ပျော်ဘွယ်မြို့နယ် ကျေးလက်ဒေသ ဖွံ့ဖြိုးရေးအတွက် ၂၀၁၇-၂၀၁၈ ဘဏ္ဍာရေးနှစ်တွင် ဆောင်ရွက်ရန် လျာထားတင်ပြခဲ့သည့် လမ်းတံတား တည်ဆောက်ရေး လုပ်ငန်းများသည် နိုင်ငံတော်၏ ၂၀၁၇-၂၀၁၈ ဘဏ္ဍာရေး လျာထားချက်တွင် ပါဝင်ခြင်း မရှိပါသဖြင့် ပြည်ထောင်စု၏ ဘဏ္ဍာရေး လျာထားချက် ပိုလျှံရန်ပုံငွေ သို့မဟုတ် ဖြည့်စွက် ရန်ပုံငွေမှဖြစ်စေ၊ တိုင်းဒေသကြီး ရန်ပုံငွေမှဖြစ်စေ ခွဲဝေချထားပေးရန် အစီအစဉ်ရှိ/မရှိနှင့် စပ်လျဉ်းသည့်မေးခွန်း

ပျော်ဘွယ်မြို့နယ်သည် ဧရိယာ ၆၃၇.၈၂ စတုရန်းမိုင်နှင့် ရပ်ကွက် ၉ ခု၊ ကျေးရွာအုပ်စု ၇၅ အုပ်စု၊ ကျေးရွာပေါင်း ၃၁၇ ရွာရှိပြီး ဆက်သွယ်သွားလာမှု ခက်ခဲသည့် ဒေသတစ်ခုဖြစ်ပါကြောင်း၊ ပြီးခဲ့သည့် နိုင်ငံတော်အစိုးရများ၏ ကျေးလက်ဒေသဖွံ့ဖြိုးရေး လုပ်ငန်းစဉ်များကြောင့် သွားလာဆက်သွယ်မှု တိုးတက်လာခဲ့ပါသော်လည်း ကျေးလက်လမ်း၊ တံတားလိုအပ်ချက်များ ရှိနေသည့်အတွက် အခက်အခဲ ဖြစ်နေဆဲဖြစ်ပါကြောင်း၊ ၂၀၁၆-၁၇ ဘဏ္ဍာရေးနှစ်ကုန်တွင် ကျေးလက်လမ်း အခြေအနေ တင်ပြပါစာရင်းတွင် မြေသားလမ်း ၇၈ မိုင် ၆.၆၀၇ ဖာလုံနှင့် နောက်ထပ် ဆက်လက် ဆောင်ရွက်ပေးရမည့် မိုင် ၁၁၂ မိုင်ကျော်ရှိသည့်အတွက် စုစုပေါင်း ရာသီမရွေး သွားလာနိုင်အောင် ဆောင်ရွက်ပေးရမည့် လမ်းမိုင်သည် ၁၉၀ မိုင်နှင့် ၆ ဖာလုံခန့်ရှိပါကြောင်း၊ ၎င်းကိစ္စနှင့် ပတ်သက်ပြီး ၂၀၁၆ ခုနှစ် ဇူလိုင်လဆန်းတွင် မန္တလေးတိုင်းဒေသကြီး ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနက ပျော်ဘွယ်မြို့နယ်အတွင်း ၂၀၁၇-၁၈ မှ ၂၀၂၀-၂၁ ခုနှစ်အထိ ဆောင်ရွက်ရမည့် လမ်းတံတား စာရင်းကို လွှတ်တော်ကိုယ်စားလှယ်များနှင့် ညှိနှိုင်းရေးဆွဲပြီး ညွှန်ကြားလာခဲ့ပါကြောင်း၊ ထို့ကြောင့် ဦးစားပေးဆောင်ရွက်သင့်သည့် လမ်း၊ တံတားစာရင်းများကို လေးနှစ်စာ ညှိနှိုင်းရေးဆွဲ တင်ပြခဲ့ပါကြောင်း၊ ၂၀၁၆ ခုနှစ် သြဂုတ်လ တတိယပတ်တွင် ပြည်ထောင်စုအစိုးရ၊ သက်ဆိုင်ရာဝန်ကြီးဌာန ကျေးလက်ဒေသ ဖွံ့ဖြိုးတိုးတက်ရေး (ရုံးချုပ်) မှ ၂၀၁၇-၁၈ မှ ၂၀၃၀-၂၀၃၁ ဘဏ္ဍာရေးနှစ်အထိ လမ်း၊ တံတားနှစ်တို၊ နှစ်ရှည် ၁၅ နှစ် စီမံကိန်းကို ကာလတို ငါးနှစ်စီမံကိန်း သုံးခုနှင့် ရေးဆွဲတင်ပြရန်လည်း ညွှန်ကြားလာခဲ့ပါကြောင်း၊ ၎င်း ညွှန်ကြားချက်တွင် ပထမငါးနှစ်၏ နှစ်အလိုက် ဦးစားပေးလျာထားခြင်းကို သက်ဆိုင်ရာ ဌာနဆိုင်ရာများ၊ လွှတ်တော် ကိုယ်စားလှယ်များ၊ တိုင်းဒေသကြီး/ပြည်နယ်များမှ ပါဝင်သင့်သူများနှင့်ဖွဲ့ပြီး ရွေးချယ်ပေးရန် ညွှန်ကြားချက်အရ မိမိတို့အားလုံး ညှိနှိုင်းတိုင်ပင်ပြီး ထပ်မံရေးဆွဲတင်ပြခဲ့ပါကြောင်း၊ ဝန်ကြီးဌာန၏ မျှော်မှန်းချက်သည် စီမံကိန်းနောက်ဆုံးနှစ်ဖြစ်သည့် ၂၀၃၀-၃၁ ခုနှစ်ကုန်တွင် လက်ရှိ ကျေးလက်ဒေသလမ်းအားလုံး ရာသီမရွေး သွားလာနိုင်သည့်လမ်း ၁၀၀ ရာခိုင်နှုန်းဖြစ်ရန် ရည်မှန်းထားသည့်အတွက် ကျေးလက်နေပြည်သူများ လွန်စွာဝမ်းမြောက်ဖွယ်ရာ ဖြစ်ခဲ့ရပါကြောင်း၊

ထို့အပြင် ကျေးလက်ဒေသ ဖွံ့ဖြိုးတိုးတက်ရေးဦးစီးဌာန (ရုံးချုပ်) က ၂၀၁၇ ခုနှစ် ဇန်နဝါရီလ လယ်ခန့်တွင် ကျေးလက်လမ်း၊ တံတားများကို ပြည်ပမိတ်ဖက်အဖွဲ့အစည်း အကူအညီနှင့် ဆောင်ရွက်ရန် ၂၀၁၇-၁၈ မှ ၂၀၂၀-၂၁ အထိ လေးနှစ်စာ ထပ်မံလျာထားပေးရန် ညွှန်ကြားလာပါကြောင်း၊ ညွှန်ကြားချက်အရလည်း မိမိတို့ ထပ်မံညှိနှိုင်း ပေးပို့ခဲ့ပြီး ယခုလို ပျော်ဘွယ်မြို့နယ် ကျေးလက်လမ်း၊ တံတားတည်ဆောက်ရေး လုပ်ငန်းလိုအပ်ချက်များနှင့် ပတ်သက်ပြီး အထက်ဌာနများက တောင်းခံလာတိုင်း မဆိုင်းမတွ ကွင်းဆင်းစစ်ဆေး ညှိနှိုင်းဆွေးနွေးပြီး ရေးဆွဲ တင်ပြခဲ့သည်မှာလည်း အကြိမ်ကြိမ် ဖြစ်ပါကြောင်း၊ မိမိတို့ ကြိုးစား‌ဆောင်ရွက် တင်ပြခဲ့ပါသော်လည်း ပြည်ထောင်စုအစိုးရ၏ ၂၀၁၇-၁၈ ဘဏ္ဍာရေးလျာထားချက်တွင် ပျော်ဘွယ်မြို့နယ်၏ ကျေးလက်ဒေသများအတွက် လမ်း၊ တံတားများ တည်ဆောက်ရန် ရန်ပုံငွေပါဝင်ခြင်း မရှိသေးပါကြောင်း၊ လက်ရှိနိုင်ငံတော်အစိုးရက ဆင်းရဲ့မွဲတေမှု လျှော့ချရေးကို ကျေးလက်နေပြည်သူများ၏ လူမှုစီးပွားရေး မြှင့်တင်ရေးကို အလေးထားကြောင်း ပြောကြားနေခြင်း ဖြစ်ပါကြောင်း၊ ထို့ကြောင့် နိုင်ငံတော်အစိုး၏ ၂၀၁၇-၁၈ ဘဏ္ဍာရေးနှစ် လျာထားချက်တွင် မပါဝင်ခဲ့သည့် ပျော်ဘွယ် မြို့နယ် ကျေးလက်ဒေသနေ ပြည်သူများ၏ လူမှုစီးပွားရေးဘဝ အခြေခံအကျဆုံးဖြစ်သည့် လမ်း၊ တံတားတည်ဆောက်ရေး လုပ်ငန်းများကို ပြည်ထောင်စုအစိုးရ၏ ဘတ်ဂျက်လျာထားချက် ပိုလျှံငွေ သို့မဟုတ် ဖြည့်စွက်ရန်ပုံငွေမှဖြစ်စေ၊ တိုင်းဒေသကြီး၏ ရန်ပုံငွေမှဖြစ်စေ ခွဲဝေချထား ဆောင်ရွက်ပေး စေလိုပါကြောင်း ကျေးလက်နေ ပြည်သူများကိုယ်စား သိရှိလိုပါကြောင်း မေးမြန်းပါသည်။