မိမိအနေဖြင့် ကုန်းလမ်းပို့ဆောင်ရေးညွှန်ကြားမှုဦးစီးဌာန(ကညန)ဝန်ထမ်းများနှင့် စက်မှုဇုန်ကား ထုတ်လုပ်သူများ ပူးပေါင်းပြီး မသမာလုပ်ဆောင်မှုများကြောင့် နိုင်ငံတော်အခွန်ငွေ နစ်နာမှုများ အပေါ် ပြန်လည်စစ်ဆေးကြပ်မတ်နိုင်ရန် မေးမြန်းလိုပါကြောင်း၊ ပြည်တွင်းစက်မှုဇုန်များက ထုတ်လုပ်သည့် ကားအသစ်ကျပ်ချွတ်များကို ကညန တွင် မှတ်ပုံတင်၍ ယာဉ်ပိုင်ရှင် စာအုပ်(Owner Book) ထုတ်ယူပြီး ရက်ပိုင်းခန့်အကြာတွင် အဆိုပါကားများကို ပျက်စီးသည် ဟူသော အကြောင်းပြချက်များဖြင့် သံရည်ကျိုရန်  ကညနကို ပြန်လာ အပ်နှံပါကြောင်း၊ ကညန ကလည်း လက်ခံ၍ ဖျက်ပိုင်းပြေစာစလစ် ပြန်ထုတ်ပေးခြင်းများ ဆောင်ရွက်ပေးသည့်အတွက် မော်တော်ယာဉ်တင်သွင်းမှု ဖွင့်ပေးခဲ့သည့်ကာလမှ စ၍ ယခုအချိန်ထိ အစီးရေ ၁၀၀၀ ခန့်ရှိပြီး နောက်ပိုင်းတွင် စီးရေ ၂၀၀၀ ကျော်ခန့်ရှိနိုင်သည်ဟု ခန့်မှန်းရပါကြောင်း၊ မော်တော်ယာဉ် ထုတ်ခြင်း၊ အပ်ခြင်းများဆောင်ရွက်ရန်  စလစ်တစ်စောင်၏ဈေးနှုန်းသည် ကျပ်သိန်းငါးဆယ်ခန့် ရှိသောကြောင့် ခန့်မှန်းစီးရေ ၂၀၀၀ ကျော်အတွက် ကျပ်သိန်းပေါင်း တစ်သိန်း(ကျပ် ၁၀ ဘီလီယံကျော်)အထိ နိုင်ငံတော်က အခွန်မရဘဲ နစ်နာသွားခဲ့သည်ဟု  ဝေဖန်သုံး သပ်နေကြ အလားတူ ၁၀ သိန်းကျော်တန် သုံးဘီးကားများကို တရုတ်နိုင်ငံနယ်စပ် ကဝယယူ၍ မှတ်ပုံတင်ပြုလုပ်ပြီး ကညနကိုပြန်အပ်နှံ စလစ်ထုတ်ယူပြီး အဆင့်မြင့်ဂျပန်မော်ဒယ်ကားများ တင်သွင်ခြင်းကြောင့် နစ်နာမှုများ ဖြစ်ပေါ်နေခြင်းကိုလည်း ဝေဖန်မှုများရှိနေပါကြောင်း၊ ကညနကိုအပ်စဉ် မူလမှတ်ပုံ တင်ထားသော ယာဉ်ကို ပြသ၍  သံရည်ကျိုစက်သို့ ပို့ဆောင်ရာတွင် အင်ဂျင်တုံးကတစ်ခု၊ တန်းတစ်ခု၊ တာယာဘီးအစုတ် လေးလုံးသာပါသည် ဘီးတပ်လှည်းတစ်စီးကိုသာ အပ်နှံစလစ်ထုတ်ယူနေကြခြင်း၊ မူလမှတ်ပုံတင်ခဲ့သော ကားတစ်စီးတည်းကိုသာ အကြိမ်ကြိမ် မှတ်ပုံတင်ခြင်းများသည် ကျော်မကောင်းကြားမကောင်းသည့်အတွက် ဖြစ်ပွားနေသည် ကိုသိရှိရပါကြောင်း၊ ဈေးကွက်စီးပွားရေး ဖွင့်ပေးချိန်တွင် ကမ္ဘာကျော်ကား ကုမ္ပဏီများအနေဖြင့် မြန်မာနိုင်ငံသို့ ရောက်ရှိပြီး လိုအပ်သော အရောင်းပြခန်းများ၊ Show rooms များဖွင့်လှစ်ရောင်းချချိန်တွင်  ပြည်တွင်းစက်မှုဇုန်များအနေဖြင့် ယခုကဲ့သို့ ပြုလုပ်နေခြင်းသည် နိုင်ငံတော်အခွန်ငွေထိခိုက်နစ်နာစေရုံသာမက အမျိုးသားဂုဏ် သိက္ခာထိပါ ထိခိုက်ကျဆင်း ပါကြောင်း၊  ထို့ကြောင့်  (၁) ဟန်ပြအတုအယောင် ထုတ်လုပ်နေသော စက်မှုဇုန်ကား လုပ်ငန်း များကို အပြီးအပိုင်ဖျက်သိမ်းပေးနိုင်ခြင်းရှိ/မရှိ၊ (၂) စက်မှုဇုန်ကားများ ခုထုတ်- ခုအပ် အကြိမ်ကြိမ်ပြုလုပ်ပြီး စလစ်ထုတ်ယူ၍ ပြည်ပမှ အဆင့်မြင့်ကား ရာပေါင်းများစွာ တင်သွင်းခဲ့ခြင်း ကြောင့် နိုင်ငံတော်အခွန်ဘဏ္ဍာငွေနစ်နာမှုအတွက် တာဝန်ရှိကြသော ဝန်ထမ်းများနှင့် ဇုန်ကားလုပ်စားသူများကို ပြန်လည် စစ်ဆေးကြပ်မတ်ရန် အစီအစဉ်ရှိ/မရှိ သိရှိလိုကြောင်းမေးမြန်းပါသည်။