(က)-မောက်မယ်မြို့နယ်၊ ကဒူးကြီးကျေးရွာအုပ်စု (ကုံးလု၊ပန်းကျိုင်း၊မိုက်ရှားစေး-ပုံစုတ်)ရွာချင်းဆက် မြေသားလမ်း ဖောက်လုပ်ခြင်းကို ဆက်လက် ဆောင်ရွက် ပေးပါရန် နှင့်စပ်လျဉ်းသည့် မေးခွန်း
မေးခွန်း အကြောင်းအရာ
မောက်မယ်မြို့နယ် ကဒူးကြီးဒေသသို့ ဆက်သွယ်သွားလာရေး လွယ်ကူစေရန် ယခင်အစိုးရလက်ထက်၌ ဝမ်စလောင်း-ကဒူးကြီး ဖောက်လုပ်ခြင်းကို နယ်စပ်ရေးရာဝန်ကြီးဌာန၊ နယ်စပ်ဒေသ တိုင်းရင်းသား လူမျိုးများဖွံ့ဖြိုးတိုးတက်ရေးဦးစီးဌာနမှ မြေသားလမ်းများ ဖောက်လုပ်ခြင်း၊ ကျောက်ချောလမ်းများ ခင်းပေးခြင်းတို့ဖြင့် အဆင့်မြှင့်တင် ဆောင်ရွက်ပေးခဲ့ရာ ယခုဘဏ္ဍာရေးနှစ် အထိတိုင် ဆောင်ရွက်ပေးနေဆဲ ဖြစ်ပါကြောင်း၊ ဝမ်စလောင်း-ကဒူးကြီးလမ်းမှတစ်ဆင့် အနောက်ဘက် တောင်ပေါ်ဒေသ နန်းဟီး၊ ဝမ်းမ၊ နောင်ထောင်ဒေသများသို့ ဆက်သွယ် သွားလာနိုင်ပြီဖြစ်ပါကြောင်း၊ ယခင်က လူသွားလမ်း ဝန်တင်မြင်းလမ်းသာ ရှိခဲ့သော်လည်း ယခုအခါ မြင်းများအစား မော်တော်ဆိုင်ကယ်များ တွင်ကျယ်စွာ အသုံးပြုလာနိုင်ပြီ ဖြစ်ပါကြောင်း၊ ကုံးလုမ်းရွာ တောင်ဘက်ခြမ်းဖြစ်သော ပန်းကျိုင်း-မိုက်ရှားစေး-ပုံစုတ်ရွာ အထိ မြေသားလမ်းမှာ ယခင်က ရ.လ.လ.ဖ ငြိမ်းချမ်းရေးအဖွဲ့ သစ်ထုတ်လုပ်ခဲ့စဉ်က အသုံးပြုခဲ့သော လမ်းအူကြောင်းလမ်းကြမ်းမျှသာဖြစ်ပြီး မိုးရာသီ၌ သွားလာရန် မလွယ်ကူပါကြောင်း၊ ဤမြေသားလမ်းများကို ပြန်လည်ဖောက်လုပ်ပေးပါက ကယားပြည်နယ် နမ့်အော်ရွာအထိ နယ်စပ်လမ်းများ ချိတ်ဆက်သွားမည်ဖြစ်ပြီး နယ်စပ် ကျေးလက်ဒေသများ ဖွံ့ဖြိုးတိုးတက်ရေးအတွက် များစွာ အထောက်အကူ ပြုပေးနိုင်မည်ဖြစ်ပါကြောင်း၊ သို့ဖြစ်ပါ၍ မောက်မယ်မြို့နယ် ကဒူးကြီးကျေးရွာအုပ်စု ကုံးလုမ်း-ပန်းကျိုင်း-မိုက်ရှားစေး-ပုံစုတ် မြေသားလမ်းပိုင်း အကောင်အထည်ဖော် ဆောင်ပေးနိုင်မည့် အစီအစဉ်များကို သိရှိလိုကြောင်း မေးမြန်းပါသည်။