မြန်မာနိုင်ငံတစ်ဝန်းတွင် ငွေစက္ကူအတုများ ဖမ်းဆီးရမိခြင်းများနှင့် ပတ်သက်၍ သတင်းစာ၊ ရေဒီယို၊ ရုပ်မြင်သံကြားများအပြင် ဘဏ်များတွင် ငွေလာရောက် အပ်နှံရာမှ ငွေစက္ကူအတုများ ပါဝင်လာခြင်းနှင့် စပ်လျဉ်း၍လည်း လူမှုကွန်ရက် စာမျက်နှာများတွင် တွေ့ရှိရပါကြောင်း၊ ငွေစက္ကူအစစ်နှင့် အတုများနှင့် ပတ်သက်၍ သိသာစေရန် ကျယ်ကျယ်ပြန့်ပြန့် အသိပေးခြင်းများကိုလည်း တွေ့ရှိရခြင်း မရှိပါကြောင်း၊ ငွေစက္ကူအတုများနှင့် ပတ်သက်ပြီး ဘဏ်ဝန်ထမ်းများက ငွေအတုဟု ယူဆရသည့် ပိုက်ဆံများအပေါ်ကို အပေါက်ဖောက်ခြင်း၊ တစ်ဝက်ဆုတ်ဖြဲခြင်းများ ပြုလုပ်နေသည်နှင့် ပတ်သက်၍ ၂၅-၅-၂၀၁၇ ရက်နေ့ ဗဟိုဘဏ်  ငွေကြေးနှင့်စီမံဌာန ညွှန်ကြားရေးမှူးချုပ်က သတင်းမီဒီယာများနှင့် တွေ့ဆုံရာတွင် ငွေစက္ကူအတုများကို ဖျက်သိမ်းခွင့်၊ ဖျက်ဆီးခွင့် မပြုထားကြောင်းနှင့် သက်ဆိုင်ရာရဲစခန်းကို အပ်နှံ ရမည်ဖြစ်ကြောင်း၊ ငွေစက္ကူများတွင် အမှတ်အသား ရေးခြစ်ခြင်းတွေကိုလည်း လုပ်ပိုင်ခွင့်မပြု ကြောင်း အစရှိသဖြင့် ဖြေကြားထားသည်ကို တွေ့ရှိရပါကြောင်း၊

၂၀၀၈ ခုနှစ်၊ ဖွဲ့စည်းပုံအခြေခံဥပဒေ အခန်း(၁) ပုဒ်မ ၃၆ ပုဒ်မခွဲ(င)အရ တရားဝင်ထုတ်ဝေ ထားသော ငွေကြေးများကို တရားမဝင်ငွေကြေးအဖြစ် အသိအမှတ်၊ သတ်မှတ်ခြင်းမပြုဟု ဖော်ပြထားသော်လည်း ပြည်သူများ၏ လက်ဝယ်ရှိ ရိုးသားစွာ ရှာဖွေထားသည့် ငွေကြေးများ တရားမဝင် ငွေစက္ကူများ ရောနှော ပါဝင်နေမှုအပေါ် နစ်နာကြေး တစ်စုံတစ်ရာ သို့မဟုတ် ထိုက်သင့်သော နှုန်းထားတစ်ခုကို မရှိဘဲ ဖျက်ဆီးခံနေရခြင်းသည် တရားဝင် ရှာဖွေထားသည့်  ငွေကြေးတွေကို တရားမဝင် ငွေစက္ကူအဖြစ်သို့ ပြောင်းလဲခံနေရခြင်းဟု ယူဆမိပါကြောင်း၊ ထို့ကြောင့်  ငွေစက္ကူအတုများ ပျံ့နှံ့နေခြင်းကြောင့် ရိုးသားစွာ ရှာဖွေလုပ်ကိုင် စားသောက် နေရသော ပြည်သူများ၏ ငွေကြေးဆုံးရှုံးမှုတွေ ဖြစ်ပေါ်နေခြင်းခြင်းနှင့် ပတ်သက်ပြီး နိုင်ငံတော်အစိုးရ၊ သက်ဆိုင်ရာ ဗဟိုဘဏ်နှင့် ပြည်ထဲရေးဝန်ကြီးဌာနတို့အနေဖြင့် မည်ကဲ့သို့ ပေါင်းစပ်ညှိနှိုင်းဖြေရှင်းမှုများ ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။