မိမိတို့မြို့နယ်အတွင်းရှိ ချောင်းများ၏ ကမ်းဘေးဝဲ/ယာတွင် ကိုယ်ထူကိုယ်ထ ရေဆင်းမြောင်းများဖြင့် စပါး၊ ဆီထွက်သီးနှံများနှင့် ကြက်သွန်ဖြူသီးနှံတို့ကို တစ်နှစ်လျှင် နှစ်သီးစား စိုက်ပျိုးလျက် ရှိပါကြောင်း၊ ယခုအခါ ချောင်းများသည် မိုးကြီးပြီး ရေကြီးရေလျှံ ဖြစ်ပေါ်လာသည့်အတွက် သဲများဖုံးလွှမ်းမှုများ နှစ်စဉ် ကြုံတွေ့နေရပါကြောင်း၊ မြောင်းပေါင်များ ရေတိုက်စားခြင်း၊ လယ်မြေများ ပျက်စီးဆုံးရှုံးခြင်းများ ကြုံတွေ့နေပြီး လယ်သမားများသည်လည်း လယ်ယာမဲ့များ ဖြစ်လာရပါကြောင်း၊ ထို့ကြောင့် မိမိအနေဖြင့် လွှတ်တော် နားရက်အတွင်း  ကျေးရွာလူထုနှင့်တွေ့ဆုံပွဲများတွင် လယ်သစ်၊ ယာသစ်၊ အလုပ်အကိုင်သစ်များ ပေါ်ပေါက်လာစေရန်၊ တစ်နည်းအားဖြင့် ဆင်းရဲမှုလျော့ချနိုင်ရန် အပြန်အလှန် ဆွေးနွေးညှိနှိုင်းပြီး လူထုဆန္ဒနှင့်အညီ ဖြစ်နိုင်ချေ နေရာများကို ကွင်းဆင်းကြည့်ရှုကာ အောက်ပါကျေးရွာများတွင် တာတမံများ၊ ရေလှောင်ကန်များ၊ အသေးစား သို့မဟုတ် အလတ်စား ပြုလုပ်ပြီး ရေသွင်းမြောင်းများဖြင့် တစ်နှစ်ကို နှစ်သီးစား စိုက်ပျိုးနိုင်မည်ဟု ယူဆပါကြောင်း၊

(၁) ရင်းကဲကျေးရွာ ရှဉ်ချောင်းတမံ ဧက ၁၀၀ ကျော်ခန့်၊ (၂) တောင်ဘို့ကြီးကျေးရွာ အရှောကြီးချောက်တမံ ဧက ၁၂၀ ခန့်၊ (၃) လယ်ဦးကျေးရွာ ရေလှောင်ကန်ဧက ၇၀ ကျော်၊ (၄) ကြန်တောကျေးရွာ ဆူးချောက်ရေလှောင်တမံ ဧက ၁၂၀ ကျော်၊ (၅) တေးကျေးရွာ-စံကျေးရွာမြောင်းမှ ဆက်ရန် အုတ်ဖို-မိုးကောင်းသောက် လယ်ဧက ၁၂၀ ခန့်၊ (၆) တပြင်းကျေးရွာ၊ ထိန်းချောင်းရေလှောင်တမံ လယ်ဧက ၂၀၀ ခန့်၊ (၇) အနိမ့်ကျေးရွာ ယောချောင်းမှ ပင်ထောင်ချောင်းသို့ ရေသွင်းမြောင်းအရှည် ငါးမိုင်၊ လယ်ဧက ၃၅၀ ခန့်၊ (၈) မြောက်မကျင်းကျေးရွာရှိ ပလွေးကန်အတွင်း ယောချောင်းရေမှ ပိုက်ဖြင့် ရေသွင်းစိုက်ပျိုးမြေဧက ၃၀၀ ခန့်၊ (၉) ပိန္နဲကျေးရွာရှိ ပိန္နဲတမံ စိုက်ပျိုးဧက ၅၀၀ ကျော် စုစုပေါင်း စိုက်ပျိုးနိုင်မယ့်မြေဧက ၁၉၆၀ ခန့် ရှိပါကြောင်း၊

အထက်ပါတာတမံများ၊ ရေလှောင်ကန်များ တည်ဆောက်ပေးခြင်းဖြင့် သဘာဝပတ်ဝန်းကျင် ပျက်စီးမှု နည်းပါးခြင်း၊ ဘေးထွက်ဆိုးကျိုး နည်းပါးခြင်းတို့အပြင် ချောင်းဘေးပျက်စီးသွားသော  လယ်ယာမြေများ အစားထိုးဖြစ်ပေါ်လာပြီး ကျေးရွာများ ဖွံ့ဖြိုးတိုးတက်လာမည် ဖြစ်ခြင်းကြောင့် နိုင်ငံတော်အစိုးရမှ အသေးစား သို့မဟုတ် အလတ်စား တာတမံများ၊ ရေလှောင်ကန်များ၊ ရေသွင်းမြောင်းများ တည်ဆောက်နိုင်ရေးအတွက် စက်ယန္တရားများ၊ ဆည်မြောင်း အင်ဂျင်နီယာများနှင့် လိုအပ်သည့် ဘဏ္ဍာငွေများကို ခွင့်ပြုပေးနိုင်ခြင်း ရှိ/မရှိနှင့် မည်သည်‌့နှစ်တွင် မည်သည့်တမံ တည်ဆောက်ပေးမည်ကို သိရှိလိုကြောင်း မေးမြန်းပါသည်။