မိမိတို့ မြန်မာနိုင်ငံသည် စိုက်ပျိုးရေးတိုင်းပြည်ဖြစ်ပြီး နိုင်ငံတော်အစိုးရ၏ မူဝါဒဖြစ်သော ဆင်းရဲနွမ်းပါးမှုလျော့ချရေးအတွက် ကျေးလက်ဒေသ ဖွံ့ဖြိုးတိုးတက်ရေးသည် အရေးကြီးပါကြောင်း၊ ကျေးလက်ဒေသများသည် စိုက်ပျိုးရေးကို အဓိကထားပြီး လုပ်ကိုင်ဆောင်ရွက်နေခြင်းဖြစ်သည့်အတွက် စိုက်ပျိုးရေးအောင် မြင်စေရန် အဓိကထားပြီး လုပ်ဆောင်ရန် လိုအပ်ပါကြောင်း၊ စိုက်ပျိုးရေးလောကတွင် No Water၊ No Agric  ဆိုသကဲ့သို့ ရေမရှိဘဲ စိုက်ပျိုးရေး လုပ်၍ မရပါကြောင်း၊ ရေများပိုလျံပြီး အလဟသ ဖြစ်နေပါကလည်း ရေကြောင့်ဒုက္ခဖြစ်ပြီး စိုက်ပျိုးရေးသည် မဖြစ်ထွန်းပါကြောင်း၊ နိုင်ငံတော်တွင် စိုက်ပျိုးရေးရရှိစေရန် ဆည်မြောင်းကြီးများ၊  မြစ်ရေတင်စီမံကိန်းကြီးများ ပြုလုပ်ပေးပါကြောင်း၊ ရေများကို စိုက်ပျိုးရေးတွင် ထိထိရောက်ရောက် အသုံးချနိုင်ရန် Water management မှ ရေကို စနစ်တကျစီမံခန့်ခွဲရန် လိုအပ်ပါကြောင်း၊ ရေသွင်းမြောင်းများ၊ ရေသွင်းစနစ်များ၊ လက်တံမြောင်းများ၊ ကောင်းမွန်ရန် လိုအပ်သကဲ့သို့ ရေတံခါးများ၊ ရေထုတ်မြောင်းများကောင်းမွန်ရန်လည်း အရေးကြီးပါကြောင်း၊ ထိုကဲ့သို့ အရေးကြီးသော လုပ်ငန်းများကို မိမိတို့မြို့နယ်တွင် ကြည့်ရှုစစ်ဆေးအခါ  ပိုလျံရေများ အလဟသဖြစ်ကာ စိုက်ပျိုးရေးတွင် တောင်သူများ စိတ်ပျက်ဝမ်းနည်းပြီး စိုက်ပျိုးရေးကိုမလုပ်ချင်ဘဲ လုပ်နေရသည့်အဆင့်အထိ ဖြစ်နေပါကြောင်း၊ ရေများ အလဟသဖြစ်ခြင်းသည် နိုင်ငံတော်အတွက် ဆုံးရှုံးသကဲ့သို့ ပြည်သူများအတွက်လည်း နစ်နာနေပါကြောင်း၊ တောင်သူလယ်သမားများ စိုက်ပျိုးရေးကိုလုပ်ကိုင်သည့်နေရာတွင်  စိုက်ပျိုးသီးနှံအလိုက် လိုအပ်သောရေကို ထိန်းချုပ်ပြီး ပေးနိုင်မှသာလျှင် စိုက်ပျိုး‌ရေးသည် အောင်မြင်ပါကြောင်း၊ နိုင်ငံတော်မှ နည်းပညာများ ပံ့ပိုးစီစဉ်ပြီး ကူညီမည်ဆိုပါက စိုက်ပျိုးရေးကဏ္ဍ တစ်ဟုန်ထိုး တိုးတက်လာမည်ဖြစ်ပါကြောင်း။

ထို့ကြောင့် မိမိတို့ မြန်အောင်မြို့နယ်တွင် လျှပ်စစ်မြစ်ရေတင်စီမံကိန်းကြီး ၃ ခုနှင့် မမြဆည်တို့၊ ကညင်ဆည်ကြီးများရှိသော်လည်း ရေပေးဝေသည့်စနစ်များ ပြီးပြည့်စုံမှု၊ ကောင်းမွန်မှု မရှိပါသဖြင့် နိုင်ငံတော်မှ ဖြည့်ဆည်း ဆောင်ရွက်ပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။