ၂၄ မိုင်ရှည်သည့် မြေသားလမ်း နှင့် ပေ ၃၀၀ အရှည်ကြိုးတံတား(၂)စင်းကို ကိုယ့်အားကိုယ်ကိုးပြီး တည်ဆောက် ခဲ့ပါကြောင်း၊ မြေသားလမ်းအတွက် မြေနေရာရရှိရေးကို ညှိနှိုင်း ဆောင်ရွက်ခဲ့ပါကြောင်း၊ ကြိုးတံတားကို ဆွစ်ဇာလန်နိုင်ငံသား မစ္စတာတိုနီနှင့် ပူးပေါင်းပြီးဆောင်ရွက် ခဲ့ပါကြောင်း၊ ကြိုးတံတားနှစ်စင်းကို ၂၀၁၆ ခုနှစ်၊ မေလနှင့် အောက်တိုဘာလများတွင် ဖွင့်လှစ် သုံးစွဲ လျက်ရှိပါကြောင်း၊ တံတားအတွက်လိုအပ်သည့် သံထည်၊ စတီးကြိုးနှင့် နည်းပညာများကို မစ္စတာတိုနီ မှ ပံ့ပိုးပေးပြီး မိမိတို့ဖက်မှ တံတားတစ်စင်းကို ကျပ်သိန်း ၂၅၀ ခန့် ကျခံသုံးစွဲခဲ့ရပါကြောင်း၊ နိုင်ငံတော်၏ ဘတ်ဂျက် အခက်အခဲကို သိရှိသည့်အတွက် လမ်းနှင့် တံတားကို ကိုယ့်အားကိုယ်ကိုး ဆောင်ရွက်ခဲ့သော်လည်း ရေရှည်တည်တံ့အောင် နိုင်ငံတော်၏ တာဝန်ယူမှုနှင့် ပံ့ပိုးဆောင်ရွက်မှု လိုအပ်ပါကြောင်း၊ မိမိသိလိုသည်မှာ ကမ်းပြည့်ကျေးရွာမှ တရာကျေးရွာ အထိ မြေသားလမ်းနှင့် မူရာ ကြိုးတံတား၊ ချောင်းဝကြိုးတံတား တို့ကို ကျေးလက်လမ်းအဖြစ် ဝန်ကြီးဌာနမှ လွှဲပြောင်းထိန်းသိမ်း ရန် အတွက် အစီအစဉ်ရှိ/မရှိ သိလိုပါကြောင်းမေးမြန်းပါသည်။