(ဃ)-ဝိုင်းမော်မြို့နယ်၊ အမှတ်(၄)ရပ်ကွက်အတွင်းရှိ သင်္ချိုင်းဟောင်းမြေနေရာကို နိုင်ငံတော်အစိုးရပိုင် မြေအဖြစ် ပြန်လည်သိမ်းယူရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ဝိုင်းမော်မြို့နယ်အမှတ်(၄)ရပ်ကွက်အတွင်းရှိ တစ်ဦးတစ်ယောက်ပိုင်မြေအဖြစ် မတရားသိမ်းယူခဲ့သောသင်္ချိုင်းဟောင်းမြေနေရာသို့ နိုင်ငံတော်အစိုးရပိုင်မြေအဖြစ် ပြန်လည်သိမ်းယူပြီး မြို့နယ်ရှိ အများပြည်သူများအကျိုးရှိသော လုပ်ငန်းများဆောင်ရွက်ခွင့်ပြုနိုင်ရန် အစီအစဉ်ရှိ/မရှိနှင့် စပ်လျဉ်း သည့် မေးခွန်းဖြစ်ပါကြောင်း၊ ၎င်းမြေကွက်နှင့်ပတ်သက်ပြီး ပြည်သူများက မကြာခဏ တိုင်ကြားတင်ပြလျက်ရှိပါကြောင်း၊ အဆိုပါမြေကွက်သည်ဝိုင်းမော်မြို့နယ်၊ အမှတ်(၄)ရပ်ကွက်ကိုဖြတ်သန်းသွားသောမြစ်ကြီးနား-ဝိုင်းမော်-ဗန်းမော်သို့သွားသည့် ကားလမ်းမကြီး၏အရှေ့ဘက်တွင် တည်ရှိပါကြောင်း၊ ၎င်းမြေကွက်အကျယ်မှာ လက်ရှိတွင် ခုနစ်ဧကကျော်ခန့်ရှိကြောင်း၊ယခင်က ၎င်းမြေကွက်ကို နီးစပ်ရာ ရပ်ကွက်/ကျေးရွာများမှ ပြည်သူများက သင်္ချိုင်းသုသာန်မြေအဖြစ် အသုံးပြုခဲ့သော မြေကွက်ဖြစ်ပါကြောင်း၊ ၎င်းသုသာန်သင်္ချိုင်းမြေကို နိုင်ငံတော်မှ အများပြည်သူ အတွက် အကျိုးရှိစေသော လုပ်ငန်းဆောင်ရွက်မည်ဖြစ်ပါကြောင်းဟုဆိုကာ ဝိုင်းမော်မြို့နယ် အေးချမ်းသာယာရေးနှင့် ဖွံ့ဖြိုးရေး ကောင်စီဥက္ကဋ္ဌမှ ၉-၁၁-၂၀၀၉ ရက်နေ့ထုတ် စာအမှတ်၊ ၄/၁-၈/ဦး-၁(၇၆၉)ပါ အမိန့်အမှတ် (၂/၂၀၀၉)ကို ထုတ်ပြန်၍ အဆိုပါသင်္ချိုင်းမြေကို သိမ်းယူခဲ့ပါကြောင်း၊

ထိုသို့ အမိန့်ထုတ်ပြန်၍သိမ်းခဲ့သော မြေပေါ်တွင် ပုဂ္ဂလိကပိုင်မြေဩဇာထုတ်လုပ်ခြင်းလုပ်ငန်းကို ဟန်ပြအဖြစ်လအနည်းငယ်လုပ်ကိုင်ကာ ရပ်နားသွားကြပြီးနောက် ယနေ့အထိ အများပြည်သူများ အတွက် လုပ်ဆောင်နေသောစီမံကိန်းများ၊ လုပ်ဆောင်ထားသောလုပ်ငန်းများ တစ်ခုမှမရှိသည့် အပြင် အဆိုပါမြေကွက်ကို ထိုအချိန်၌ လုပ်ပိုင်ခွင့်ရှိသူက မိမိတစ်ဦးတစ်ယောက်ပိုင်မြေအဖြစ် ဧရိယာအကျယ် ၄.၉၅ ဧကကို ဂရန်အမည်ပေါက်ယူပြီးနောက် အခြားသူတစ်ဦးကို လွှဲပြောင်း ပေးခဲ့သည်ကိုသိရှိရပါကြောင်း၊ ၎င်းမြေကိုသိမ်းခဲ့စဉ်က မြေအစားအဖြစ် ခါရှီးကျေးရွာရှိ နောင်စီပေါ အနောက်ကွင်း ကွင်းအမှတ် (၄၉/၁)တွင်ရှိသော မြေ ၃.၁ ဧကကို သင်္ချိုင်းမြေအဖြစ် အသုံးပြုကြရန် အစားထိုးပေးခဲ့သော်လည်း လက်တွေ့တွင်ပြည်သူများ အကြောင်းအမျိုးမျိုးကြောင့် အသုံးပြု ခွင့်မရရှိခဲ့ကြောင်း၊ ၎င်းမြေကို အခြားတစ်ဦးတစ်ယောက်ကပိုင်ဆိုင်ထားသည်ကို သိရှိရပါကြောင်း၊ သိမ်းဆည်းစဉ်က ကတိပြုခဲ့သော စကားများ တစ်ခုမှ လုပ်ဆောင်ပေးခြင်း မရှိသည်ကိုတွေ့ရှိရပါကြောင်း၊ ဒေသခံပြည်သူများက သင်္ချိုင်းမြေအဖြစ် အခြားနေရာကို မိမိတို့ အစီအစဉ်ဖြင့် ပြန်လည်ဝယ်ယူအသုံးပြုနေရကြောင်း၊

ယခုလို ပြည်သူများအသုံးပြုနေသော သင်္ချိုင်းသုသာန်မြေကို မိမိတစ်ဦးအတွက် လုပ်ပိုင်ခွင့်အာဏာကို တလွှဲသုံးပြီး ဥပဒေနှင့်မညီသည့်အပြင်သင်္ချိုင်းကိုပြောင်းရွှေ့စေပြီး ကိုယ်ကျိုးအတွက် တစ်ဦးတစ်ယောက်ပိုင်မြေအဖြစ် ပြောင်းလဲပြုလုပ်ယူကာ အခြားသူထံလွှဲပြောင်းရောင်းချလိုက်ခြင်းမှာမြေသိမ်းစဉ်ကဆိုခဲ့သောနိုင်ငံတော်မှအများပြည်သူအတွက် အကျိုးရှိစေသောလုပ်ငန်းများဆောင်ရွက်မည်ဖြစ်ပါကြောင်းဟူသော စကားနှင့် လုံးဝကွဲလွှဲနေပါကြောင်း၊ သို့ဖြစ်ပါ၍ ဒေသခံပြည်သူများအနေဖြင့် အမှန်တကယ်မြို့နယ်အတွက်လိုအပ်သော၊ အများအတွက်အကျိုးရှိသောလုပ်ငန်းများဆောင်ရွက်လုပ်ကိုင်စေလိုသောကြောင့်ဝိုင်းမော်မြို့နယ်၊အမှတ်(၄)ရပ်ကွက်အတွင်းရှိသင်္ချိုင်းဟောင်းမြေနေရာကို နိုင်ငံတော် အစိုးရပိုင်မြေအဖြစ် ပြန်လည်သိမ်းယူရန် အစီအစဉ်ရှိ/မရှိ နှင့်မေးခွန်းမေးမြန်းပါသည်။