မြန်မာနိုင်ငံသည် စိုက်ပျိုးရေးကို အခြေခံသော နိုင်ငံတစ်နိုင်ငံဖြစ်သည်နှင့်အညီ ဒိုက်ဦးမြို့နယ်သည်လည်း စိုက်ပျိုးရေးကို အဓိကထားလုပ်ဆောင်သော မြို့နယ်တစ်ခုဖြစ်ပါကြောင်း၊ ဒိုက်ဦးမြို့နယ်သည် ကျေးရွာအုပ်စုပေါင်း ၅၃ အုပ်စုရှိပြီး ကျေးရွာပေါင်း ၁၈၂ ရွာနှင့် ဖွဲ့စည်းထားပြီး ဧရိယာအကျယ်အဝန်း ၄၉၇.၀၃ စတုရန်းမိုင်ရှိပြီး လူဦးရေ ၂၅၀၀၀၀ ကျော် နေထိုင်သော မြို့နယ်တစ်ခုဖြစ်ပြီး စိုက်ပျိုးမြေ၊ လယ်ယာမြေဧကပေါင်း ၁၈၆၉၀၀ ကျော် ရှိပါကြောင်း၊ စိုက်ပျိုးရေးကို ကြိုးစားပြီး စိုက်ပျိုး လုပ်ကိုင်နေရင်း တောင်သူလယ်သမားများ၏ လယ်ယာမြေများအပေါ်တွင် ဆည်မြောင်းများဖောက်လုပ်ခြင်းကို ခံခဲ့ကြရပါကြောင်း၊ ဧကများများပိုင်ဆိုင်သော တောင်သူလယ်သမားများအတွက် နစ်နာဆုံးရှုံးမှုသည် မကြီးမားသော်လည်း ဧကနည်းနည်းသာ ပိုင်ဆိုင်သော တောင်သူများအတွက် များစွာ နစ်နာဆုံးရှုံးခဲ့ရပါကြောင်း၊

ဒိုက်ဦးမြို့နယ်တွင် ဘောနီမြောင်း၊ မိုးယွန်းကြီးမြောင်း၊ ဘိုင်းဒါးမြောင်း၊ ကောလိယမြောင်း၊ ပျဉ်ပုံမြောင်းနှင့် ယွန်းထည်ဆည်မြောင်းဟူ၍ မြောင်းကြီးခြောက်မြောင်းတူးဖော် သွားခဲ့ပါကြောင်း၊ ၁၉၉၅-၁၉၉၆ ခုနှစ်တွင် ဘောနီမြောင်းကို စတင်တူးဖော်ရာတွင် ဘောနီကျေးရွာအုပ်စု၊ ဗျိုင်းချယ်ကျေးရွာအုပ်စု၊ ကညင်တပင်ရွာ၊ တမံကြီးကျေးရွာအုပ်စုများမှ တောင်သူများ၏ လယ်ယာမြေများပေါ် ဖြတ်သန်းဖောက်လုပ်သွားခဲ့ပြီး နစ်နာကြေး လုံးဝမရရှိခဲ့ပါကြောင်း၊ ၂၀၀၁-၀၂ ခုနှစ်တွင်လည်း မိုးယွန်းကြီးမြောင်းကို ဖောက်လုပ်ရာတွင်လည်း ဂွေးပင်ကုကျေးရွာ၊ ကန်ကလေးကျေးရွာ၊ ပျဉ်ထောင်လေးကျေးရွာ၊ ကတုတ်ဖျားကြီးကျေးရွာ၊ ကျိုက်ဇကောအနောက်ကျေးရွာများမှ တောင်သူများ၏ လယ်ယာမြေများ ပါဝင်သွားခဲ့ပါကြောင်း၊ ၂၀၀၂-၀၃ ခုနှစ်တွင် ဘိုင်းဒါးမြောင်းကို ထပ်မံတူးဖော်ရာ၌ ဥသျှစ်ကုန်းကျေးရွာ၊ ဆင်စလုတ်ကျေးရွာ၊ ဒိုးတန်းကျေးရွာ၊ သပြေတန်းကျေးရွာအုပ်စုနှင့် ပသွယ်ကျေးရွာ၊ ကန်ကလေးကျေးရွာ၊ ရှမ်းစုကျေးရွာများမှ တောင်သူများ၏ လယ်ယာမြေများစွာ ပါဝင်သွားခဲ့ပြီး ယခုအချိန်အထိ နစ်နာကြေးမရရှိခဲ့ကြပါကြောင်း၊ ၂၀၀၄-၀၅ ခုနှစ်တွင် ကောလိယမြောင်း ဖောက်လုပ်ရာတွင်လည်း ကွင်းမြောင်ကြီးကျေးရွာ၊ သင်အင်းကျေးရွာ၊ ပွဲတမော့ကျေးရွာ၊ ကုက္ကိုင်းကျေး ရွာ၊ ကျေးတောစုကျေးရွာ၊ ရွှေညောင်ပင်ကျေးရွာများမှ လယ်ယာမြေများ ပါဝင်သွားသည်ဟု သိရှိရပါကြောင်း၊ပျဉ်ပုံမြောင်း ဖောက်လုပ်ရာတွင်လည်း ကျိုက်စကော အနောက်ကျေးရွာ၊ စလူတောကျေးရွာများမှ လယ်ယာမြေများပါဝင်သွားခဲ့ပြီး ထိုမြောင်းသည် ယနေ့အချိန်ထိ ရေစီးရေလာမရှိပါကြောင်း၊ ရဲနွယ် ဆည်မြောင်း ဖောက်လုပ်ရာတွင်လည်း ပန်းကန်ကွဲကျေးရွာအုပ်စုနှင့် မှော်အင်းကျေးရွာအုပ်စုမှ လယ်ယာမြေများစွာ ဆုံးရှုံးသွားခဲ့ပါကြောင်း၊ ဖော်ပြပါ မြောင်းများမှာ မိုးယွန်းကြီးမြောင်းနှင့် တချို့သော မြောင်းလက်တက် များသည် ဖောက်လုပ်ရာ တွင် လယ်ယာမြေများစွာ ပါဝင်သွားသော်လည်း ယနေ့အချိန်ထိ ၎င်းမြောင်းများမှ ရေပေးလွှတ်ခြင်း မရှိသဖြင့် တောင်သူအတွက်လည်း အကျိုးမရှိသကဲ့သို့ နိုင်ငံတော်အတွက်လည်း အကျိုးမရှိဖြစ်နေပါကြောင်း၊ ထို့ကြောင့် ဆည်မြောင်းများ ဖောက်လုပ်ရာတွင်ပါဝင်သွားခဲ့သော လယ်ယာမြေများ အတွက် နစ်နာကြေးပေးလျော်ရန် အစီအစဉ် ရှိ/မရှိနှင့် အစီအစဉ်ရှိပါက မည်သည့်အချိန်၊ မည်သည့်ဘဏ္ဍာရေးနှစ်တွင် ပေးပါမည်ကိုသိရှိလိုကြောင်း မေးမြန်းပါသည်။