ပေါက်ခေါင်းမြို့ အမှတ်(၅) ရပ်ကွက် ပြည်-တောင်ငူလမ်းမကြီးပေါ်ရှိ မြို့နယ်စည်ပင် သာယာအဖွဲ့ပိုင်မြေကို ရုံးမြေအဖြစ် သတ်မှတ်ပြီး ယနေ့တိုင်စည်ပင်သာယာရုံးအဖြစ် သုံးစွဲသတ်မှတ် ခဲ့ပါကြောင်း၊ ထိုနေရာသည် မြန်မာ့ဆိုရှယ်လစ်လမ်းစဉ်အစိုးရလက်ထက်မတိုင်မီ ဟိုယခင်ကပင် ခေတ်အဆက်ဆက် မြို့နယ်အားကစားကွင်းအဖြစ် သတ်မှတ်ခဲ့ပြီး ဘောလုံးအားကစားပြိုင်ပွဲများ မြို့နယ်အဆင့်အခြားအားကစားပြိုင်ပွဲများကို ကျင်းပခဲ့သည့်နေရာလည်း ဖြစ်ပါကြောင်း၊ နိုင်ငံတော် ငြိမ်ဝပ် ပိပြားမှုတည်ဆောက်ရေးအဖွဲ့လက်ထက်တွင် အားကစားကွင်းအဖြစ်မှ နန္ဒဝန်ပန်းခြံအဖြစ် ပြောင်းလဲခြင်းကို ခံခဲ့ရသည့်နေရာဖြစ်ပါကြောင်း၊ ထိုသို့ပြောင်းလဲပြီး မြို့နယ်စည်ပင် ရုံးခန်းနှင်‌့ ဝန်ထမ်း အိမ်ရာများ ဝင်ရောက်ဆောက်လုပ်ခဲ့ပါကြောင်း၊ ၎င်းနေရာသည် ၂ ဧကတိတိကျယ်ဝန်းပြီး ပေါက်ခေါင်းမြို့၏ အချက်အခြာကျသည့် နေရာတွင်တည်ရှိသည့်အတွက်  ပေါက်ခေါင်းမြို့နယ် ပြည်သူလူထု လွတ်လပ်စွာဝင်/ထွက်သွားလာ ဆော့ကစားအပန်းဖြေနိုင်သည့်‌(Public Area) အဖြစ်သာ အသုံးပြုသင်‌့သည့်နေရာတစ်နေရာဖြစ်ပါကြောင်း၊   သို့ဖြစ်ပါ၍ ပေါက်ခေါင်းမြို့ အမှတ်(၅) ရပ်ကွက် ပြည်-တောင်ငူလမ်းမကြီးပေါ်ရှိ စည်ပင်သာယာရုံးတည်ရှိရာ ပန်းခြံ အဟောင်းကို အများပြည်သူ လွတ်လပ်စွာ ဝင်/ထွက်သွားလာ အပန်းဖြေဆော့ကစားနိုင်သော (Public Area) အဖြစ် ပြန်လည်သတ်မှတ်ပေးရန် အစီအစဉ်ရှိ/မရှိ ကိုသိလိုပါကြောင်းမေးမြန်းပါသည်။