(ဂ)-ပြည်ပရောက်အလုပ်သမားများမှ ပြည်ပတွင်မွေးဖွားခဲ့သော ကလေးသူငယ်များကို အိမ်ထောင်စု လူဦးရေစာရင်းပုံစုံ(၆၆/၆)ထဲသို့ ဖြည့်သွင်းနိုင်ရန် မည်သို့ဆောင်ရွက်ပေးမည်ကို သိလိုခြင်းနှင့် စပ်လျဉ်းသည့်မေးခွန်း

မြန်မာနိုင်ငံမှ နိုင်ငံရပ်ခြားသို့ သွားရောက်အလုပ် လုပ်ကိုင်နေသူများသည် အများအားဖြင့် အရွယ်ကောင်းလူငယ်များ ဖြစ်ကာ အချို့သည် အိမ်ထောင်သည်များဖြစ်ကြပြီး ဇနီးမောင်နှံနှစ်ဦးလုံး သွားရောက် အလုပ်လုပ်ကိုင်ကြရပါကြောင်း၊ မြန်မာနိုင်ငံသားဇနီးမောင်နှံနှစ်ဦးမှ ပြည်ပတွင် မွေးဖွား လာသော ကလေးများကို ၎င်းတို့၏ မိဘများရှိရာ မြန်မာနိုင်ငံသို့ နိုင်ငံခြားမွေး ကလေးများအား ပို့ဆောင်၍သော်လည်းကောင်း၊ ကလေးမွေးဖွားပြီးမိခင်နှင့်အတူသော်လည်းကောင်း ပြန်ရောက်လာခဲ့ကြပါကြောင်း၊ ထိုသို့ပြန်လည်ရောက်ရှိလာသောကလေးများအား မွေးရက်၊ မွေးလ အတိအကျနှင့် မွေးစာရင်းပြုလုပ်ရာတွင် စင်ကာပူနိုင်ငံ၊ ထိုင်းနိုင်ငံနှင့် မလေးရှားနိုင်ငံတို့တွင် မွေးဖွားသည့်အတွက် အိမ်ထောင်စုလူဦးရေစာရင်းထဲထည့်သွင်းရန် အခက်အခဲများစွာနှင့် ကြုံတွေ့နေရပါကြောင်း၊ နံပါတ်(၁) သက်ဆိုင်ရာအုပ်စု ကျန်းမာရေးဝန်ထမ်းထံမှမွေးစာရင်းရရှိရန် အခက်အခဲ၊ နံပါတ်(၂) မွေးစာရင်းမရှိသည့်အတွက် အိမ်ထောင်စုဇယားထဲထည့်သွင်းရန် အခက်အခဲများ ကြုံတွေ့နေရပါကြောင်း၊ မွေးစာရင်းနှင့် ပတ်သက်ပြီး နိုင်ငံရပ်ခြားတွင် မွေးလာသောကလေးချင်းအတူတူ အချို့ကမွေးစာရင်း လွယ်ကူစွာရရှိပြီး အိမ်ထောင်စုဇယားထဲ အလွယ်တကူ ထည့်နိုင်သော်လည်း အချို့က မွေးစာရင်းလွယ်ကူစွာမရရှိဘဲ အခက်တွေ့နေကြပါကြောင်း၊ အလုပ်သမား၊လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနမှ သတ်မှတ်ထားသည့် အချက်အလက်များ စုံလင်စွာတင်ပြတောင်းခံထားသော်လည်း နှောင့်နှေးကြန့်ကြာခြင်းများရှိနေကြပြီး မူလတန်း ကျောင်းတက်ရန်အရွယ်အထိအခက်အခဲနှင့် ကြုံတွေ့နေရကြောင်း၊ သို့ဖြစ်ပါ၍ ပြည်ပရောက်အလုပ်သမားများမှ ပြည်ပတွင်မွေးဖွားခဲ့သော ကလေးသူငယ်များကို အိမ်ထောင်စု လူဦးရေစာရင်းပုံစုံ(၆၆/၆)ထဲသို့ ဖြည့်သွင်းနိုင်ရန် မည်သို့ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။