ပြည်ထောင်စုကြီးကို ဘက်စုံဖွံ့ဖြိုးတိုးတက်သည့် နိုင်ငံတော်အဖြစ် ဖော်ဆောင်ရာတွင် တစ်နိုင်ငံလုံး ကျန်းမာကြံ့ခိုင်ရေး၊ စိတ်ဓာတ်နှင့် အကျင့်စာရိတ္တ မြင့်မားရေးသည် အဓိကဦးတည်ချက် အခန်းကဏ္ဍတွင် ပါဝင်နေပါကြောင်း၊ ကျန်းမာကြံ့ခိုင်ရေးအတွက် ရောဂါရှာဖွေရေး၊ ကုသတိုက်ဖျက်ရေးဆိုင်ရာ ဆေးရုံ၊ ဆေးခန်းများနှင့်သာ ဆောင်ရွက်၍ မပြည့်စုံနိုင်ဘဲ ကျန်းမာကြံ့ခိုင်သန်စွမ်းရေး၊ စိတ်ဓာတ်နှင့် အကျင့်စာရိတ္တ မြင့်မားရေးတို့အတွက် အားကစား ကဏ္ဍသည်လည်း မရှိမဖြစ်အဓိက လိုအပ်လျက်ရှိပါကြောင်း၊ ယခုအခါ အားကစားကဏ္ဍဖွံ့ဖြိုး တိုးတက်ရေးအတွက် အားကစားသိပ္ပံကျောင်းများလည်း ဖွင့်လှစ်ဆောင်ရွက် လျက်ရှိနေခြင်းကို တွေ့ရှိရပါကြောင်း၊ မြို့နယ်အလိုက် အားကစားဖွံ့ဖြိုးရေး လုပ်ငန်းများကိုလည်း အားသွန်ခွန်စိုက် တိုးမြှင့်ဆောင်ရွက်နေသည်ကို တွေ့ရှိရပါကြောင်း၊ ယခုအချိန်တွင် တစ်နိုင်ငံလုံးအတိုင်းအတာအရ မူးယစ်ဆေးဝါးနှင့် စိတ်ကိုပြောင်းလဲ စေတတ်သော ဆေးဝါးများသည် မျိုးဆက်သစ်များနှင့် အနာဂတ် နိုင်ငံတော်အတွက် အလွန်အန္တရာယ်ကြီးမားစွာ ဖြစ်နေကြောင်း၊ မူးယစ်ဆေးဝါး၏ သားကောင်များ အန္တရာယ်မှ ဟန့်တားကာကွယ်ရန်အတွက် အားကစားကဏ္ဍသည် အလွန်အရေးကြီးသော အခန်းကဏ္ဍတစ်ခု ဖြစ်ပါကြောင်း၊ သို့သော်လည်း ရှမ်းပြည်နယ်၊ မိုင်းကိုင်မြို့နယ်တွင် အားကစားနှင်‌့ ကာယပညာဦးစီးဌာန ဖွင့်လှစ်ထားခြင်း မရှိသေးကြောင်း၊ မိုင်းကိုင်မြို့နယ်အတွင်း မှီတင်းနေထိုင်ကြသော ပြည်သူများ၊ မျိုးဆက်သစ် လူငယ်များ ကျန်းမာကြံ့ခိုင်သန်စွမ်းရေး၊ စိတ်ဓာတ်နှင့် အကျင့်စာရိတ္တ မြင့်မားရေးအတွက် အားကစားနှင့် ကာယပညာ ဦးစီးဌာနတစ်ခု ဖွင့်လှစ်ပေးရန် လိုအပ်နေပါကြောင်း၊ သို့ဖြစ်ပါ၍ အားကစားကဏ္ဍနှင့် ပတ်သက်ပြီး ဦးစီးဌာနမရှိသည့် မိုင်းကိုင်မြို့နယ်အား အားကစားနှင့် ကာယပညာဦးစီးဌာန ဖွင့်လှစ်ပေးနိုင်ရေး မည်သို့ဆောင်ရွက်ပေးနိုင်မည်နှင့် မည်သည့်အချိန်ကာလတွင် အကောင်အထည်ဖော် ဖွင့်လှစ်ပေးနိုင်မည်ကို သိရှိလိုပါကြောင်း မေးမြန်းပါသည်။