ပူတာအိုမြို့နှင့် မြစ်ကြီးနားကြား ပြည်ထောင်စု ကားလမ်းမကြီးသည် ခရီးသည် တင်ကားကြီး၊ ကားငယ်များ သွားလာနိုင်ခြင်း မရှိသောကြောင့် ပူတာအို ခရိုင်ရှိ ပြည်သူများ၊ နိုင်ငံ့ဝန်ထမ်းများ၊ ကျောင်းသားကျောင်းသူများ၊ ခရီးသွားဧည့်သည်များသည် လေကြောင်းနှင့်သာ အဓိကထား သွားလာနေရပါကြောင်း။ သို့သော် မြစ်ကြီးနား-ပူတာအို လေကြောင်းများဖြင့် လိုက်ပါသည့် ခရီးသည်များသည် လေကြောင်းပျံသန်းချိန်အကွာအဝေးနှင့် ညီမျှမှုမရှိသော ကီလိုနှုန်းထားကို ပေးဆောင်နေရပါကြောင်း၊ လေကြောင်းခရီးသည်တစ်ဦး၏ ရပိုင်ခွင့် ၂၀ ကီလိုထက်ပိုသော ပစ္စည်းတင်ခသည် ရန်ကုန်- မြစ်ကြီးနား ပျံသန်းချိန် နှစ်နာရီ ၂၀ မိနစ်တွင် တစ်ကီလို ၂၀၀၀ ကျပ်၊ ရန်ကုန်-မန္တလေး ပျံသန်းချိန် တစ်နာရီ ၁၀ မိနစ်တွင် ခရီးသည်၏ရပိုင်ခွင့်ထက် ပိုသောပစ္စည်းတင်ခသည် တစ်ကီလို ၂၀၀၀ ကျပ်နှင့် မန္တလေး-မြစ်ကြီးနား ပျံသန်းချိန် တစ်နာရီ၊  ခရီးသည်၏ရပိုင်ခွင့်ထက် ပိုသောပစ္စည်းတင်ခသည် တစ်ကီလိုကို ၂၀၀၀ ကျပ်အသီးသီး ပေးဆောင်ရပါကြောင်း၊ မြစ်ကြီးနား-ပူတာအို ပျံသန်းချိန် ၃၅ မိနစ်၊ ခရီးသည်၏ ရပိုင်ခွင့်ထက်ပိုသော ပစ္စည်းတင်ခသည် တစ်ကီလိုကို ၂၀၀၀ ကျပ်ဖြစ်သောကြောင့် ခရီးသည်၏ ရပိုင်ခွင့် ထက်ပိုသောပစ္စည်း တင်ခသည် လေကြောင်းခရီးစဉ်ပျံသန်းချိန်နှင့် မညီမျှဖြစ်နေသကဲ့သို့ ပျံသန်းချိန် အဝေးနှင့်အနီး အတူတူ ဖြစ်နေသည်ကို ယခုဖော်ပြချက်အရ အားလုံးသိပြီးဖြစ်ပါကြောင်း။

သို့ဖြစ်ပါ၍ မြစ်ကြီးနား-ပူတာအို မြန်မာ့အမျိုးသားလေကြောင်းနှင့် ပုဂ္ဂလိကလေကြောင်းခရီးစဉ်တွင် လိုက်ပါမည့် ခရီးသည်၏ရပိုင်ခွင့် Kg 20 ထက်ပိုသောပစ္စည်းတင်ခကို လေယာဉ်ပျံသန်းချိန် အကွာအဝေးနှင့် မိနစ် သတ်မှတ်နှုန်းထားအတိုင်း အမြန်ဆုံးပြင်ဆင်ပေးရန် အစီအစဉ်ရှိ/မရှိ မေးမြန်းပါသည်။