တောနေပြည်သူများသည် မိဘဘိုးဘွားစိုက်ပျိုးထိန်းသိမ်းထားသော လယ်စည်းရိုး၊ ခြံစည်းရိုး အဖိုးတန်၊ အဖိုးမတန်သစ်များကို အသုံးပြုရာ၌ မကြာမကြာတာဝန်ရှိပုဂ္ဂိုလ်များ၏ အရေးယူခံရ၊ ငွေညှစ်ခံရမှုများအပြင် အချုပ်ကျ၊ ထောင်ကျသည်အထိ တွေ့နေရှိနေရပါကြောင်း၊ထို့ကြောင့် သစ်ပင်သစ်တော ချစ်စိတ်များလည်း ပြောင်းလာကြပါကြောင်း၊ မြန်မာနိုင်ငံတော်သည် မြေပေါ်မြေအောက် သဘာဝသယံဇာတများစွာ အမွေခံကောင်းနိုင်ငံဖြစ်သော်လည်း နိုင်ငံတော်စီးပွားရေးလိုအပ်ချက်၊ တိုင်းရင်းသားလက်နက် အဖွဲ့အစည်း များ လိုအပ်ချက်၊ မသမာသော စီးပွားရေးလုပ်ငန်းရှင်များနှင့် လူဦးရေများပြားလာခြင်း၊ ပြည်သူ့စာဝတ်နေရေး ခက်ခဲမှုကိစ္စများ ကြောင့် မြေပေါ်မြေအောက်သယံဇာတများ  အချိန်တိုအတွင်း ပျောက်ဆုံးယိုယွင်းသွားပြီး ဥတုရာသီပြောင်းလဲသည့်အထိ တွေ့မြင်နေရပါကြောင်း၊  မြေအောက်သယံဇာတကုန်ဆုံးမှု ပြန်လည်မရနိုင် သော်ငြားလည်း မြေပေါ်သဘာဝသယံဇာတကို မှန်ကန်သောမူဘောင်ဖြင့် ဝိုင်းဝန်းပြန်လည်စိုက်ပျိုးထိန်းသိမ်း ကြိုးစားပါက ပြန်လည်ရရှိနိုင်ပါကြောင်း၊ ပြန်လည်စိုက်ပျိုးထိန်းခြင်းများကို ဝန်ကြီးဌာနတစ်ခုဖြင့် တစ်နိုင်ငံလုံးဒေသအနှံ့ မည်ကဲ့သို့မှ လွှမ်းခြုံနိုင်မည်မဟုတ်ဘဲ နိုင်ငံတော်ပုဂ္ဂလိက ပြည်သူများ လက်တွဲညီညီ တာဝန်ယူမှု၊ တာဝန်ခံမှု၊ အကျိုးခံစားမှု မှန်ကန်စွာရေးဆွဲသတ်မှတ်နိုင်မှသာ သဘာဝပတ်ဝန်းကျင် ပြန်လည်စိမ်းလန်းစိုပြေပြီး နိုင်ငံရောပြည်သူများပါ စဉ်ဆက်မပြတ်ဝင်ငွေထာဝရ ရရှိကြမှာဖြစ်ပါကြောင်း၊ ထို့ကြောင့် (၁) ပုဂ္ဂလိကတစ်ပိုင်တစ်နိုင်မှ စီးပွားဖြစ်စိုက်ပျိုးခွင့်ရှိ/မရှိ။ (၂) ပုဂ္ဂလိကမှ စိုက်ပျိုးနိုင်သည့် မြေနေရာ၊ မြေအမျိုးအစားများ၊ (၃) ပုဂ္ဂလိကစိုက်ခင်းများ ခွင့်ပြုခြင်း၊ မှတ်ပုံတင်ခြင်း မည်ကဲ့သို့ ဆောင်ရွက်ရမည်နည်း။ (၅) နှစ်ရှည်စီမံကိန်းကြောင့် မိမိသစ်တောစိုက်ခင်းအား လွှဲပြောင်းခြင်း၊ အမွေ ဆက်ခံခြင်း ခွင့်ပြုခြင်းရှိ/မရှိ။ (၆) သစ်တောစိုက်ခင်းမှထွက်ရှိလာသည့် သစ်အမျိုးအစားများကို နိုင်ငံတော်သို့ မည်သည့်အချိုးအစားဖြင့် အခွန်ပေးဆောင်ရမည်နည်း။ (၇) အခွန်ဆောင်ပြီးသစ်များကို လွတ်လပ်စွာရောင်းချ အသုံးပြုခွင့် ပေးခြင်းရှိ/မရှိများကို သိရှိလိုပါကြောင်းမေးမြန်းပါသည်။