မြန်မာနိုင်ငံတော်ဗဟိုဘဏ်၏ ၂၀၁၄-၁၅ ခုနှစ်၊ ငွေရေးကြေးရေးစနစ်တည်ငြိမ်ရေးဆိုင်ရာ အစီရင်ခံစာအရ မြန်မာနိုင်ငံအနေဖြင့် နိုင်ငံပိုင်ဘဏ်အမျိုးအစားလေးမျိုးဖြစသော မြန်မာ့စီးပွားရေးဘဏ် ၃၀၄ ဘဏ်၊ နိုင်ငံခြားကုန်သွယ်မှုဘဏ် ၁ ဘဏ်၊ ရင်းနှီးမြှုပ်နှံမှုနှင့်ကူးသန်းရောင်းဝယ်ရေးဘဏ် ၂ ဘဏ်နှင့် လယ်ယာဖွံ့ဖြိုးရေးဘဏ် ၂၀၆ ဘဏ် စုစုပေါင်း  ၅၂၃ ဘဏ်ရှိပြီး ပုဂ္ဂလိကဘဏ်အမျိုးအစား ၂၂ မျိုးမှာ ဖွင့်လှစ်ပြီးသည့်ဘဏ် ၁၁၀၂ ဘဏ်၊ နိုင်ငံခြားဘဏ် ကိုယ်စားလှယ်ရုံး ၃၇ ခု၊ ငွေရေးကြေးရေးကုမ္ပဏီ ၉ ခု ဖွင့်လှစ်ခွင့်ပြုပြီးဆောင်ရွက်နေကြပါကြောင်း၊

နိုင်ငံဘဏ်များအပြင် ပုဂ္ဂလိကဘဏ်များ ဖွင့်လှစ်ရသည့်အတွက် နိုင်ငံအတွင်းငွေကြေး လည်ပတ်စီးဆင်းမှု ပိုမိုမြန်ဆန်သွက်လက်လာခြင်း၊ ပညာတတ်လူငယ်များအတွက် အလုပ်အကိုင်အခွင့်အလမ်းများ ဖန်တီး ပေးလာနိုင်ခြင်း၊ နိုင်ငံ၏ငွေရေးကြေးရေးကဏ္ဍနှင့် GDP တိုးလာခြင်းစသည့် နိုင်ငံ၏ အကျိုးရလဒ်ကောင်း များ ရရှိလာနိုင်ခြင်းတို့ကို တွေ့ရှိရပါကြောင်း၊ နိုင်ငံအတွင်းရှိ ပုဂ္ဂလိကဘဏ်များအနေဖြင့် နိုင်ငံသားတို့၏ ငွေရေးကြေးရေးများ လွှဲပို့ပေးသောလုပ်ငန်းများ၊ စုဆောင်းငွေလက်ခံသော လုပ်ငန်းများအပြင် အချို့ ဘဏ်များအနေဖြင့် နိုင်ငံသားလုပ်ငန်းရှင်များကို ငွေထုတ်ချေးသောလုပ်ငန်းများလည်း ဆောင်ရွက်ကြ သည်ကို သိရှိရပါကြောင်း၊ နိုင်ငံတော်ဘဏ်များအနေဖြင့် နိုင်ငံသားများ၏အကျိုးကို မထိခိုက်မနစ်နာ စေရန် ဥပဒေ၊ နည်းဥပဒေ၊ စည်းမျဉ်း၊ စည်းကမ်း၊ လုပ်ထုံး လုပ်နည်းများ ချမှတ်ဆောင်ရွက်ကြရသည့် အတွက် နိုင်ငံသားများ၏အကျိုး ထိခိုက်နစ်နာမှုကို ကာကွယ်ပေးနိုင်သော်လည်း ယခင်ကာလများက ဖြစ်ခဲ့ဖူးသောအတွေ့အကြုံများအရ ပုဂ္ဂလိကဘဏ်အချို့က ငွေကြေးဆိုင်ရာကိစ္စရပ်များနှင့် အခြား အခြေအနေများကြောင့် ဘဏ်များပိတ်သိမ်းခဲ့ရသော အနေအထားမျိုးဖြစ်လာသည့်အခါ နိုင်ငံသူနိုင်ငံသား များအတွက် ထိခိုက်နစ်နာမှုများ၊ တွေ့ကြုံခဲ့ရခြင်းများ ရှိခဲ့ပါကြောင်း၊ ထို့အပြင် နိုင်ငံတော်တွင် လက်ရှိ ကြုံတွေ့နေရသော နိုင်ငံခြားငွေလဲနှုန်းကို တည်ငြိမ်မှုမြင့်တက်နေမှုများ၊ မြန်မာကျပ်ငွေတန်ဖိုးကျဆင်း နေမှုများအတွက်လည်း ဖြေရှင်းဆောင်ရွက်ရမည့် အရေးကြီးသောကိစ္စရပ်များ ဖြစ်ပေါ်နေသည့်အတွက် ပုဂ္ဂလိကဘဏ်နှင့်ငွေကြေးဆိုင်ရာအဖွဲ့အစည်းများ၏ ငွေဖြစ်လွယ်မှု(Liquidity)၊ မတည်ရင်းနှီးငွေ (Capital)၊ ငွေသားစီးထွက်မှု(Cash out flow)နှင့် ငွေသား စီးဆင်းမှု(Cash in flow)တို့ကို CBM ဗဟိုဘဏ်က စောင့်ကြည့်ကြီးကြပ်မှု၊ နိုင်ငံသားများ၏ စုဆောင်းငွေ၊ လွှဲပို့သောငွေများ ဆုံးရှုံးမှု မဖြစ်ပေါ်စေရေန် ကြိုတင်ကာကွယ်ထားမှုအခြေအနေများကို သိရှိလိုပါကြောင်း မေးမြန်းပါသည်။