မိုင်းကိုင်မြို့နယ် ပြည်သူ့လွှတ်တော်ကိုယ်စားလှယ် လွှတ်တော် အတွေ့အကြုံ ရှင်းလင်းပွဲနှင့် လူထုတွေ့ဆုံပွဲကို ၂၅-၂-၂၀၁၆ ရက်နေ့ မိုင်းကိုင်မြို့နယ်၊ ခမ်းနားကျေးရွာအုပ်စု၊ ဝမ်ယက် ကျေးရွာတွင်ပြုလုပ်ရာ ကျေးရွာလူထု ၇၀၀ ခန့်တက်ရောက်ခဲ့ပါကြောင်း၊ အဆိုပါတွေ့ဆုံပွဲတွင် တက်ရောက်လာသူများမှ ၎င်းတို့ဒေသအတွင်း ဟိန်းမေတ္တာသတ္တု တူးဖော်ရေးကုမ္ပဏီ လီမိတက်က ကျောက်မီးသွေးတူးဖော်နေခြင်းအား ရပ်ဆိုင်းပေးပါရန် တင်ပြတောင်းဆိုခဲ့ကြပြီး ကန့်ကွက်ကြောင်းလက်မှတ်ရေးထိုးခဲ့ကြပါကြောင်း၊

ဟိန်းမေတ္တာ သတ္တုတူးဖော်ရေး ကုမ္ပဏီလီမိတက်သည် သတ္တုတူးဖော် ထုတ်လုပ်ခွင့်ကို ၁၀-၁၂-၂၀၁၅ ရက်စွဲပါ ခွင့်ပြုမိန့်အမှတ်(၀၃၈/၂၀၁၅)ဖြင့် ရှမ်းပြည်နယ်၊ လွိုင်လင်ခရိုင်၊ မိုင်းကိုင်မြို့နယ်၊ ဝမ်ယက်/ခမ်းနားကျေးရွာအုပ်စု၊ ဝမ်လွေးဒေသအကျယ်အဝန်း ၄၉.၅၀ ဧကတွင် အသေးစားထုတ် လုပ်ခွင့်ရရှိပြီး ၂၀၁၇ ခုနှစ် ဖေဖော်ဝါရီလတွင် စတင်တူးဖော် ဆောင်ရွက်ခဲ့ကြောင်း သိရှိခဲ့ရပြီး ကျောက်မီးသွေး တူးဖော်ခြင်းကြောင့် မိုင်းကိုင်မြို့နယ်ရှိ ကျေးရွာ ၉ ရွာ၊ အိမ်ခြေ ၅၀၀ ခန့်ရှိ လယ်ယာမြေများ၏ ရေအရင်းအမြစ်များ ပျက်စီးဆုံးရှုံးရမည်ဖြစ်ကာ မိုင်းကိုင်မြို့နယ်မှအစပြု၍ လဲချား၊ နမ့်ဆန်၊ ကျိုင်းတောင်း၊ လင်းခေးမြို့များကို ဖြတ်သန်း၍ သံလွင်မြစ်အတွင်းသို့စီးဝင်သော တိန်းချောင်း၏ မြစ်ဖျားခံရာ ဒေသလည်းဖြစ်ပါသဖြင့် တိန်းချောင်း တစ်လျှောက်ကိုလည်း ဆိုးကျိုးများ ဖြစ်ပေါ်စေမည် ဖြစ်ပါကြောင်း၊ ရေဝေရေလဲဒေသ သစ်တောများ ပျက်စီးပြုန်းတီးခြင်း၊ စိုက်ပျိုး ရေများခမ်း ခြောက်စေခြင်း၊ လယ်ယာမြေများ ပျက်စီးစေခြင်း၊ နုန်းမြေများ ပို့ချခြင်းဖြင့် လယ်ယာ ချောင်းမြောင်းကောခြင်း၊ ကျန်းမာရေးဆိုင်ရာ ထိခိုက်မှုရှိစေခြင်းတို့ကြောင့် ကျောက် မီးသွေးသတ္တု တူးဖော်ထုတ်လုပ်ခြင်းကို ဒေသခံပြည်သူများမှ အစဉ်ကန့်ကွက်ခဲ့ပါကြောင်း ဟိန်းမေတ္တာ သတ္တုတူးဖော်ရေး ကုမ္ပဏီလီမိတက်အနေဖြင့် သတ္တုတူးဖော်ခွင့် လျှောက်ထားရာတွင် ဒေသခံပြည်သူများ၏ သဘောထားအား ရယူခြင်းမရှိဘဲ ဆောင်ရွက်ခဲ့ခြင်းအပေါ် ဒေသခံ ပြည်သူလူထုနှင့် သံဃာတော်များ အပါအဝင် အပြင်းအထန်ကန့်ကွက်ခဲ့ပါကြောင်း၊

သို့ဖြစ်ပါ၍ ရှမ်းပြည်နယ်၊ လွိုင်လင်ခရိုင်၊ မိုင်းကိုင်မြို့နယ်၊ ဝမ်ယတ်/ခမ်းနားကျေးရွာအုပ်စု၊ ဝမ်လွေးဒေသတွင် ဟိန်းမေတ္တာ သတ္တုတူးဖော်ရေး ကုမ္ပဏီလီမိတက်အား ကျောက်မီးသွေးတူးဖော် ထုတ်လုပ်ခွင့်ကို သက်ဆိုင်ရာ ဝန်ကြီးဌာနအနေဖြင့် ဒေသခံပြည်သူများ၏ ဆန္ဒသဘောထား ရယူခြင်းမရှိဘဲ မည်သည့်အတွက်ကြောင့် သတ္တုတူးဖော် ထုတ်လုပ်ခွင့်ပြုမိန့် ထုတ်ပေးသည်ကို သိရှိလိုပါကြောင်း၊ ဟိန်းမေတ္တာ သတ္တုတူးဖော်ရေး ကုမ္ပဏီလီမိတက်က ဝမ်လွေးဒေသတွင် ကျောက်မီးသွေး တူးဖော်ထုတ်လုပ်နေမှုကို ဒေသခံပြည်သူလူထုနှင့် သံဃာတော်တို့က အပြင်း အထန်ကန့် ကွက်ကြောင်းနှင့် တူးဖော်ထုတ်လုပ်နေမှုအား အမြန်ဆုံး ရပ်ဆိုင်းပေးရန် တောင်းဆိုမှုကို သက်ဆိုင်ရာ ဝန်ကြီးဌာနက မည်ကဲ့သို့အရေးယူ ဆောင်ရွက်ပေးမည်၊ ကျောက်မီးသွေး တူးဖော်ထုတ်လုပ်နေခြင်း လုပ်ငန်းများကြောင့် လယ်ယာစိုက်ပျိုးရေးအတွက် အားထားရသော ရေထွက်ဦးချောင်းများ၊ ရေပေးမြောင်းများ ပျက်စီးခြင်းအား မည်ကဲ့သို့ ပြန်လည်ပြုပြင်ပေးမည်နှင့် ပျက်စီးဆုံးရှုံးသွားသော ရေဝေရေလဲ သစ်တောများအား မည်ကဲ့သို့ပြန်လည် အစားထိုး ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။