ကျေးလက်တွင် နေထိုင်ကြသည့် တောသူ တောင်သားများသည် ကျန်းမာရေး၊ လူမှုရေး၊ စီးပွားရေး၊ ပညာရေး အဖက်ဖက်က နိမ့်ကျနေကြရပါကြောင်း၊ ထို့အချက်များအနက်မှ ၎င်းတို့သည် ကျန်းမာရေးကို အဓိက ဖြစ်ပါကြောင်း၊ ထို့ကြောင့် ကောလင်းမြို့နယ်အတွင်းရှိ ကျန်းမာရေး စောင့်ရှောက်ရန် လိုအပ်သည့် နေရာများကို စုစည်းပြီး တူညီသည့် ကိစ္စရပ်တစ်ခုအဖြစ် မိမိ မေးခွန်းတစ်ခု မေးမြန်းထားပါကြောင်း၊ မေးခွန်းတွင်ပါသည့် ဥမင်ကုန်းကျေးရွာသည် ဆေးပေးခန်း တစ်ခု မဖြစ်မနေ ရှိသင့်သည့် ကျေးရွာဖြစ်ပါကြောင်း၊

ဥမင်ကုန်း ကျေးရွာမှ မိမိကို ပြောပါကြောင်း၊ ရွာတွင် ဆရာမ မရှိကြောင်း၊ ရမ်းကုလည်း မရှိကြောင်း၊ ရမ်းကု ရှိသည်ဆိုပါက မရှိသည်နှင့်ယှဉ်ပါက ရှိသည့်က ကောင်းမည်ဖြစ်သည်ဟု ပြောပါကြောင်း၊ ရမ်းကုသည် တရားမဝင်ပါကြောင်း၊ သို့သော် ပြောသည့် စကားနှင့်စပ်လျဉ်းပြီး ကျန်းမာရေး စောင့်ရှောက်ပေးမည့်သူ တစ်ယောက်မှ မရှိကြောင်း၊ တစ်ခုခု ဖြစ်သည်ဆိုပါက ခံရဖို့သာရှိသည်ဟု ဆိုပြီး ပြောခြင်း ဖြစ်ပါကြောင်း၊ ဥမင်ကုန်းကျေးရွာသည် ချောင်းကွေ့ ကျန်းမာရေးစင်တာ၏ လက်အောက်တွင် ရှိပါကြောင်း၊ ချောင်းကွေ့နှင့် အလှမ်းဝေးပါကြောင်း၊ အုပ်စုချင်းလည်း မတူပါကြောင်း၊ ကျေးရွာအုပ်စုချင်းလည်း မတူပါကြောင်း၊ အလှမ်းဝေးပါကြောင်း၊ ရောဂါဘယ ထူပြောသည့် မိုးတွင်းကာလတွင် လမ်းကြောင်း ပြတ်တောက်လုနီးပါး သွားလာရ ခက်ခဲသွားပါကြောင်း၊ ထို့ကြောင့် တာဝန်ကျသည့် ဆရာမများသည် ၎င်းဥမင်ကုန်းအုပ်စုတွင် ရှိသည့် ဥမင်ကုန်း၊ တောင်ကြီး၊ တောင်ပို့စုတည်း ၎င်းရွာများကို မဆင်းနိုင်ပါကြောင်း၊ တကယ် မဆင်းနိုင်ကြောင်း၊ တစ်နှစ်လုံးတွင် ၎င်းတို့ ဆင်းနိုင်သည့် အကြိမ်ရေသည် အလွန်နည်းပါကြောင်း၊ ထို့ကြောင့် တစ်ခုခုဖြစ်သည်ဆိုပါက စောင့်ရှောက်မည့်သူမရှိ ဖြစ်နေပါကြောင်း၊ မိမိကိုယ်တိုင် COVID-19 ကာကွယ်ရေးအတွက် တည်ထောင်ထားသည့် CPHQ  များကို သွားစစ်သည့် အချိန်တွင် ယခုပြဿနာကို တွေ့ပါကြောင်း၊ မိမိတို့သတ်မှတ်ထားသည့် စာသင်ကျောင်းများတွင် CPHQ ထားသည့်အချိန်တွင် သက်ဆိုင်ရာ ဆရာမများ မလာနိုင်ပါကြောင်း၊ ထို့ကြောင့် ဥမင်ကုန်း အုပ်စုကို ချောင်းကွေ့ဖွဲ့ စည်းပုံမှ ထုတ်နုတ်ပြီး ဖွဲ့စည်းပုံအသစ် ထူထောင်ပြီး ဥမင်ကုန်းကို ဖွဲ့စည်းပုံ အသစ်ဖြင့် ကျန်းမာရေး စင်တာ တစ်ခု ချပေးရန် တောင်းဆိုလိုပါကြောင်း၊

ချောင်းကွေ့မှ ထုတ်နုတ်ပြီး ဥမင်ကုန်းကို ပေးလိုက်မည်ဆိုပါက ချောင်းကွေ့ဖွဲ့စည်းပုံ မပြည့်ဘူး ဖြစ်သွားနိုင်ကြောင်းကို မြို့နယ် ဆရာဝန်ကြီးမှ ပြောပါကြောင်း၊ တုံးတင်တပ် ကျေးရွာသူ ကျေးရွာသားများ၏ တောင်းဆိုမှုအရ တုံးတင်တပ်ကို ပေးနိုင်ခြင်း ရှိ/မရှိဆိုပြီး မိမိမေးခွန်းတွင် ရွာတစ်ရွာ အဖြစ်ဖြင့် ထည့်ပြီး မေးမြန်းထားပါကြောင်း၊ သို့သော် တုံးတင်တပ်နှင့် လက်ရှိ ကျန်းမာရေးစင်တာ ရှိနေသည့် ချောင်းကွေ့သည် မြင်နေရပါကြောင်း၊ မလှမ်းမကမ်းတွင် ရှိနေပါကြောင်း၊ အုပ်စုအားဖြင့် အုပ်ချုပ်ရေး အုပ်စုအားဖြင့် တစ်ခုတည်းသာ ဖြစ်ပါကြောင်း၊ လက်ရှိတွင် အုပ်ချုပ်ရေးက သပ်သပ်၊ ကျန်းမာရေးက သပ်သပ် ဖြစ်နေသည့် အချိန်တွင် ကျန်းမာရေးနှင့် အုပ်ချုပ်ရေး ပူးပေါင်းဆောင်ရွက်မှု လုပ်ရသည့်အချိန်တွင် အားနည်းချက် များစွာ ရှိပါကြောင်း၊ ထို့ကြောင့် ချောင်းကွေ့၏ ဖွဲ့စည်းပုံကို မပြည့်ဘူး ပျက်သွား နိုင်သည်ဆိုပါက ချောင်းကွေ့ကို မိမိတို့ ဖွဲ့စည်းပုံ ပြန်လည်ပြင်ဆင်ပြီး နီးစပ်ရာ အုပ်စုတူသည့် ရွာများကို ထည့်သွင်း ဖွဲ့စည်းပြီးချိန်မှ ပေး၍ရပါကြောင်း၊

ဖလဲကျေးရွာသည် ဆေးခန်းတစ်ခု မဖြစ်မနေ ရှိသင့်သည့် ကျေးရွာ ဖြစ်ပါကြောင်း၊ ဖလဲ၊ ရပ်ရှည်ဒီအုပ်စုသည် ရွာကြီးများ ဖြစ်ပြီး အနီးနားတွင် ဆေးပေးခန်း လုံးဝမရှိပါကြောင်း၊ ခန့်သာတွင် တိုက်နယ်ဆေးရုံ ရှိသော်လည်း ရွာတွင် ကျန်းမာရေး တစ်ခုခုဖြစ်ပါက စောင့်ရှောက်မည့်သူ မရှိပါကြောင်း၊ ဆေးရုံအထိ ပြေးမှသာ ရပါကြောင်း၊ ဆေးရုံများသည် အရမ်းကပ်နေခြင်းမျိုး မဟုတ်ပါကြောင်း၊ ဥသျှစ်ပင် ကျေးရွာသည့် ရွာငယ်လေး တစ်ရွာ ဖြစ်ပါကြောင်း၊ မုတိမ်၏ အောက်တွင် ရှိပါကြောင်း၊ သို့သော် ကျန်းမာရေး စောင့်ရှောက်မည့်သူ မရှိသည့်အတွက် ဆရာဆရာမများ ပုံမှန်လာရန် လိုအပ်နေခြင်း ဖြစ်ပါကြောင်း၊

နိုင်ငံတကာပါလီမန်များညီလာခံ(IPU)၊ ကမ္ဘာရည်မှန်းချက် (STG)နှင့် ကျန်းမာရေးဝန်ကြီးဌာနတို့၏ ဆောင်ပုဒ်ဖြစ်သည့် “မည်သူ့မျှ နောက်ကျန် မနေစေရဘူး” ဆိုသည့် “No One Left Behind” ဆိုသည့် ဆောင်ပုဒ်နှင့်အညီ ကောလင်းမြို့ရှိ ရွာသူရွာသားများသည် မကျန်ရစ်စေရန် သင့်သည့် နေရာများတွင် ကျန်းမာရေး ဆေးပေးခန်းများ ချပေးရန်အတွက် ကောလင်းမြို့နယ် တုံးတင်တပ် ကျေးရွာ၊ ဥမင်ကုန်းကျေးရွာ၊ ဖလဲကျေးရွာနှင့် ဥသျှစ်ပင် ကျေးရွာတို့အတွက် ကျေးလက်ကျန်းမာရေး ဆေးပေးခန်းများ ချထားပေးနိုင်ခြင်း ရှိ/မရှိ မေးမြန်းအပ်ပါသည်။