ပြီးခဲ့သည့် ၆ လခန့်မှစပြီး မန္တလေးတိုင်းဒေသကြီးအစိုးရအဖွဲ့၏ဦးဆောင်မှုဖြင့် ထန်းပင်၊ ထန်းတောများ ထိန်းသိမ်းရေးနှင့် ထန်းတောင်သူများဘဝမြင့်မားရေးအတွက် အလုပ်ရုံဆွေးနွေးပွဲကို မိတ္ထီလာ တက္ကသိုလ်တွင် တစ်ကြိမ်၊ မန္တလေးတက္ကသိုလ်တွင် တစ်ကြိမ်၊ သက်ဆိုင်ရာအဖွဲ့အစည်းများအားလုံး ပူးပေါင်းဆွေးနွေးခဲ့ကြပါကြောင်း၊ အလုပ်ရုံဆွေးနွေးပွဲတွင် မိမိကိုယ်တိုင်ပါဝင်တက်ရောက် ဆွေးနွေးပြီး အဆိုပါအလုပ်ရုံဆွေးနွေးပွဲက ရရှိလာသည့် အချက်အလက်များအပေါ်မူတည်ပြီး   မေးမြန်းရခြင်း ဖြစ် ပါကြောင်း၊ ရည်ရွယ်ချက်က (၁) မြန်မာနိုင်ငံအလယ်ပိုင်းတွင် တစ်နေ့ထက်တစ်နေ့ ခုတ်ယူ ရောင်းချမှုကြောင့် လျော့နည်းလာသော သဘာဝအမွေအနှစ်တစ်ခုဖြစ်သည့် ထန်းပင်နှင့် ထန်းတော များ ပျောက်ကွယ်သွားခြင်း မရှိစေရန် ထိန်းသိမ်းကာကွယ်ပေးရန် ဖြစ်ပါကြောင်း၊ ယနေ့အချိန်အထိ ထန်းပင်နှင့် ထန်းတောများကို ကာကွယ်ထိန်းသိမ်းစောင့်ရှောက်မှု နည်းပါးပါကြောင်း၊ အဘယ့်ကြောင့် ဆိုသော် ထန်းပင်၊ ထန်းပိုင်ရှင်နှင့် ထန်းတောင်သူများ၏ဘဝသည် တစ်နေ့တခြားနိမ့်ပါးလာသည့် အတွက် တစ်ပင်လျှင် ၅၀၀၀ ကျပ်၊ ၁၀၀၀၀ ကျပ် ရရုံဖြင့် ခုတ်ရောင်းနေကြပါကြောင်း၊ မန္တလေးမြို့၏နာမည်ကြီး သမိုင်းဝင်တစ်ခုဖြစ်သော အိမ်ရှေ့မင်းထန်းတောသည် နှစ်ပေါင်း ၁၅၀ ကျော်ပြီ ဖြစ်ပါကြောင်း၊ အပင်ပေါင်း ၆၀၀၀ ကျော် ကျန်သေးပါကြောင်း၊ ယခု CSO များနှင့် ပူးပေါင်းပြီး နယ်နိမိတ်တိုင်စိုက်ခြင်းများ၊ ကာကွယ်ရန် ပြင်ဆင်နေပြီဆိုသည်ကို မိမိတို့သိရှိရပါကြောင်း၊ (၂) ခေတ် အဆက်ဆက် ထန်းပင်ဖြင့်အသက်မွေးဝမ်းကျောင်းပြုခဲ့သည့် အခြေခံလူတန်းစားတစ်ရပ်ဖြစ်သော မြန်မာပြည်အလယ်ပိုင်းရှိ ထန်းပိုင်ရှင်၊ ထန်းတောင်သူ ၃ သိန်းခန့်နှင့် ၎င်းတို့ကိုမှီခိုနေသည့် မိသားစုများသည် ပညာရေး၊ ကျန်းမာရေး၊ လူမှုရေး၊ စီးပွားရေး အဖက်ဖက်က နိမ့်ကျနေသည်ကို တွေ့ရှိနေရသည့်အတွက် ၎င်းတို့၏ဘဝမြှင့်တင်ပေးမှသာလျှင် ထန်းပင်၊ထန်းတောများကို ထိန်းသိမ်း နိုင်မည် ဖြစ်ပါကြောင်း၊ (၃) ယနေ့အချိန်တွင် အဖက်ဖက်က နိမ့်ကျနေသော ထန်းပိုင်ရှင်နှင့် ထန်း တောင်သူများနှင့်အတူ၊ မိမိတို့၏လုပ်ငန်းနှင့်အတူ ဘဝရှင်သန်ရပ်တည်နိုင်ရေးအတွက် ထန်းနှင်‌့ ပတ်သက်သော အမတော်ကြေးများ၊ ချေးငွေများ ရရှိရေးဖြစ်ပါကြောင်း၊ သို့မဟုတ်ပါက မည်သို့မျှု မရပ်တည်နိုင်တော့ပါကြောင်း၊ ၎င်းတို့၏ဘဝတို့သည် အလွန်နိမ့်ပါးနေသည်ကို တွေ့ရှိရပါကြောင်း၊ ယနေ့အချိန်အထိ ခေတ်အဆက်ဆက်တွင်မည်သည့်ဝန်ကြီးဌာနကမျှှ တာဝန်ယူဆောင်ရွက်ပေးခြင်း မရှိသေးသည်ကို တွေ့ရှိရပါကြောင်း၊

(၄) ထန်းနှင့် ထန်းရွက် ကုန်ပစ္စည်းများဖွံ့ဖြိုးတိုးတက်ရေး၊ အရည်အသွေးမြှင့်တင်ရေး၊ နည်းပညာ အထောက်အကူရရှိရေးနှင့် ဈေးကွက်ဖော်ဆောင်ပေးနိုင်ရေး ဟူသည့်အချက်ကိုလည်း တွေ့ရှိရ ပါကြောင်း၊ နိုင်ငံတကာတွင် ထန်းနှင့်ပတ်သက်သည့်ပစ္စည်းများ၊ ထန်းနှင့်ပတ်သက်သည့် လက် ဆောင်ပစ္စည်းများ၊ ထန်းက ထွက်ရှိလာသော Product အားလုံးကို အဆင့်မြှင့်တင် ဆောင်ရွက်နေခြင်း နည်းတူ နည်းပညာဖွံ့ဖြိုးရန်အတွက် ထောက်ပံ့ပေးရန် လိုအပ်လာပါကြောင်း၊ (၅) ခေတ်အဆက်ဆက် လက်ဆင့်ကမ်းသယ်ဆောင်လာခဲ့ကြသည့် ထန်းနှင့်ပတ်သက်သော အသုံးအဆောင်များ၊ ယဉ်ကျေးမှု၊ စရိုက်လက္ခဏာများဖွံ့ဖြိုးတိုးတက်စေရန် ဆောင်ရွက်ခြင်းဖြင့် ထန်းယဉ်ကျေးမှုကို လက်ဆင့်ကမ်း ထိန်းသိမ်းမြှင့်တင်နိုင်ရန် လိုအပ်ပါကြောင်း၊ နောက်ဆုံးတစ်ချက်မှာ ထန်းနှင့် ထန်းထွက်ပစ္စည်းများ၊ ထန်းတောင်သူများကို အခြေပြုပြီး ခရီးသွားဝန်ဆောင်မှုလုပ်ငန်းများ ဖွံ့ဖြိုးတိုးတက်ရေးအတွက် အလေးပေးဆောင်ရွက်ပေးရန် လိုအပ်ပါကြောင်း၊ ယခုကဲ့သို့  လုပ်ဆောင်နိုင်မှသာလျှင် ထန်းပင်နှင့် ထန်းတောများကို ကာကွယ်နိုင်မည် ဖြစ်ပါကြောင်း၊  ထန်းနှင့်ပတ်သက်သော ထန်းတောင်သူများ၊ ထန်းပိုင်ရှင်များလည်း ၎င်းတို့၏ဘဝရပ်တည်နိုင်မှုနှင့် လူမှုရေး၊ စီးပွားရေး၊ ပညာရေး၊ ကျန်းမာရေး အားလုံးမြှင့်တင်နိုင်မည် ဖြစ်သည့်အတွက် မြန်မာနိုင်ငံအလယ်ပိုင်းရှိ ထန်းပင်နှင့် ထန်းတောများ ထိန်းသိမ်းရေး၊ ထန်းတက်သူများဘဝ တိုးတက်မြင့်မားစေရေးအတွက် အလေးထားဆောင်ရွက်ပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။